Rusiya münaqişənin həllində istiqamətləndirici rol oynaya bilər

"Azərbaycan və Rusiya arasındakı münasibətlərin mövcud səviyyəsi diplomatik prosedur çərçivəsindən çox kənara çıxıb. Bu münasibətlər iki ölkə əhalisinin geniş təbəqələrinin köklü maraqları ilə əhatələnib" - bu fikirləri İTAR-TASS-a açıqlamasında Polad Bülbüloğlu səsləndirib. İki ölkə arasında diplomatik əlaqələrin qurulmasının 19-cu ildönümü ilə bağlı səfir vurğulayıb ki, məhz bu əsas duruma görə keçən illər ərzində ikitərəfli münasibətlərin həqiqətən mehriban qonşuluq ruhunda olması nailiyyəti qazanılıb. Səfirin qənaətincə, konstruktiv dialoq və qarşılıqlı anlayış, etimad mühitinin formalaşmasında 2010-cu ilin sentyabrında Bakıda iki ölkənin prezidentləri tərəfindən sərhədlərin müəyyənləşdirilməsinə dair tarixi əhəmiyyət daşıyan sazişin imzalanması da mühüm rol oynayıb: "Lakin dövlətlər və cəmiyyətlər arasında münasibətlər tək siyasi və iqtisadi maraqlarla ölçülmür. Burada bilavasitə milyonlarla insanın taleyinə toxunan humanitar ölçülər də var. Azərbaycanda nəsillər ötdükcə yaşayan yüz minlərlə rus buranı öz vətənləri sayırlar.

100 minlərlə azərbaycanlı isə Rusiyada yaşayır. Bu bizim münasibətləri möhkəmləndirən ümumi sərvətimizdir". Diplomat onu da bildirib ki, iki ölkə arasındakı münasibətlərin zəngin potensialından tam yararlanmaq Dağlıq Qarabağ münaqişəsinin həlli və onun ağır nəticələri aradan qaldırılmadan mümkün deyil. Onun sözlərinə görə, Rusiya Minsk Qrupunun həmsədri və son illərdə daha fəal mövqe nümayiş etdirən tərəf kimi münaqişənin həllində müəyyən rol oynaya bilər. Bununla bağlı səfir diqqəti Rusiya prezidenti Dmitrii Medvedyevin Azərbaycan, Rusiya və Ermənistan dövlət başçılarının üçtərəfli görüşlərinin təşkili təşəbbüsünə yönəldib: "Hazırda çox böyük təhlükə mənbəyi olan bu münaqişənin sülh yoluyla həllinə ümidlər məhz bu proseslə bağlıdır".

Azad

Həftə içi.- 2011.- 6 aprel.- S. 3.