Hindistanda Nizami Gəncəvi ili elan olunub

Azərbaycanın Hindistandakı səfirliyi bu ili Hindistanda "Nizami Gəncəvi ili" elan edib. Səfirliyin yaydığı məlumata görə, N.Gəncəvi ili çərçivəsində Hindistanda bir sıra tədbirin keçirilməsi planlaşdırılır. Hindistanda böyük şairlə bağlı tədqiqatlar istiqamətində səfirliyin apardığı araşdırmalar nəticəsində məlum olub ki, onun əsəri ilk dəfə Kəlküttə şəhərində çap edilib və hazırda Hindistanın bir neçə şəhər kitabxanaları və arxivlərində müxtəlif əlyazmalar mövcuddur. Bundan əlavə, səfirlik aşkar edib ki, Hindistanın prezident sarayının mərkəzi zalında N.Gəncəvinin portreti də mövcuddur. Həmçinin zalın tavanına N.Gəncəvinin əsərlərindən təsvirlər və qısa beytlər həkk edilib. Ölkənin bütün yüksək səviyyəli dövlət tədbirləri məhz bu zalda keçirilir və N.Gəncəvinin portreti zalda yeganə olduğuna görə ziyarətçilərin diqqətindən yayınmır. N.Gəncəvi ili çərçivəsində səfirlik elmi konfrans, opera və balet nümayişi, film festivalı, xalça və rəsm sərgisi, muğam konserti keçirəcək. Nyu Dehli şəhərində N.Gəncəvi parkının yaradılması və orada dahi Azərbaycan şairinin heykəlinin ucaldılması da planlaşdırılır.

Həftə içi.- 2011.- 15 aprel.- S. 3.