Gənclər ekologiya ilə bağlı məlumatlandırılmalıdır

"Ətraf mühitin mühafizəsi" V Beynəlxalq layihə olimpiadasının yekunlarına dair mətbuat konfransı keçirilib

Bakıda Əl oyunları İdman Sarayında "Ətraf mühitin mühafizəsi" V Beynəlxalq layihə olimpiadası keçirilib.

Dövlət Neft Şirkətinin dəstəyi ilə Təhsil Nazirliyi, Ekologiya və Təbii Sərvətlər Nazirliyinin, İctimai Televiziyanın, "Çağ" Öyrətim İşlətmələri Şirkətinin və "İNEPO-AVRASİYA" Ekologiya İctimai Birliyinin birgə təşkil edəcəyi olimpiadada Albaniya, İndoneziya, İran, Hindistan, Qazaxıstan, Gürcüstan, Litva, Makedoniya, Malaziya, Meksika, Nigeriya, Pakistan, Polşa, Rumıniya, Slovakiya, Türkiyə, Türkmənistan, Ukraynadan, ümumilikdə dünyanın 33 ölkəsindən 300-ə qədər şagird iştirak edib. Münsiflər heyətinə bütün dünyadan 13-19 yaş arasında olan şagirdlərin layihələri müsabiqəyə təqdim edilib. Olimpiadaya təqdim edilən layihələri dünyanın müxtəlif ölkələrindən gələn təcrübəli elm adamlarından ibarət münsiflər heyəti qiymətləndirilib.

Olimpiadanın yekunlarına dair keçirilən mətbuat konfransında çıxış edən "Çağ" Öyrətim İşlətmələri Azərbaycan-Türkiyə Özəl Liseyləri Baş idarəsinin rəisi Arif Gömleksizin deyib ki, ekologiya və qlobal fəlakətlərdən çıxış yollarından bəhs edən "INEPO-AVROASİYA" Ətraf Mühitin Mühafizəsi Beynəlxalq Layihə Olimpiadasının keçirilməsində məqsəd prezident İlham Əliyevin "Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı" haqqında sərəncamını rəhbər tutaraq ekoloji problemlərin həlli və ətraf mühitin mühafizəsi istiqamətində gənc nəsli məlumatlandırmaq, onlarda ətraf mühitə qarşı həssas münasibət formalaşdırmaq, təbii, mədəni, tarixi və sosial-estetik dəyərlərin qorunması ruhu yaratmaqdır. Onun sözlərinə görə, "İnepo-Avrasiya" ekologiya olimpiadası dövlət müstəqilliyinin bərpasının 20-ci ildönümünə həsr edilib: "Olimpiadanı keçirməkdə ən başlıca məqsədimiz Azərbaycanda və dünyada artmaqda olan ekoloji problemlərin həlli və ətraf mühitin qorunub saxlanması mövzusunda gənc nəsli məlumatlandırmaqdır".

A.Gömleksiz qeyd edib ki, olimpiadanın Azərbaycan həqiqətlərini dünyaya çatdırmaqda böyük əhəmiyyəti var. "Biz Azərbaycan xalqı ilə böyük bir ailə kimiyik. Qarabağ həqiqətlərini, bu gün beynəlxalq aləmdə həllini gözləyən problemlərin həll edilməsində, başqa millətlərin bu problemlərlə yaxından tanış olmasında olimpiadanın böyük əhəmiyyəti var".

Şirkətin idarə rəisi Arif Gömleksizin sözlərinə görə, bu il ötən illərdən fərqli olaraq, olimpiadanın statistikasında böyük dəyişikliklər var. Belə ki, builki olimpiadada 35 ölkənin nümayəndəsi iştirak edib. Aprelin 9-da məktəblilərin ənənəvi Ətraf Mühitin Mühafizəsi V Beynəlxalq Layihə Olimpiadasının (INEPO-EUROASIA) mükafatlandırılma mərasimi keçirilib: "Bu olimpiadada Azərbaycan, Anqola, Mərkəzi Afrika, İordaniya, Laos, Yəmən, Litva, Pakistan, Ukrayna, Əfqanıstan, İran, Albaniya, Belarusiya, Hindistan, Danimarka, Gürcüstan, İndoneziya, İraq, Qırğızıstan, Makedoniya, Rumıniya, Slovakiya, Tayland, Türkiyə, Türkmənistan, Qazaxıstan, Tacikistan, Filippin, Vyetnam, Malaziya, Meksika, Şimali Kipr, Monqolustan, Bosniya və Hersoqovina, kimi yaxın-uzaq ölkələrdən gələn şagirdlər qatılıblar.

Olimpiadada Azərbaycanın bir sıra dövlət, hökumət, nazirlik, millət vəkilləri, Türkiyənin Azərbaycandakı Səfirliyinin nümayəndələri, idarə, elm və təhsil müəssisələrinin rəhbərləri iştirak ediblər. Müstəqilliyinin bərpasının 20-ci ildönümünə həsr olunan olimpiadanın keçirilməsində məqsəd Azərbaycanda və dünyada artmaqda olan ekoloji problemlərin həlli və ətraf mühitin qorunub saxlanması barəsində gənc nəsli məlumatlandırmaq, şagirdlərdə ekoloji şüuru inkişaf etdirmək, ətraf mühitə qarşı həssas, müsbət münasibəti formalaşdırmaq, təbii, mədəni, tarixi və sosial estetik dəyərləri qorumaq, problemlərin həllində şagirdləri yaşayaraq və əməl edərək müxtəlif layihələr haqqında düşündürməkdən ibarətdir".

A.Gömleksiz vurğulayıb ki, bu gün Azərbaycanda ekoloji problemlərin həllinə çox böyük diqqət göstərilir. "Azərbaycan neft ölkəsidir. 150 ildən artıqdır ki, ölkəmizdə açıq üsulla neft çıxarılması ekoloji tarazlığın pozulmasına gətirib çıxarıb.

Bildiyiniz kimi, dünyada sənaye üsulu ilə ilk neft quyusu Azərbaycanda qazılıb, neftin boru xətti ilə daşınması Azərbaycanda həyata keçirilib, həmçinin ilk dəfə neftin tankerlərə doldurulub daşınması da ölkəmizdə baş verib. Hazırda biz böyük ekoloji layihələr həyata keçiririk. Siz bu layihələrlə tanış olacaqsınız. Hesab edirəm ki, bu olimpiadanın həm sizin, həm də Azərbaycan üçün müsbət təsiri olacaq. Həmçinin təbiətə münasibətdə siz gənclərin fikirlərindən bəhrələnmək də yaxşı olardı." A.Gömleksiz qeyd edib ki, Azərbaycan dünya miqyasında belə Olimpiada keçirən nadir ölkələrdən biridir. "Təbii ki, Prezident İlham Əliyevin ekologiyaya diqqət və qayğısı belə bir Olimpiadanın keçirilməsinə zəmin yaratdı. Bu bir daha onu göstərir ki, Azərbaycan sadəcə neft ölkəsi deyil". Onun dediyinə görə, Azərbaycan bir çox beynəlxalq olimpiadalarda iştirak edib. "Nəzərinizə çatdırım ki, 1994-cü ildən 2011-ci ilə qədər keçirilən olimpiadalarda Azərbaycan 435 medal qazanıb. SOCAR-ın sponsorluğu ilə Azərbaycan yalnız xarici dövlətlərdə keçirilən olimpiadalarda iştirak etmir, həmçinin ölkə daxilində də beynəlxalq olimpiadalar keçirilir. Bu olimpiadaya isə 235 beynəlxalq dərəcəli layihə təqdim olundu və onlardan 57-si iştirak hüququ qazandı. Bununla yanaşı, olimpiadada iştirak edən layihələrin keyfiyyəti də ildən-ilə yüksəlir. Son 3 ildir ki, Azərbaycan məktəbləri də burada iştirak edirlər".

A.Gömleksizin sözlərinə əsasən, "İNEPO-AVRASİYA" Ətraf Mühitin Mühafizəsi I Beynəlxalq Layihə Olimpiadası 2007-ci ildə keçirilib, burada 17 ölkənin məktəbliləri iştirak ediblər. 2008-ci ildə baş tutmuş II Olimpiadaya 30, 2009-cu ildə keçirilmiş III Olimpiadaya 31, 2010-cu ildə keçirilmiş IV Olimpiadaya 33 ölkənin təmsilçiləri qatılıblar. Azərbaycanın qabaqcıl məktəblərinin şagirdləri bütün Olimpiadalarda uğurla çıxış edərək, birinci Olimpiadada 4 qızıl, 4 gümüş, 4 bürünc, ikinci və üçüncü Olimpiadalarda 4 qızıl, 8 gümüş, 12 bürünc, dördüncü olimpiadada isə 5 qızıl, 8 gümüş, 10 bürünc medal qazanıblar. Bu il Təşkilat komitəsinə təqdim olunan layihələrin daha keyfiyyətli və maraqlı olduğunu deyən "İNEPO-Avrasiya" Ekologiya İctimai Birliyinin sədri A.Gömleksiz bildirib ki, münsiflər heyəti tərəfindən qəbul olunmuş layihələrin 58-i Azərbaycan, 57-i isə xarici ölkələrin payına düşüb. Münsiflər heyətində tanınmış və təcrübəli alimlər təmsil olunub.

Bu olimpiada Bakı Avropa Liseyinin şagirdləri Gülay Məmmədova, Hafizə Əlirzayeva, "Qafqaz" Azərbaycan -Türkiyə Özəl Gimnaziyasının şagirdləri Azər Əsgərov, Aslan Mansurov, Akademik Zərifə Əliyeva adına məktəbin şagirdləri Gülnar Rəhimzadə, Səbinə İsayeva, Bakı Slavyan Universitetinin məktəb-lisey kompleksinin şagirdləri Leyla Hacılı, Lalə Darçınova, Şəki Azərbaycan-Türkiyə Özəl Liseyinin şagirdləri Orxan Kərimov, Ayaz Məmmədov, Şimali Kiprdən Mehmetbağır Bağırzadə, Malaziyadan Muhammad Naqib İbrahim, Muhammad Zulhelmi Noor Azmi, Bosniya və Hersoqovaniyadan Denis Perunicic, Vekas Murselovic, İraqdan Aya Adnan Muhammed, Shene Karim Tofiq qızıl medala layiq görülüblər. Bununla bərabər ekologiya sahəsində hazırladıqları proqramlara və məqalələrə görə televiziya və bir qrup qəzet nümayəndələri də mükafatlandırılıb. Sonra mətbuat nümayəndələri Bakı Özəl Türk Liseyində şagirdlər üçün yaradılan şəraitlə tanış olublar. Onlar liseyin kitabxanası, müasir tələblərə cavab verən sinif otaqları, idman zalı, bugünədək keçirilən olimpiadalara aid stendlərə baxış keçiriblər.

Bəhruz

Həftə içi.- 2011.- 16-18 aprel.- S. 14.