DƏVƏTİKANI

SAĞLAM OLUN!

DƏVƏTİKANININ Azərbaycan təbabətində "tərancəbin" adında qatı, bərkimiş şirəsi (elmi dildə "manna") geniş istifadə edilirdi. Onun mannası cinsi həvəsi artırır, öskürəkdə, sinə ağrılarında, ürəkbulanmada, güclü titrəmə-qızdırmada və susuzluqda xeyirlidir. Kərə yağı ilə manna sidik tutulmasında da xeyirlidir. Dalaq üçün zərərlidir. Onun zərərini tamarind toxumları və innab aradan qaldırır. Dozası: 32 - 135 q. Onu söyüd mannası əvəz edir.

Dəvətikanının mannası öskürəyi dəf edir, sinəni yumşaldır, susuzluğu aradan qaldırır və azca ödqovucu təsirə malikdir. Bir dəfədə 45 - 90 qram su ilə içilir. Hindistan və Seylonun ənənəvi təbabətində tərqovucu vasitə kimi məşhurdur, kökündən hazırlanmış həlimi isə xarici vasitə kimi şiş və irinləmələrin müalicəsində istifadə edilir. Bu bitkinin qara dəlibəng, tütün və acuan toxumları ilə qarışığından astma xəstəliyinin müalicəsində istifadə olunan xüsusi siqaretlər hazırlanır. Alimlər müəyyən ediblər ki, dəvətikanının otu və kökünün həlimi mikrobları öldürür və onların çoxalmasının qarşısını alır, həmçinin büzüşdürücü və qansaxlama xüsusiyyətlərinə malikdir. Dəvətikanının sulu cövhəri və 10%-li həlimi ödqovucu və sidikqovucu vasitə kimi istifadə edilə bilər. Bu bitkinin yayın cır-cır istisində yarpaq və budaqlarında əmələ gələn boz-sarı, şirin maye "manna" adı ilə məşhurdur. Onun tərkibini kitrə, mannit, şəkər, limon turşusu və acı maddələr təşkil edir.

Həftə içi.- 2010.- 1 dekabr.- S. 8.