"Korrupsiya ilə mübarizədə alimlərin təcrübəsi öyrənilsin"

Milli Elmlər Akademiyasının (AMEA) Rəyasət Heyətinin korrupsiyaya qarşı mübarizə ilə bağlı növbədənkənar iclası keçirilib. Akademiyanın prezidenti Mahmud Kərimov korrupsiyaya qarşı mübarizənin ölkənin prioritet istiqamətlərindən olduğunu qeyd edib və bu istiqamətdə ölkə başçısı tərəfindən "Şəffaflığın artırılması və korrupsiyaya qarşı mübarizə üzrə Milli Strategiya (2007-2011-ci illər)" və Fəaliyyət Planının təsdiq edildiyini, qanunvericilik və iqtisadi sistemlərdə, eləcə də idarəetmədə icra mexanizmlərinin təkmilləşdirilməsi, dövlət strukturlarının fəaliyyətinin şəffaflığı, vəzifəli şəxslərin məsuliyyətinin artırılması, qanunun aliliyi və sosial ədalət kimi fundamental əsasların qorunub saxlanması istiqamətlərində mühüm islahatların həyata keçirildiyini deyib. O, AMEA-nın sosioloji və hüquqi, həmçinin iqtisadi sahələrində əldə olunan mütərəqqi elmi-nəzəri təcrübələrin korrupsiyaya qarşı mübarizədə tətbiq edilməsi, aidiyyatı dövlət qurumları ilə qarşılıqlı elmi-praktiki əməkdaşlığın dərinləşdirilməsi, elmi araşdırma, ekspertiza, təhlil, proqnozlaşdırma, təbliğat, mütəxəssis hazırlığının səmərəliliyinin yüksəldilməsi imkanlarına malik olduğunu, korrupsiyaya qarşı mübarizədə elmin bilavasitə iştirakının zəruriliyini qeyd edib. Daha sonra AMEA tərəfindən hazırlanmış korrupsiyaya qarşı mübarizə tədbirləri haqqında qərar layihəsi tədbir iştirakçılarının nəzərinə çatdırılıb. AMEA-nın Maliyyə-iqtisad şöbəsinin rəisi Zakir Nəcəfov subyektiv səbəblərdən elmi müəssisələrin fəaliyyətində normativ hüquqi sənədlərin düzgün tətbiq olunmadığını və ya nöqsanlara yol verildiyini, həmçinin beynəlxalq əlaqələrin gücləndirilməsində və büdcədənkənar gəlirlərin istifadəsində, ekspedisiya işlərinin sərbəst aparılmasında yaranan problemləri tənzimləmək üçün normativ hüquqi sənədlərin təkmilləşdirilməsinin zəruriliyini diqqətə çatdırıb. AMEA İnformasiya Texnologiyaları İnstitutunun direktoru Rasim Əliquliyev isə bildirib ki, hazırlanmış qərar layihəsində əsas məqsəd AMEA-nın fəaliyyətində korrupsiya yarada biləcək mühitin təhlil edilməsi, ölkədə və cəmiyyətdə baş verə biləcək korrupsiya proseslərinin analiz olunması, bu proseslərin qarşısının alınmasına elmi dəstək göstərilməsidir: "Bəzi qanunların, normativ-hüquqi bazanın yenidən təhlil edilməsi, sənədləşdirmə prosesində yaranan problemlərin müasir tələblərə cavab verən yeni texnologiyaların tətbiqi ilə aradan qaldırılması vacibdir. Ölkədə korrupsiya hallarının qarşısının alınması üçün hakimiyyət orqanlarının fəaliyyətində İT-nin tətbiqi, sosial şəbəkələrdən, internetdən istifadə zəruridir".

Naibə

Həftə içi.- 2011.- 11 fevral.- S. 6.