Sabir Rüstəmxanlı sənədli roman yazdı

Məşhur "Ömür kitabı"nın müəllifi, şair Sabir Rüstəmxanlı son illərdə Azərbaycan tarixinin ayrı-ayrı milli səhifələrinə işıq saçan romanlar yazmışdır. Qədim oğuzların həyatından söz açan "Göy tanrı" və Gəncə xanı Cavad xanın XIX əsrdə rus işğalına qarşı qəhrəmanlığından bəhs edən romanlarından sonra yazıçı XX əsrin əvvəllərində baş verən hadisələrə üz tutmuş, Əhməd Ağaoğlunun başçılığı ilə yaradılan "Difai" milli özünümüdafiə təşkilatının fəaliyyətindən bəhs açan "Difai fədailəri" adlı roman qələmə almışdır.

Əsər sənədli roman janrındadır. Azadlıq radiosuna müsahibəsində S.Rüstəmxanlı göstərir ki, "Sənədlər romanın əsas hissəsini təşkil edir. Burda uydurma yoxdur". 1905-ci ilin sonları-1906-cı ilin əvvəllərində yaranan "Difai" müqavimət təşkilatının fəaliyyətinə cəmi üç ildən sonra Çar hökuməti tərəfindən qadağa qoyulmuşdu. "Əllərində olan sənədləri məhv etdilər. Həm bizim arxivlərimizdə, həm də başqa yerlərdə çox cüzi hissəsi qalır. Mən də romanı həmin izlər əsasında yazmışam" deyən yazıçı eyni zamanda Gəncədə, Bakıda, Şuşada, Qarabağda yaşamış adamların xatirələrindən də bəhrələndiyini söyləyir.

Roman "Qanun" nəşriyyatında çap olunmuşdur.

Həftə içi.- 2010.- 2-4/2-8 oktyabr.- S. 2.