Rəşid Şəfəq - 70

Oktyabrın 13-ü tanınmış bəstəkar, əməkdar incəsənət xadimi Rəşid Şəfəqin doğum günüdür. Bəstəkarın 70 yaşı tamam olur. Rəşid Şəfəqin Lent.az-a verdiyi məlumata görə, onun yubileyi ilə əlaqədar bir neçə tədbir keçiriləcək. Lakin dəqiq vaxt hələ məlum deyil. Bəstəkar 70 yaşının olmasına baxmayaraq, özünü çox yaxşı hiss etdiyini deyib. Qeyd edək ki, Əliyev Rəşid Camal oğlu (Rəşid Şəfəq) 1940-cı il oktyabrın 13-də anadan olub. Daha çox uşaq mahnılarının müəllifi kimi tanınır. "Səfeh siçan balası" uşaq opera-nağılı (1990), "Baş tutmayan hiylə" uşaq musiqili nağıl-komediyası (1991), "Tülkü, Tülkü, Tünbəki..." komik folklor nağıl-operası (1993), "Bayquşların söhbəti" uşaq nağıl-operası (1992), "Qiymətlərin sərgüzəşti" uşaqlar üçün müzikl (1998), "Ana" üçpərdəli operası (H. Cavidin eyni adlı dramı əsasında, 1999), "Cırtdan" uşaq operattası (Azərbaycan xalq nağılı əsasında) kimi əsərləri var. O, "Hüseyn Cavid-III" xatirə rekviyem-poeması, "Simfoniyetta", "Balaca Elnurun musiqi albomu", "Balaca Camalın musiqi albomu", "Uşaq və gənclər üçün musiqi", "Cəngavərlər" vokal-xor silsiləsi, "Anamın bayramı" vokal-xor silsiləsi, "Ana torpaq - Qarabağ" mahnılar silsiləsi, "Rahab" muğam-poemasının müəllifidir.

Həftə içi.- 2010.- 14 oktyabr.- S. 7.