Sahibkarlığın inkişafına daha bir dəstək

Bu gün korrupsiya, rüşvətxorluq və digər neqativ hallara qarşı mübarizə Azərbaycan hökumətinin həyata keçirdiyi siyasətin strateji istiqamətlərindən biridir. Artıq sözügedən məsələdə müsbət dəyişikliklərə imkan verəcək mükəmməl hüquqi baza formalaşdırılıb, şəffaflığın artırılması və korrupsiyaya qarşı mübarizə üzrə milli strategiya və fəaliyyət planı təsdiq olunub.

Eyni zamanda Korrupsiyaya qarşı Mübarizə üzrə Komissiya, Baş Prokuror yanında Korrupsiyaya qarşı Mübarizə İdarəsi və digər müvafiq qurumlar bütün gücləri ilə fəaliyyətlərini davam etdirirlər. Ümumiyyətlə, cəmiyyətin istənilən sahələrində, o cümlədən iqtisadi sektorda rüşvətxorluğa və korrupsiyaya qarşı daha ciddi sistemli mübarizənin aparılması üçün konkret istiqamətlər müəyyənləşdirilib, aidiyyəti qurumlar qarşısında mühüm vəzifələr qoyulub. Məhz Prezident Administrasiyasının rəhbəri, Korrupsiyaya qarşı Mübarizə üzrə Komissiyanın sədri Ramiz Mehdiyevin də son çıxışlarında ölkəmizdə korrupsiyaya qarşı effektiv işlərin görüldüyü, iqtisadiyyatın bir sıra sahəsinə və özəl sektora süni müdaxilələrin qarşısının alınması yönündə zəruri addımlar atıldığı vurğulanır. Təbii ki, bütün bu işlər ölkə başçısının göstərişi əsasında həyata keçirilir və ayrı-ayrı qurumlar tərəfindən rüşvətxorluğa qarşı mübarizənin formal xarakter daşımaması xüsusi olaraq önə çəkilir.

Özünü doğrultmayan məmurlar işdən kənarlaşdırılır

Qeyd edək ki, adıçəkilən komissiyanın məlum iclasından sonra ayrı-ayrı nazirlik və komitələr hərəkətə keçib. Artıq müvafiq qurumların struktur bölmələrində islahatlara başlanılıb, işində nöqsanlara yol verən xeyli sayda məmur vəzifəsindən kənarlaşdırılıb, bəzilərinə isə ciddi töhmət verilib.

Bundan başqa, nazirliklərdə keçirilən operativ müşavirələrdə iqtisadiyyatdakı inhisarçılıq meyillərinin qarşısının alınması, azad rəqabət mühitinin yaradılması, müvafiq icra hakimiyyəti orqanları tərəfindən aparılan əsassız yoxlamalara son qoyulması, rüşvətxorluğa və korrupsiyaya qarşı daha ciddi və sistemli mübarizə aparılması aidiyyəti dövlət orqanlarının əsas vəzifəsi kimi qarşısına qoyulduğu vurğulanıb. Digər tərəfdən ayrı-ayrı qurumların struktur bölmələrində şəffaflığın artırılması üçün işçilərə müvafiq göstərişlər verilib. Eyni zamanda vətəndaş, o cümlədən sahibkar müraciətlərinə mahiyyəti üzrə baxılması və onların vaxtında, düzgün cavablandırılması məsələsi üzərində dayanan nazirlər bu sahədəki mövcud nöqsanların tamamilə aradan qaldırılması məqsədilə zəruri tapşırıqlarını veriblər. Məsələn, İqtisadi İnkişaf Nazirliyinin rəhbərliyi sahibkarlarla bilavasitə işləyən qurumları öz vəzifə öhdəliklərini icra edərkən şəffaflığın tam təmin edilməsinə nail olmağa, onların üzləşdiyi problemlərə həssaslıqla yanaşmağa, sahibkarların maraqlarının təmin olunması istiqamətində fəaliyyətlərini gücləndirməyə çağırıb.

Əmlak Məsələləri Dövlət Komitəsinin sədri Kərəm Həsənov isə öz işçiləri qarşısında özəlləşdirmə və hərracların təşkili prosesində şəffaflığın təmin edilməsini, sənədləşdirmədə rüşvət hallarına yol verilməməsini, daxil olan müraciətlərin operativ şəkildə cavablandırılmasını əsas vəzifə kimi qoyub. Maliyyə Nazirliyinin rəhbərliyi də vəzifə səlahiyyətlərindən sui-istifadə edən işçilərinə xəbərdarlıq edərək onlara fəaliyyətlərində dönüş yaratmaq barədə göstəriş verib.

Ekspertlərin qənaətincə, bütün bunlar onu göstərir ki, Azərbaycan hökuməti ölkədə iqtisadi mühitin yaxşılaşdırılmasında, inhisarçı meyillərinin aradan qaldırılmasında və sahibkarların hüquqlarının qorunmasında maraqlıdır. Mütəxəssislər həmçinin sahibkarlıq fəaliyyəti ilə məşğul olanlara qarşı kənar müdaxilələrin aradan qaldırılmasının iş adamlarının psixoloji durumuna müsbət təsir göstərəcəyini də bildirirlər.

"Hökumət qərarlıdır"

Milli Məclisin iqtisadi siyasət komitəsinin üzvü, millət vəkili Vahid Əhmədov da bu istiqamətdə həyata keçirilən işləri müsbət qiymətləndirir. Onun sözlərinə görə, hökumətin atdığı addımlar neqativ halların aradan qaldırılmasında qərarlı olduğunu göstərir: "Əslində ölkə prezidentinin iştirakı ilə Nazirlər Kabinetinin iclasında da məsələ ciddi şəkildə müzakirə edilib, dövlət başçısı bununla bağlı nazirlərə müvafiq göstərişlər verib. Daha sonra Prezident Administarasiyanın rəhbəri Ramiz Mehdiyevin son tapşırıqları ayrı-ayrı qurumları hərəkətə gətirdi. Ümumiyyətlə isə korrupsiyaya qarşı müxtəlif qurumların yaradılması, hüquqi bazanın formalaşdırılması onu deməyə əsas verir ki, hökumət bu işdə, doğrudan da, qərarlıdır və neqativ hallara qarşı mübarizəni sona qədər aparmaq niyyətindədir. Digər tərəfdən hazırda ölkədə sahibkarlığın inkişafı məqsədilə biznes mühitinin yaxşılaşdırılması, bu sahədə qanunvericilik bazasının təkmilləşdirilməsi, yerli və xarici investisiyaların, qabaqcıl texnologiyaların, müasir tələblərə cavab verən müəssisələrin yaradılması, yüksək keyfiyyətli, rəqabət qabiliyyətli məhsulların istehsal edilməsi Azərbaycanın müəyyən etdiyi iqtisadi inkişaf strategiyasının əsasını təşkil edir. Bundan başqa, sahibkarlıq fəaliyyətinə mane olan bürokratik əngəllərin və yoxlamaların aradan qaldırılmasına yönəldilmiş bir sıra sənəd qəbul olunub. Amma biz yenə də həm yerli, həm də xarici investorların ayrı-ayrı qurumlar tərəfindən incidilməsi, əsassız yoxlamalara məruz qalması halları ilə rastlaşırıq. Təbii ki, bütün bunların aradan qaldırılması üçün kompleks tədbirlər həyata keçirilməlidir. Yəni yalnız bir qurumun fəaliyyətində dönüş yaratmaqla problemi aradan qaldırmaq qeyri-mümkündür. Bu baxımdan hazırda sahibkarlıq subyektləri ilə işləyən bütün nazirlik və komitələrin prosesə cəlb edilməsi təqdir olunmalıdır".

Maliyyə vəsaitlərinə çıxış imkanı artırılmalıdır

Millət vəkili məhz bu məsələdə Sahibkarlığa Kömək Milli Fondunun fəaliyyətində şəffaflığın tam şəkildə təmin olunmasını zəruri sayır: "Hesab edirəm ki, sahibkarların maliyyə vəsaitlərinə çıxış imkanlarının genişləndirilməsi istiqamətində əlavə tədbirlər görülməli, bu sahədə yeni təkliflər hazırlanmalıdır. Digər tərəfdən ictimai nəzarətin gücləndirilməsi məqsədilə sahibkarların maarifləndirilməsi, hüquqi biliklərinin artırılması yönündə müvafiq işlər daha da sürətləndirilməli, özəl sektor üçün korrupsiya riskləri və onların aradan qaldırılmasına dair davamlı proqramlar həyata keçirilməlidir".

V.Əhmədov ölkədə biznes mühitinin yaxşılaşdırılması üçün sahibkarlıq fəaliyyətini tənzimləyən qanunvericilik aktlarının təkmilləşdirilməsinin də vacib olduğunu bildirir: "İlk növbədə sahibkarların hüquqlarının müdafiəsinin gücləndirilməsi, əsassız yoxlamaların qarşısının alınması, sahibkarlıq fəaliyyəti ilə məşğul olmaq üçün tələb olunan icazəverici sənədlərin, onların verilmə prosedurlarını tənzimləyən qanunvericiliyin inventarlaşdırılması üzrə təkliflər hazırlanmalıdır. Bundan başqa, sözügedən sahədə mövcud olan paralelliyin aradan qaldırılması, lisenziyaların və icazələrin verilməsi zamanı dövlət qurumları ilə sahibkarlar arasında birbaşa təmasın minimuma endirilməsi məqsədilə informasiya texnologiyalarının geniş tətbiq olunması kimi istiqamətlər də müəyyənləşdirilməlidir".

İnhisarçılıq meyilləri azalacaq və...

Millət vəkili hökumətin başladığı tədbirlərin nəticəsinin yaxın vaxtlarda cəmiyyətdə hiss olunacağını da söyləyir. Onun dediyinə görə, həyata keçirilən islahatlar həm də istehsal müəssisələrinin daha da canlanmasına şərait yaradacaq: "Düzdür, dünyanın istənilən yerində rüşvət və korrupsiya hallarına rast gəlinir. Amma bizim ölkə müstəqilliyinin 20 illiyinə hazırlaşdığından belə neqativ faktorlar aradan qaldırılmalıdır. O ki qaldı sahibkarlara xeyri olub-olmamasına onların əlavə xərclərdən, süründürməçilikdən canları qurtaracaq. Həmçinin bazarda inhisarçılıq meyillərini azaldacaq ki, bu da məhsul bolluğu ilə nəticələnəcək və qiymətlər istər-istəməz aşağı düşəcək.

V.Əhmədov ictimaiyyətin, vətəndaşların da korrupsiya, rüşvətxorluqla mübarizədə fəallıq göstərməli olduğunu və müvafiq qurumlara lazımi dəstək verməsinin zəruriliyini vurğulayır: "Əhali bu işə biganə yanaşmamalı və hansısa qurumda, idarədə qarşılaşdığı neqativ hallarla bağlı lazımi instansiyalara məlumat verməlidir".

Sevinc

Həftə içi.- 2011.- 5-7 fevral.- S. 13.