Məcburi Köçkün Uşaq Komitəsi yaranıb

Azərbaycan Gənc Hüquqşünaslar Birliyi (AGHB) Danimarka Qaçqınlar Şurası (DQŞ) və Həyat Humanitar Təşkilatı ilə birgə həyata keçirdiyi və Avropa İttifaqı tərəfindən maliyyələşdirilən "Qayıdış və yenidən məskunlaşdırma zamanı uşaqların iştirakı" layihəsi çərçivəsində cari ilin 5-8 Aprel tarixlərində Yevlax, Ağdam, Ağcabədi və Goranboy rayonlarında məskunlaşmış 7 məcburi köçkün icmasında Məcburi Köçkün Uşaq Komitələrinin (bundan sonra - Komitə) yaradılması məqsədilə məcburi köçkün uşaqların təhsil aldığı orta məktəblərdə uşaqların iştirakı ilə seçkilər keçirilib. Bu görüşlərdə DQŞ və Həyat təşkilatlarının nümayəndələri də iştirak ediblər. Seçkilər zamanı hər bir icmada 10 nəfər uşaq tam hüquqlu, 4 nəfər assosiativ hüquqlu uşaq Komitəyə üzv olub. Bundan başqa hər bir komitədə müşahidəçi statuslu 1 nəfər valideyn və 1 nəfər müəllim də seçilib. Məlumat üçün deyək ki, indiyədək aşağıdakı icmalarda bu cür Komitələr yaradılıb:

Ağcabədi rayonu, Taxta körpü;

Ağcabədi rayonu, Düşərgə kəndi;

Ağcabədi rayonu, Danbulaq kəndi;

Yevlax rayonu, Kəlbəcər 30 saylı tam orta məktəb;

Yevlax rayonu, Ağdam 23 saylı tam orta məktəb;

Ağdam rayonu, Quzanlı qəsəbəsi, 18 saylı tam orta məktəb;

Goranboy rayonu, Xocalı 1 saylı tam orta məktəb.

Yaradılmış Komitələrin əsas məqsədi qayıdış və yenidən məskunlaşma ilə bağlı məsələlərdə maraq, niyyət və arzularını həyata keçirmək üçün məcburi köçkün uşaqlara səlahiyyət verməkdən ibarətdir. Komitə üzvü olan uşaqlar yaşadıqları icmalarda uşaqlarla bağlı hər hansı məsələnin müzakirəsində iştirak etmək, məktəb, icma, təhsil və asudə vaxt çərçivəsində olan problemlərin həllinə dair təklif və tövsiyələr irəli sürmək hüququna malik olacaqlar.

Cəfər

Həftə içi.- 2011.- 13 aprel.- S. 6.