Badamdar Mədəniyyət Evi - səsli-küylü məkan

Fəridə Babayeva: "Yeni dərs otaqlarının tikilməsinə ehtiyacımız var"

Hər bir millət özünün mədəniyyəti ilə seçilir. Bir sözlə, mədəniyyətinə, milli musiqisinə, dünyabaxışına görə dünyanın hər bir yerində o millət rəğbətlə qarşılanır. İçindən böyük ziyalılar, incəsənət xadimləri, dahi şəxsiyyətlər yetişir.

Bütövlükdə dünyanın inkişaf etmiş ölkələri arasında özünə xüsusi yer alır. Ölkəmizdə tarixi şəxsiyyətləri, incəsənət xadimlərini yetişdirən və onları yeniyetmə vaxtlarından axtarıb üzə çıxaran məkanlar musiqi təhsil ocaqları və mədəniyyət evləridir. Belə mədəniyyət evlərindən biri də Səbail rayonunun Badamdar qəsəbəsində fəaliyyət göstərən və tarixi 1957-ci ilə çıxan Badamdar Mədəniyyət Evidir.

Məlum Qarabağ hadisələrinin acı nəticələri adıçəkilən mədəniyyət evindən də yan ötməyib. Belə ki, bu bina 1993-cü ilin sentyabrında öz doğma yurd - yuvalarından qovulan, Ağdam rayonundan olan məcburi köçkünlərin sığınacağına çevrilib. Köçkünlər 2009-cu ilə qədər həmin mədəniyyət evində məskunlaşıblar. Və 2009-cu ildə, Səbail Rayonu İcra Hakimiyyətinin köməyi nəticəsində məcburi köçkünlər yaşayış evlərinə köçürülüb, həmin mədəniyyət evi isə əsaslı təmir edilib. Ötən ildən isə mədəniyyət evi işçilərin və Badamdar sakinlərinin ixtiyarına verilib. Adıçəkilən mədəniyyət evi öz iş prinsipi ilə seçilərək, qəsəbə sakinlərinə mədəni xidmət göstərməkdədir. Bu məkanda heç zaman sakitlik olmur. Hər gün hər hansı bir mədəniyyət, ədəbiyyat adamının, tarixi şəxsiyyətin yaradıcılığı, həyatı və irsi barədə tədbirlər təşkil edilir. Badamdar mədəniyyət evi sakinlərin, xüsusilə gənclərin və məktəblilərin sevdiyi ünvana çevrilib. Qəsəbə sakinləri mədəniyyət evinin iş prinsipindən və direktor Fəridə Babayevanın işgüzarlığından ağızdolusu danışırlar.

Mədəniyyət evinin direktoru Fəridə Babayeva bizimlə söhbətində bildirdi ki, iki ali məktəb qurtarıb. 1986-cı ildə indiki Bakı Dövlət Universitetinin kimya fakültəsini, 1990-cı ildə Mirzağa Əliyev adına Azərbaycan Dövlət İncəsənət İnstitutunun aktyorluq fakültəsini bitirib. 2009-cu ildə teatrşünaslıq üzrə müdafiə edərək, sənətşünaslıq üzrə fəlsəfə doktoru adına layiq görülüb.

F.Babayeva həmçinin bildirdi ki, mədəniyyət evinə 2001-ci ildən rəhbərlik edir: "Mədəniyyət evinin binası müasir tələblər səviyyəsində təmir edilib. 7 dərs otağından, foyedən, zal, səhnə və müxtəlif kabinetlərdən ibarətdir. Eyni zamanda, mədəniyyət evində bir çox dərnək, "Şən uşaqlar" rəqs kollektivi, "Xarı bülbül" xalq çalğı alətləri ansamblı, poeziya dərnəyi, xalq teatrı fəaliyyət göstərir. Dram dərnəyi 1993-cü ildən Mədəniyyət və Turizm Nazirliyinin qərarı əsasında "Xalq teatrı" adını alıb. Teatrımızda bu günə qədər, çoxlu sayda tamaşa oynanılıb. Buna misal olaraq, H.Cavidin "Afət", "İblis", S.Vurğunun "Vaqif", "İnsan", Elçinin "Qabil", N.Dunbadzenin "Mən, nənəm-İlko və İlaryon", Cek Londonun "Varlı qızları", Ş.Xeyrullayevanın "Tut" tamaşalarını misal göstərmək olar. 2008-ci ildə keçirilən ümumrespublika xalq teatrına baxış müsabiqəsində iştirak edən xalq teatrımızın aktyoru N.Qasımov Elçinin "Qabil" əsərində ən yaxşı kişi rolunun ifasına görə mükafatlandırıldı. Teatra özüm rəhbərlik edirəm. Biz, əsasən teatra həvəskar və istedadlı yeniyetmələri, o cümlədən, ali təhsil ocaqlarında təhsil alan tələbələri dəvət edirik. 18 apreldə Bakı şəhərində keçirilən xalq teatr festivalına Ş.Xeyrullayevanın "Tut" tamaşası ilə qatılmışıq".

F.Babayeva həmçinin vurğuladı ki, mədəniyyət evində fəaliyyət göstərən xalq çalğı alətləri ansamblına Xəyyam Nəbiyev rəhbərlik edir: "Ansamblın tərkibində istedadlı yetirmələr çalışır. Əksər gənclər muğam ifaçılarıdır. Ansamblımız Bakı və respublika üzrə keçirilən müsabiqələrdə yaxından iştirak edərək dəfələrlə qalib olublar. "Şən uşaqlar" rəqs kollektivində isə 6-16 yaş arasında olan uşaqlar çalışır. Rəqs kollektivi istedad müsabiqələrinin qalibi olub. Həmçinin ANS telekanalında keçirilən "Yallı" rəqs müsabiqəsində öncül yerlərdən birini tutub".

Müsahibim onu da bildirdi ki, poeziya dərnəyinə də özü rəhbərlik edir: "Dərnəyin 12 nəfər üzvü var. Biz qəsəbədə fəaliyyət göstərən 236 və 239 saylı məktəblərin istedadlı uşaqlarını seçərək dərnəyə cəlb etməyə çalışırıq. Mədəniyyət evində bir çox teatrla ilə sıx əlaqə yaradılıb. Buna misal olaraq, Bakı Uşaq Teatrını misal göstərmək olar. Qeyd edim ki, bu teatrın aktyorları tez-tez bizim qonağımız olur, Badamdar məktəbliləri üçün tamaşalar göstərirlər. Bundan başqa, Badamdar qəsəbəsində fəaliyyət göstərən kitabxana ilə olan əməkdaşlığımızdan da çox razıyam. Badamdar kitabxanası ilə birlikdə tez-tez tədbirlər və görüşlər keçiririk. Bundan əlavə, qəsəbədəki parkda hər il müxtəlif mövzuları əhatə edən sərgilər təşkil edirik. Yeri gəlmişkən bildirim ki, rəhbərlik etdiyim mədəniyyət evi Gül bayramı, 9 may - Qələbə günü, 28 May - Respublika günü ilə bağlı tədbirlərə hazırlaşır. Biz qəsəbədə yerləşən "N" saylı hərbi hissənin əsgərləri ilə də sıx əlaqə saxlayırıq. Onlarla görüşlər təşkil edirik. Bu il də ordu günü ilə bağlı cəbhə bölgəsinə getməyi planlaşdırmışıq".

Mədəniyyət evinin direktoru problemlərdən də söhbət açdı. Bildirdi ki, mədəniyyət evində dərs otaqları azlıq təşkil edir: "Yaxşı olardı ki, mədəniyyət evinin boş olan həyətyanı sahəsində əlavə olaraq rəqs otaqları, yaradıcılıq kabinetləri tikiləydi".

Qələndər Xaçınçaylı

Həftə içi.- 2011.- 21 aprel.- S. 7.