Azərbaycan İranla turizm əlaqələrini genişləndirməlidir

Nizami Cəfərov: "Turizm hərəkatı regiondakı münaqişələrə də təsir göstərə bilər"

Parlamentin Mədəniyyət komitəsinin sədri, Nizami Cəfərov parlamentdə təmsil olunan mətbuat nümayəndələrinə açıqlamasında 2011-ci ilin dövlət başçısı tərəfindən "Turizm ili" elan olunması ilə bağlı bildirdi ki, üç Cənubi Qafqaz ölkəsi arasında gələcəkdə turizm əlaqələrinin yaradılması və genişləndirilməsi lazımdır. Qarabağ münaqişəsinin hələlik həll olunmaması ilə əlaqədar Azərbaycanla işğalçı Ermənistan arasında bu yöndə də əlaqələrin mümkünsüz olduğunu deyən komitə sədri eyni zamanda hesab edir ki, Azərbaycanda, o cümlədən digər Cənubi Qafqaz ölkələrində turizmin inkişafı, turizm mühitinin yaxşılaşdırılması bu regiondakı konfliktlərin, eləcə də Qarabağ məsələsinin çözümünə müsbət təsir göstərə, bu prosesə təkan verə bilər: " Bu regiona gələn turistlərin əksəriyyəti iş, elm, mədəniyyət adamları, dünyanın siyasətinə təsir edə biləcək insanlardır. Onlar bu zaman görə bilərlər və görəcəklər ki, regionda vəziyyət nə yerdədir. Eyni zamanda hər kəsin də bilməsi lazımdır ki, Zaqafqaziya niyə vaxtilə bir ölkə olmaq iddiasındaydı və bu nə üçün azərbaycanlılardan ötrü maraqlıydı. Çünki Zaqafqaziyada, Cənubi Qafqazda, eləcə də ümumən Qafqazda ən çox yayılan xalq azərbaycanlılar idi və azərbaycanlıların ideoloqları, böyük şəxsiyyətləri yaxşı bilirdilər ki, nə cür sərhədlər çəkilir-çəkilsin, yenə də onlar başqa dövlətlərin tərkibinə düşəcəklər. Ona görə biz, əlbəttə, bu yolla - Qafqaz ölkələri arasında turizm əlaqələrini yaratmaqla, əcnəbi turistləri daha əlverişli şərtlərlə buraya cəlb etməklə münaqişələrin, ən əsası Qarabağ konfliktinin həllinə töhfə verə, öz həqiqətlərimizi bir daha təsdiqləyə bilərik". N.Cəfərov həmçinin düşünür ki, Azərbaycanın qonşu İran və Dağıstanla da turizm əlaqələrinin genişləndirilməsinə ehtiyac var: "O mənada ki, xarici turistlər Azərbaycana gələndə rahat şəkildə həm İrana, həm Dağıstana, eləcə də Gürcüstana gedə bilsinlər. Bununla yanaşı, turistlərin rahat şəkildə Ermənistana təzyiq imkanları olsun. Yəni, bu turizm hərəkatının özü Ermənistana bir təzyiq olsun və olmalıdır ki, Zaqafqaziyada, bu Qafqaz evində özlərini normal aparsınlar".

Nahid Canbaxışlı

Həftə içi.- 2011.- 23 fevral.- S. 3.