"Etik jurnalistikanın inkişafı" mövzusunda seminar keçirilib

Söz Azadlığı və Jurnalist Peşəkarlığı Koalisiyası "Etik jurnalistikanın inkişaf etdirilməsi" mövzusunda aprelin 7-dən 13-nə qədər Bakı şəhərində Azərbaycan jurnalistləri üçün 2 seminar təşkil edib. Seminarlarda 3 telekanal, 1 radio, 5 informasiya agentliyi, 1 jurnal, 20 qəzet olmaqla ümumilikdə 30 aparıcı kütləvi informasiya vasitəsindən 32 jurnalist iştirak edib.

Beynəlxalq Jurnalistlər Federasiyasından olan iki beynəlxalq ekspert (Richard Cookson və Kevin Burden) yerli jurnalistlərə jurnalistikanın etik prinsipləri haqqında məşğələlər keçiblər. Bu sahədə olan mövcud beynəlxalq təcrübələrə istinad olunub. Məşğələlərdə müxtəlif praktiki tapşırıqlar yerinə yetirilib.

Layihə koordinatoru və Jurnalistlərin Həmkarlar İttifaqının (JuHİ) sədri Müşfiq Ələsgərlinin sözlərinə görə, təlimin məqsədi Azərbaycan jurnalistlərini etik jurnalistikanın fundamental prinsipləri ilə tanış etməkdir - hansılar ki, bütün dünyada jurnalistlər tərəfindən qəbul edilir və çətin vəziyyətlərdə bu prinsiplərin necə yararlı olmasını tədqiq etmək məqsədi daşıyır: "Təlim, həmçinin, iştirakçıların mövcud bacarıqlarını təkmilləşdirmək və onları yeni bacarıqlarla təmin etmək məqsədi daşıyır. Belə ki, bu bacarıqlarla onlar işlərində qarşılaşa biləcəkləri problemlərlə tez, effektiv və həssaslıqla məşğul ola bilərlər. Mən inanıram ki, siyasiləşmənin müstəqil jurnalistikaya mane olduğu indiki dövrdə, jurnalist etikası sahəsində maarifləndirməyə çox ehtiyac var". Qeyd edək ki, Söz Azadlığı və Jurnalist Peşəkarlığı Koalisiyasına Jurnalistlərin Həmkarlar İttifaqı, Demokratik Jurnalistlər Liqası, Beynəlxalq Avrasiya Mətbuatı Fondu və "Ruh" Jurnalistlərin Hüquqlarının Müdafiəsi Komitəsi daxildir.

Naibə

Həftə içi.- 2011.- 16-18 aprel.- S. 15.