"İrs" rəhbəri qızıl medal aldı

Sidqi Mustafayev: "Bu mükafat həm də ansambla verilən qiymətdir"

"İrs" folklor ansamblının yaranmasının 35 illiyi və onun bədii rəhbəri, məşhur tarzən Sidqi Mustafayevin anadan olmasının 70 illik yubileyi ilə bağlı AMEA Folklor İnstitutunun binasında tədbir keçirilib. Tədbirdə natiqlər çıxış edərək "İrs"in keçdiyi yoldan və onun yaradıcısı Sidqi müəllimin fəaliyyətindən söz açdılar.

Çıxış üçün söz "Avropa" nəşr evinin direktoru, fəlsəfə elmləri doktoru Şöhrət Səlimbəyliyə verildi. Ş.Səlimbəyli bildirdi ki, görkəmli tarzən S.Mustafayevin milli-mənəvi dəyərlərin qorunub-saxlanmasında, qədim musiqi alətlərinin bərpa olunmasında xidmətləri böyükdür: "Ölkədə keçirilən kütləvi tədbirlərdə yaxından iştirakına, cəmiyyətdəki fəal, ziyalı mövqeyinə, folklor ansamblının, eləcə də mədəni ocaqların müasir tələblər işinin qurulmasında dəyərli elmi təkliflərinə, vətəninə sonsuz sevgisinə görə, ümummilli lider Heydər Əliyev ideyalarının sədaqətlə yerinə yetirilməsində və ölkə mədəniyyətinin, folklorunun inkişafına görə, S.Mustafayev "Avropa" nəşr evinin qızıl medalı ilə təltif edilib".

Sonra adıçəkilən qurumun rəhbəri həmin medalı məşhur tarzənə təqdim etdi. "İrs"in solisti Mehman Hacıbəyli 30 ildir bu ansamblda çalışdığını dedi: "Ürəyim dağa döndü, fərəhləndim. Sidqi müəllim nəhəng adamdır. O nəinki qızıl medala, hətta xalq artistinə, prezident təqaüdünə layiq adamdır".

Digər solist Novruz Qafarov Sidqi müəllimlə 20 ildir işlədiyini dedi: "Folklorun inkişafında onun xidmətləri böyükdür. Xalqımızın keçmişinə, irsinə xidmət edir. Bir sözlə, adət-ənənəmizi yaşadan sənətkardır. Sidqi müəllimin əməyi dövlət tərəfindən qiymətləndirilməlidir".

Muğam festivalının iştirakçısı Ülviyyə Rəhimova (Sədaqət): "Bu ansamblın gənc üzvüyəm. Sidqi müəllim xalq artisti adına, şöhrət ordeninə layiq adamdır. Arzu edirəm ki, böyük sənətkar tezliklə öz layiqli adını alsın".

Qocaman mədəniyyət işçisi Aşur Adıgözəlov S.Mustafayevi "İrs"in araşdırıcısı, bələdçisi kimi tanıyır. Tədbirin sonunda yubilyara da söz verildi: "Mənə verilən yüksək qiymətə görə "Avropa" nəşr evinin rəhbərliyinə, Folklor İnstitutunun rəhbərliyinə, o cümlədən tədbir iştirakçılarına öz dərin təşəkkürümü bildirirəm. Bu mükafat təkcə mənim əməyimə yox, "İrs" folklor ansamblının kollektivinin əməyinə verilən qiymətdir. Çalışacağıq ki, bu yüksək etimadı həmişə doğruldaq".

Qələndər Xaçınçaylı

Həftə içi.- 2011.- 18 fevral.- S. 5.