Dağlıq Qarabağa müstəqilliyin verilməsi mümkünsüzdür

Prezident İlham Əliyev: "Heç bir şərt irəli sürülmədən ölkəmizin ərazi bütövlüyü bərpa edilməlidir"

Prezident İlham Əliyevin sədrliyi ilə dünən Nazirlər Kabinetinin 2011-ci ilin 1-ci rübünün sosial-iqtisadi inkişafının yekunlarına həsr olunan iclası keçirilib. Dövlət başçısı Nazirlər Kabinetinin 2011-ci ilin 1-ci rübünün yekunlarına həsr olunan iclasda 1-ci rübdə ölkə iqtisadiyyatının uğurla inkişaf etdiyini bildirib.

Qeyri-neft sektorunda artımın qeydə alındığını xüsusi vurğulayan prezident İlham Əliyev bildirib ki, əsas məqsəd bu sektoru inkişaf etdirmək, iqtisadiyyatın neft və qaz amilindən asılılığını azaltmaqdır. Dövlət başçısı bu sahəyə xüsusi diqqətin göstərildiyini deyib. Sənaye istehsalının 0,3% artdığını deyən dövlət başçısı sənayenin inkişafında mühüm amil kimi ölkədə qeyri-neft sənayesinin 9,8% artmasını qeyd edib. Prezident İlham Əliyev bunu qeyri-neft sektoruna qoyulan investisiyaların, sahibkarlara yaradılan şəraitin nəticəsi kimi qiymətləndirdi. Hazırda neft hasilatının yüksək həddə çatdığını, növbəti illərdə qaz istehsalının da artacağını deyib. Dövlət başçısı ölkənin valyuta ehtiyatlarının hazırda artaraq 34,7 milyard dollara çatdığını və bunun ilin sonuna qədər artmaqda davam edəcəyini qeyd edib. Bütün bunlar Azərbaycanda böyük investisiya layihələrinin icra edilməsi fonunda baş verir. Dövlət başçısı bütövlükdə iqtisadi sahədə bütün tapşırıqların yerinə yetirildiyini, sosial sahədə qarşıya qoyulan vəzifələrin həyata keçirildiyini deyib. Prezident İlham Əliyev Regionların sosial-iqtisadi inkişafı proqramının da uğurla həyata keçirildiyini diqqətə çatdırıb. "Biz daim inkişafda olmalıyıq", - vurğulayan prezident İlham Əliyev daha vacib bir layihənin - Bakıətrafı qəsəbələrin inkişafı proqramının hazırlandığını deyib. Dövlət başçısı 1-ci rübdə ölkədə böyük infrastruktur layihələrinin icra edildiyini, həmin layihələrin icrasının mərhələlərlə həyata keçirildiyini, qazlaşma, su-kanalizasiya məsələlərinin həll olunduğunu və yolların çəkildiyini söyləyib. Böyük infrastruktur layihələri sırasında Heydər Əliyev beynəlxalq hava limanının yeni binasının inşası da var. Eyni zamanda nəqliyyat sahəsinin inkişafı istiqamətində Beynəlxalq dəniz ticarət limanının, həmçinin gəmiqayırma zavodunun tikintisi layihələri də həyata keçirilir. Prezident İlham Əliyev informasiya-kommunikasiya sektorunun çox dinamik şəkildə inkişaf etdiyini bildirib. Ölkəmizdə süni peykin yaradılması proqramı da icra edilir. Dövlət başçısı ümidvar olduğunu bildirib ki, Azərbaycan yaxın zamanlarda öz peykinə sahib olacaq. Bu isə, ölkənin imici baxımından önəmli məsələdir. Hərbi sənaye potensialının sürətlə inkişaf etdiyini vurğulayan prezident İlham Əliyev ölkəmizdə müxtəlif adda müasir hərbi sənaye məhsullarının istehsal olunduğunu da bildirib.

Dövlət başçısı bölgədə təhlükəsizlik tədbirlərinin gücləndirilməsi sahəsində Azərbaycanın böyük rolunu da qeyd edib. Ermənistan-Azərbaycan, Dağlıq Qarabağ münaqişəsindən danışan prezident İlham Əliyev bu məsələdə ölkəmizin mövqeyinin birmənalı olduğunu deyib. Dövlət başçısı münaqişə ilə bağlı aparılan danışıqlar prosesində Azərbaycanın mövqeyinin beynəlxalq hüquqa əsaslandığını deyib və bildirib ki, heç bir şərt irəli sürülmədən ölkəmizin ərazi bütövlüyü bərpa edilməlidir. Prezident İlham Əliyev Dağlıq Qarabağa müstəqilliyin verilməsinin mümkünsüz olduğunu vurğulayıb. Ölkəmizin işğal olunmuş torpaqlarında vəziyyəti araşdırmaq məqsədilə Azərbaycanın təklifi əsasında ATƏT-in qiymətləndirici missiyasının işğal olunan torpaqlara səfərinə və hazırladığı hesabata toxunan dövlət başçısı qeyd edib ki, Azərbaycan cəmiyyətində missiyanın yekun məruzəsində işlənən düzgün olmayan bəzi ifadələrlə bağlı müxtəlif fikirlərin olmasına baxmayaraq, sənəddə işğal olunan ərazilərdə ermənilər tərəfindən bütün infrastrukturun dağıdıldığı göstərilir. Məruzədə işğal edilən rayonların süni şəkildə hüdudlarının və tarixi adlarının dəyişdirilməsinin yolverilməzliyi də qeyd edilir. Vacib məsələlərdən biri - işğal olunan ərazilərdə qanunsuz məskunlaşma siyasətinin aparılmasının sənəddə əks olunmasıdır. Dövlət başçısı bildirib ki, ən vacib məsələlərdən biri kimi məruzədə status kvonun, yəni indiki vəziyyətin davam edə bilməməsi ilə bağlı tezislərin göstərilməsidir. "Hesab edirəm, bu əsas məsələdir", - deyən prezident İlham Əliyev vurğulayıb ki, işğalçı qüvvələr Azərbaycan torpaqlarından çıxarılmalıdır. Sonra maliyyə naziri Samir Şərifov, Dövlət Gömrük Komitəsinin sədri Aydın Əliyev, Dövlət Sosial Müdafiə Fondunun sədri Səlim Müslümov və Dövlət Miqrasiya Xidmətinin rəisi Arzu Rəhimov rəhbərlik etdikləri qurumların ilin 1-ci rübündəki fəaliyyəti barədə məlumat veriblər. Müşavirəyə yekun vuran prezident İlham Əliyev dünya bazarlarında neftin bahalaşmasının inflyasiya risklərini artıra biləcəyinə toxunaraq belə halda müvafiq tədbirlərin gücləndirilməsinin vacibliyini də vurğulayıb. Dövlət başçısı bütün bu işlərin görülməsi üçün büdcəyə əlavələrin edilməsinin vacibliyini bildirib. Prezident İlham Əliyev ölkədə bütövlükdə işlərin yaxşı getdiyini, bunu 2011-ci ilin 3 ayının yekunlarının da təsdiqlədiyini bildirib.

Azad Əliyev

Həftə içi.- 2011.- 13 aprel.- S. 2.