"Dağlıq Qarabağ münaqişəsinin ədalətli həllində hamının xeyri var"

Əhməd Davudoğlu: "Medvedevin prosesdə şəxsən iştirakı ruhlandırır və bu dəstəklənməlidir"

"Dağlıq Qarabağ münaqişəsinin həllində biz əsas diqqəti hərbi ssenarilərə yox, sülh danışıqlarına yönəltməliyik. Məqsədimiz Cənubi Qafqazda hərtərəfli və möhkəm sülh almosferi yaratmaqdır" - bu fikirləri Türkiyənin xarici işlər naziri Əhməd Davudoğlu "Arminfo"ya müsahibəsində səsləndirib. O, Qarabağda müharibə olacağı təqdirdə ölkəsinin hansı mövqeyi sərgiləyəcəyinə dair sualın cavabında deyib ki, münaqişənin həllində maraqlı olan bütün oyunçular tərəflərin mövqelərini yaxınlaşdırmaq üçün bütün səylərini birləşdirməlidirlər:

"Qafqazı çiçəklənən bölgəyə çevirmək istiqamətində regional tərəfdaşlığa imkan verəcək iqlimi yaxşılaşdırmağa ciddi ehtiyac var". Davudoğlu Qarabağdakı müharibənin qonşu ölkələri də əhatələyəcəyi ilə bağlı səsləndirilən fikirlərə münasibət bildirib. Onun sözlərinə görə, bu cür fikirlər tək danışıqlar prosesinin aparılmasına yox, eləcə də Minsk Qrupu və digər iştirakçıların sülhün əldə olunması istiqamətində səylərinə zərər verir: "Biz dialoqun aparılması səylərində inadkar olmalı, danışıqlar prosesindəki açıqlığı qorumalıyıq". Türkiyənin XİN başçısı Rusiya prezidenti Dmitrii Medvedevin təşəbbüsü ilə reallaşdırılan Əliyev-Sarkisyan görüşlərindən də danışıb. Bildirib ki, Dağlıq Qarabağ münaqişəsinin hələ də həll edilməməsi bölgədə sabitlik, sülhün əldə olunmasında başlıca maneə olaraq qalmaqdadır. Minsk Qrupu 20 il ərzində münaqişənin sülh yoluyla həll edilməsinə təkan verməyə çalışıb: "Biz onların səylərini dəstəkləyirik. Ankara həmçinin hesab edir ki, regional güc kimi Rusiya da Minsk Qrupunun həmsədri məsuliyyətini nəzərə alaraq konstruktiv rol oynayır. Düşünürük ki, prezident Medvedevin şəxsi iştirakı ruhlandırıcı təsir bağışlayır və dəstəklənməlidir. Bu baxımdan, martın 5-də Soçidə reallaşdırılan üçtərəfli görüşün danışıqlar prosesində irəliləyişə doğru növbəti addım olacağına ümid edirik". Davudoğlu Soçi bəyannaməsini alqışladıqlarını da söyləyib.

"İlk baxışda Dağlıq Qarabağ münaqişəsi və Türkiyə-Ermənistan münasibətlərinin normallaşdırılması ayrı-ayrı proseslər kimi görünür. Hər birinin öz dinamikası və danışıqlar meydanı var. Biz bunu inkar etmirik. Lakin bu iki proses arasındakı qarşılıqlı əlaqə danılmazdır" - bu fikirləri isə Davudoğlu Türkiyə ilə Ermənistan arasındakı münasibətlərin normallaşdırılması prosesi ilə bağlı sualın cavabında səsləndirib. Onun sözlərinə görə, tərəflər bu iki prosesin bir-birinə gücləndirici təsir effekti verməsini qoruyub saxlamalıdırlar. Belə ki, bir prosesdəki müsbət addım o birinə də müsbət təsir göstərəcək: "Türkiyə Ermənistanla münasibətlərin normallaşdırılması prosesində açıq və adildir. Eyni zamanda, Dağlıq Qarabağ münaqişəsinin həlli ilə bağlı danışıqların dalana dirənməsindən çıxması da bütün tərəflərin böyük mənada maraqlarına cavab verir. Bölgədə yaşayan insanlar bir şeyi dərk etməlidirlər. Bu münaqişənin həllinin ümumi xeyri var. Biz beynəlxalq birliyi də fəaliyyətini gücləndirməyə çağırırıq".

Azad

Həftə içi.- 2011.- 21 aprel.- S. 1-2.