İqtisadi İnkişaf Nazirliyində korrupsiyaya qarşı tədbirlər gücləndirilib

Həmişə prioritet olan məsələlərin tez və maneəsiz həyata keçirilməsi sürətlənib

Məlum olduğu kimi, Azərbaycan hökuməti korrupsiya və bu kimi neqativ hallarla mübarizə ilə bağlı müvafiq qurumlara tapşırıqlar verib. Prezident Adminstrasiyasının rəhbəri, Korrupsiyaya Qarşı Mübarizə üzrə Komissiyanın sədri Ramiz Mehdiyevin də ölkədə korrupsiyaya qarşı təcili tədbirlərin görülməsi barədə göstərişlərindən sonra müvafiq qurumlar tərəfindən zəruri tədbirlərin həyata keçirilməsi üçün əməli işlərə başlanılıb.

Nəinki yerli ekspertlər, eləcə də xarici təşkilatların nümayəndələri bu məsələdə bir daha Azərbaycan hökumətinin insan haqlarının qorunmasında maraqlı olduğunu göstərdiyini vurğulayırlar.

Avropa Şurasının Korrupsiyaya qarşı Dövlətlər Qrupunun (GRECO) icraçı katibi Volfqanq Rau da Azərbaycanda korrupsiya ilə mübarizə sahəsində yeni təşəbbüsləri müsbət qiymətləndirdiklərini deyib. O, təmsil etdiyi qurumun bu səyləri yalnız alqışladığını bildirib: "Korrupsiya ilə mübarizəyə yönəlmiş istənilən təşəbbüsü biz yalnız alqışlaya bilərik. GRECO öz hesabatlarında dəfələrlə Azərbaycanın "Şəffaflığın artırılması və korrupsiyaya qarşı mübarizə üzrə Milli Strategiyanın" (2007-2011-ci illər) qəbul olunmasını müsbət qiymətləndirib və qurumun verdiyi tövsiyələrə uyğun olaraq, həyata keçirilmiş bəzi konkret irəliləyişlərdən məmnunluğunu bildirib. Bu, əsasən korrupsiya hallarını araşdıran hökumət nümayəndələrinin iş metodlarının və vasitələri, korrupsiyanın qarşısının alınması sahəsində dövlət qulluqçularının hüquq və vəzifələrini, o cümlədən 2007-ci ilin may ayında qəbul edilən vəzifəli şəxslərin etik qaydalarını nəzərdə tutan xüsusi normativ əsaslar və çirkli pulların yuyulmasına qarşı mübarizənin mexanizmləri kimi vacib məsələlərdir". İcraçı katib bildirib ki, Azərbaycan korrupsiya əməllərini təqib etmək, onları aşkara çıxarmaq və təhqiqat aparmaq sahəsindəki fəaliyyətini daha da artırmalıdır. Xatırladaq ki, iki həftədən artıqdır müxtəlif nazirlik və komitələrdə kollegiya iclasları keçirilir və konkret sahələr üzrə müvafiq tapşırıqlar verilir. Verilən tapşırıqların necə icra olunması üçün müraciət etdiyimiz rəsmi qurumlardan biri də İqtisadi İnkişaf Nazirliyi (İİN) oldu.

Bürokratik əngəllər aradan qaldırılır

Nazirliyin mətbuat xidmətinin rəhbəri Abbas Əliyev bildirdi ki, nazirlikdə keçirilən iclasdan sonra zəruri işlərin görülməsinə başlanılıb: "Korrupsiyaya qarşı mübarizə Azərbaycan hökumətinin başlıca strateji məqsədlərindən biridir. Bu sahədə görülmüş ciddi tədbirlər nəticəsində qanunvericilik bazası təkmilləşdirilib, "Şəffaflığın artırılması və korrupsiyaya qarşı mübarizə üzrə Milli Strategiya" (2007-2011-ci illər) və Fəaliyyət Planı təsdiq edilib, Korrupsiyaya Qarşı Mübarizə üzrə Komissiya, Baş Prokuror yanında Korrupsiyaya qarşı Mübarizə İdarəsi və digər müvafiq qurumlar yaradılıb, sahibkarlıq fəaliyyətinə mane olan bürokratik əngəllərin və yoxlamaların aradan qaldırılmasına yönəldilmiş bir sıra sənəd qəbul edilib. Bu sənədlərdən və müvafiq prezident fərmanlarından irəli gələrək, "Şəffaflığın artırılması və korrupsiyaya qarşı mübarizə üzrə Milli Strategiya"nın həyata keçirilməsi ilə bağlı Fəaliyyət Planının icrasına dair nazirliyin 2011-ci il üzrə Tədbirlər Planının icrasına başlanılıb. Bundan başqa, nazirliyin sahibkarlarla bilavasitə işləyən qurumları öz vəzifə öhdəliklərini icra edərkən şəffaflığın tam təmin edilməsinə nail olmağa çalışır, onların üzləşdiyi problemlərə həssaslıqla yanaşaraq, sahibkarların maraqlarının təmin olunması istiqamətində fəaliyyətlərini gücləndiriblər".

İstehlakçıların hüquqları qorunur

Nazirliyin Antiinhisar Siyasəti və İstehlakçıların Hüquqlarının Müdafiəsi Dövlət Xidməti inhisarçılıq və süni qiymət artırılması meyllərinin qarşısını almağa çalışaraq, azad rəqabət mühitinin inkişaf etdirilməsi tədbirlərini genişləndirir, istehlakçıların hüquqlarının tam qorunmasını təmin etməklə yanaşı, neqativ halların baş verməməsi üçün nəzarəti gücləndirib. Eyni zamanda xüsusi razılıqların (lisenziya), mənşə sertifikatlarının verilməsinin, idxal-ixrac əməliyyatları üzrə müqavilələrin qeydiyyatının qanunvericiliklə müəyyən olunmuş müddətdə və qaydada həyata keçirilməsinə nəzarət gücləndirilib. Digər dövlət qurumları tərəfindən verilən lisenziyalar barədə məlumatlar müntəzəm olaraq təhlil edilir və aşkar edilən nöqsanların aradan qaldırılması ilə bağlı təkliflər hazırlanır.

"Bu məsələlər həmişə prioritet olub"

Sahibkarlığa Kömək Milli Fondunun fəaliyyəti barədə isə fondun icraçı direktoru Şirzad Abdullayevdən məlumat aldıq. Onun sözlərinə görə, ictimai nəzarətin gücləndirilməsi məqsədilə sahibkarların, istehlakçıların maarifləndirilməsi, hüquqi biliklərinin artırılması istiqamətində müvafiq tədbirlər daha da genişləndirilib. Biznes mühitinin daha da yaxşılaşdırılması, sahibkarlığa dövlət dəstəyinin gücləndirilməsi məqsədilə sahibkarlıq fəaliyyətini tənzimləyən qanunvericilik aktlarının təkmilləşdirilməsi, dövlət nəzarəti tədbirləri, ilk növbədə yoxlamalar zamanı sahibkarların hüquqlarının müdafiəsinin gücləndirilməsi, əsassız yoxlamaların qarşısının alınması, dövlət qurumları ilə sahibkarlar arasında birbaşa təmasın minimuma endirilməsi məqsədilə informasiya texnologiyalarının geniş tətbiq olunması kimi istiqamətlər üzrə təkliflər hazırlanıb və onların icrasına başlanılıb: "Nazirlikdə keçirilən iclasdan sonra ilk öncə sahibkarları maraqlandıran sualların təhlili aparılıb. Bundan sonra həmin istiqamətlər üzrə konkret təkliflər hazırlandı. Təkliflərdən bəziləri ölkədə fəaliyyət göstərən sahibkarlıq subyektlərinin bazarlara çıxışının təmin olunması ilə bağlı idi ki, bunun üçün də müəyyən tövsiyələr hazırlandı. Bundan başqa, nazirin əmri ilə korporativ idarəetmə standartları qəbul olunub və yeniliyin sahibkarlıq subyektlərinin daha da inkişaf etdirilməsinə təkan verəcəyini düşünürük. Korporativ idarəetmə standartları azərbaycan şirkətlərinin üzləşdiyi səhmdarların hüquqlarının pozulması, məlumatın səhmdarlara və geniş ictimaiyyətə açıqlanması kimi korporativ idarəetmə və etibarlıq məsələlərini əhatə edir. Bizim üçün bu məsələlər həmişə prioritet olub, indi isə sadəcə, bu işlərin tez bir zamanda və maneəsiz həyata keçirilməsini sürətləndirmişik".

Naibə Qurbanova

Həftə içi.- 2011.- 18 fevral.- S. 6.