31 mart soyqırımı İstiqlal muzeyində anıldı

Düz 93 il əvvəl Azərbaycanda baş vermiş 31 mart soyqırımı müxtəlif qurumlar tərəfindən anıldı. İctimaiyyətin müxtəlif nümayəndələri bu faciəyə münasibət bildirdi. İstiqlal Muzeyində keçirilən konfrans da məhz 31 mart soyqırımının qurbanlarının xatirəsinə həsr olundu. Konfransda Azərbaycan İstiqlal muzeyinin direktoru F.Şəmsi çıxış edərək 31 mart soyqırım günü həlak olanların xatirəsinin bir dəqiqəlik sükutla yad edilməsini konfrans iştirakçılarından xahiş etdi. Daha sonra xalqımızın başına gətirilən o müsibətdən geniş və ətraflı söhbət açan F.Şəmsi tarixi faktlara əsaslanan dəlillərlə çıxışına davam etdi. O bildirdi ki, bu faciə nəinki xalqımıza, həmçinin bizim soykökümüzə vurulan ən ağır zərbədir: "Biz çox istərdik ki, 31 mart, 26 fevral və bu kimi faciələri törədənlər heç vaxt cəzasız qalmasın. Onlar cəzasız qaldıqca, bizim dərdimiz bir qədər də ağırlaşır və dərinləşir. 31 mart yaddan çıxacaq, unudulacaq bir faciə deyil, hər zaman xatırlaya biləcəyimiz, bir an, bir dəqiqə belə unuda bilməyəcəyimiz soyqırımdır. Xüsusilə qeyd etmək istəyirəm ki, o faciədə bizim xalqın soykökü tamamilə kəsilə bilərdi. Çünki bu soyqırımı məhz o məqsədlə törədilib. Lakin dözümlü olan xalqımız bu sınaqdan da çıxdı. Əgər günahkarlar öz cəzasını almazlarsa, bundan da ağır faciələr nəinki bizi, bütün dünya xalqlarını gözləyər və bunu törədənlər də öz çirkin əməllərini davam etdirə bilərlər."

Konfransda Prezident yanında Dövlət İdarəçilik Akademiyasının dosenti, tarix kafedrasının müdiri Firdovsiyyə Əhmədova, Azərbaycan Milli Elmlər Akademiyasının Şərqşünaslıq İnstitutunun aparıcı elmi işçisi Solmaz Rüstəmova-Tohidi, Bakı Dövlət Universitetinin mənbəşünaslıq-tarixşünaslıq metodikası kafedrasının müdiri Anar İsgəndərli, Bakı Dövlət Universitetinin Azərbaycan tarixi kafedrasının professoru, tarix elmləri doktoru, Əməkdar elm xadimi Süleyman Əliyarlı və başqaları çıxış ediblər.

Tədbirdə Prezident Qvardiyasının əsgərləri, Ali Hərbi Dənizçilik məktəbinin kursantları, Heydər Əliyev adına Hərbi məktəbin kursantları, Bakı Dövlət Universitetinin, Bakı Turizm İnstitutunun, Bakı Slavyan Universitetinin tələbələri və digər qonaqlar iştirak ediblər. 31 mart soyqırımına həsr edilmiş sənədli film nümayiş olunub. Konfransdan sonra Azərbaycan İstiqlal Muzeyinin əməkdaşları Azərbaycan Dövlət Polis Akademiyasında Mart soyqırımında həlak olanların əziz xatirəsinə həsr olunmuş mühazirələrlə çıxışlar ediblər.

Pərvin İsmayılova

Həftə içi.- 2011.- 1 aprel.- S. 8.