Həmsədrlər Bakıdadır

Dağlıq Qarabağ münaqişəsinin nizamlanmasında vasitəçilik missiyasını üzərinə götürmüş ATƏT-in Minsk qrupunun həmsədrləri Robert Bradtke (ABŞ), İqor Popov (Rusiya), Bernar Fasye (Fransa) və ATƏT-in fəaliyyətdə olan sədrinin şəxsi nümayəndəsi Anjey Kasprşik (Polşa) bu gün Azərbaycana gəliblər. Fransadan olan həmsədr Bernar Fasye hava limanında jurnalistlərə bildirib ki, həmsədrlər və ATƏT-in fəaliyyətdə olan sədrinin şəxsi nümayəndəsi sabah prezident İlham Əliyev, xarici işlər və müdafiə nazirləri ilə görüşəcəklər. Diplomat deyib ki, səfər missiyası tam başa çatmadığı, Azərbaycan prezidenti İlham Əliyevlə görüşmədiklərinə görə səfər barədə hər hansı şərh vermək istəmirlər. Bernar Fasye Ermənistanda prezident Serj Sarkisyan, xarici işlər naziri Edvard Nalbandyan və müdafiə naziri Seyran Ohanyanla görüşdüklərini deyib. Qeyd edək ki, vasitəçilərin regiona səfəri fevralın 9-da başlayıb.

ATƏT-in Minsk qrupunun həmsədrlərinin regiona səfəri çərçivəsində Xankəndiyə baş çəkmələri nəzərdə tutulsa da, bu, baş verməyib. "Azadlıq" radiosunun Ermənistan bürosunun verdiyi məlumata görə, buna səbəb hava şəraitinin pis olmasıdır. Nəticədə Ermənistanda görüşləri başa vuran vasitəçilər oradan birbaşa Azərbaycana gəlib. Ermənistanda onlar son olaraq müdafiə naziri Seyran Ohanyanla görüşüb. Nazir həmsədrlərə qoşunların təmas xəttindəki son vəziyyət haqda məlumat verib. O, erməni tərəfinin "atəşkəs rejiminə əməl etdiyini" iddia edib, "Azərbaycan snayperlərinin fəaliyyətindən narahat olduqlarını" söyləyib.

Azad

Həftə içi.- 2011.- 11 fevral.- S. 1.