"Dərd ürəyimdə mamır bağlayıb"

Şair Qələndər Xaçınçaylının yaradıcılıq gecəsi keçirildi

Dünən Badamdar Mədəniyyət Evində "Miras" Mədəni İrsin Öyrənilməsinə Kömək İctimai Birliyi, Bakı Şəhər Mədəniyyət və Turizm İdarəsinin Kitabxana Direktorları Şurasının təşkilatçılığı ilə "Tanıyaq, tanıtdıraq" silsiləsindən ilk tədbir keçirildi. Tədbir xüsusilə Azərbaycan Yazıçılar və Jurnalistlər birliklərinin üzvü Qələndər Xaçınçaylının yaradıcılığına həsr olunmuşdu. Açılış nitqi ilə tədbiri başlayan Mədəniyyət evinin direktoru Fəridə Babayeva silsilə tədbirlərin keçirilməsinin önəmindən danışdı:

"Əsas məqsədimiz yeniyetmə və gənclərin dünyagörüşünün hərtərəfli inkişafına dəstək olmaq, onları müasir Azərbaycan yazarlarının yaradıcılığı ilə yaxından tanış etmək, kitaba və mütaliəyə maraqlarını artırmaqdır. Elə bu səbəbdəndir ki, bu gün də biz öz tədbirimizi özünəməxsus yaradıcılığı ilə seçilən Qələndər Xaçınçaylının doğum günü münasibətilə onun yaradıcılığına həsr etmişik".

Daha sonra "Miras" Mədəni İrsin Öyrənilməsinə Kömək İctimai Birliyinin uşaq və gənclər şöbəsinin rəhbəri Cəfər Mənsimi də çıxış edərək, tədbirin məqsədlərindən söz açdı və həmçinin öz növbəsində, Qələndər Xaçınçaylını təbrik etdi.

Turizm İdarəsinin Kitabxana Direktorları Şurasının direktoru Nüşabə Ələkbərova da çıxış edənlər sırasında idi: "Əsas məqsədimiz hər zaman olduğu kimi, bu gün də gənc nəslin kitabxanalara, kitaba, mütaliəyə marağını artırmaq, onlara bu haqda müsbət fikirlər aşılamaqdır. Bununla yanaşı, mən də Qələndər müəllimi təbrik edənlərə qoşuluram, ona uzun ömür, can sağlığı arzulayıram". Daha sonra söz şair İslam Sadığa verildi: "Şair dostum Qələndər Xaçınçaylının şeirlərini oxuyub gördüm ki, onun bütün yazılarına misra-misra vətən dərdi, yurd ağrısı, torpaq sızıltısı hopub. Əsası da odur ki, Qələndər müəllimin yaradıcılığı ilə yaşamı vəhdət təşkil edir. Sanki onun həyatı yaradıcılığına yansıyıb və orada əks olunub. Mən də Qələndər müəllimin şeirlərini oxuduqca onun ürəyini gözlərimlə görmüşəm və hiss etmişəm ki, doğrudan da, dərdi onun ürəyində mamır bağlıyıb və bu mamırın dərmanı yalnız Kolanıdadır".

Millət vəkili, yazıçı-publisist Aqil Abbas çıxışında qeyd etdi ki, Qələndər Xaçınçaylının yaradıcılığındakı vətən həsrəti, vətən nisgili əslində gənclərimizə örnək, nümunədir: "Şairin kövrək, yanan poeziyası var. Onun "Qarabağın ağlar gözü", "Qarabağa gedən yollar", "Dünya mənim söz qalamdır", "Dərd ürəyimdə mamır bağlayıb" kimi kitabları Azərbaycan ədəbiyyatına daxil olan gözəl nümunələrdəndir. Ona tutduğu bu yolda uğurlar arzulayır, yaradıcılığının davamını diləyirəm. Fürsətdən istifadə edərək gənclərimizə tövsiyə etmək istərdim ki, Qələndər müəllim kimi şairlərin yaradıcılığını mütaliə etsinlər, kitaba, elmə, yaradıcılığa özlərində həvəs yaratsınlar".

Şair Ənvər Əhməd də çıxış edərək bildirdi ki, 80-ci illərdə ədəbiyyata gəlmiş istedadlı şairlərimizdən biri olan Qələndər Xaçınçaylının imzası oxuculara yaxşı tanışdır: "Şairin yaradıcılığına nəzər yetirənlər görürlər ki, onun bütün şeirlərinin əsasını vətən dərdi, yurd dərdi, Qarabağ dərdi təşkil edir. Ona bu dərdin sona yetməsini arzulayıram".

Professor Qurban Bayramov dedi ki, Qələndər Xaçınçaylı Azərbaycan ədəbiyyatında özünəməxsusluğu ilə yer tutub: "O həm yaxşı şair, həm gözəl publisist, həm də savadlı jurnalistdir. Ona yaradıcılığında və həyatında uğurlar arzulayıram".

Şair Yusif Nəğməkarın fikirləri isə belə oldu: "Qələndər müəllimin kitablarında nəcib missiya var. Bu isə ondan ibarətdir ki, şair Qarabağ dərdini sanki hamı tərəfindən ağlayır. Bundan sonrakı kitablarında Qarabağ sevincini əks etdirməsi isə ona ən böyük arzumdur".

"Həftə içi" qəzetinin redaktoru Ceyhun Nağı da təbriklərə qoşuldu: "Mən də çıxışlara az yer verilməsinin tərəfdarıyam. Bura yığılan insanlar şair Qələndər Xaçınçaylının şeirlərini dinləməyə gəliblər. Amma bir məqamı da deyim. İstənilən halda burda kimin neçənci söz deməsinin əhəmiyyəti yoxdur. Çünki bu tədbirdə söz sahibi- ilk və son sözün sahibi Qələndər Xaçınçaylıdır. Mən onun şeirləri, yaradıcılığı barədə danışmaq istəmirəm, çünki bunun üçün özümdə güc görmürəm. Amma biz Qələndər müəllimlə dekabrdan bir "səngərdəyik". Qələndər müəllim məsuliyyətli insan, məsuliyyətli jurnalistdir. Yaşına baxmayaraq, istənilən faktın arxasınca gedən, tapan, yazan və yoruldum deməyən bir insandır. Qələndər müəllim şeirlərində işğalda olan torpaqların taleyindən, övladının sabahından, özünün yerinin sabah necə qorunmasından narahatlığını ortaya qoyur. Arzu edirəm ki, Qələndər Xaçınçaylı yaxın ad günlərindən birində bu narahatçılıqlardan qurtulmuş olsun".

Tədbirin sonunda isə əməkdar incəsənət xadimi Murad Rzayevin rəhbərlik etdiyi "Qarabağ bülbülləri" ansamblının ifasında maraqlı konsert proqramı təqdim olundu.

Sevda

Həftə içi.- 2011.- 13 aprel.- S. 8.