"Muğam müsabiqəsinə istedadlıların istedadlıları seçilib"

 

Mənsum İbrahimov: "Seçimlər şəffaf aparılıb"

 

Azərbaycanda ikinci respublika muğam müsabiqəsinin birinci mərhələsi artıq geridə qalıb. Xatırladaq ki, Heydər Əliyev Fondunun prezidenti, millət vəkili Mehriban xanım Əliyevanın təşəbbüsü, Heydər Əliyev Fondunun, Təhsil, Mədəniyyət və Turizm nazirliklərinin, Azərbaycan Milli Konservatoriyasının təşkilatçılığı ilə keçirilən ikinci respublika muğam festivalında 20 nəfər gənc istedad mübarizə aparır. Adıçəkilən yarışmanın münsiflər heyətinin üzvü, xalq artisti Mənsum İbrahimovla müsabiqənin gedişi ilə bağlı söhbətləşdik.

- Mənsum müəllim, müsabiqədə iştirak edən 20 iştirakçı neçə nəfərin arasından seçilib?

- Müsabiqədə iştirak etmək üçün 40 gənc ifaçı sənəd verib. Seçim turlarına respublikanın bütün bölgələrindən ifaçılar qatılmışdı. Münsiflər onların arasında yaxşıların yaxşısını seçərək müsabiqəyə vəsiqə verdi. Beləliklə, onların arasından seçilmiş 20 nəfər I tura vəsiqə qazandı. Onu deyim ki, müsabiqənin münsiflər heyətinin tərkibi bundan əvvəl olan müğam müsabiqəsində olduğu kimi qalıb. Bu dəfə də münsiflərdə peşəkar sənətkarlardan Əlibaba Məmmədov, Arif Babayev, Ağaxan Abdullayev, Ramiz Zöhrabov, Səkinə İsmayılova, Nadir Axundov və mən təmsil olunuram.

- Müsabiqənin birinci turu geridə qaldı, ancaq bu dəfə heç kim müsabiqədən uzaqlaşdırılmadı. Növbəti tur nə vaxt olacaq?

- Öncə onu deyim ki, müğam müsabiqəsinin bir özəl cəhəti var. Burada qaliblər sms-lə deyil, yalnız peşəkar münsiflərin rəyi ilə müəyyən olunacaq. Müsabiqənin gedişatı "Mədəniyyət" kanalı və AzTV vasitəsilə canlı yayımlanır, bu, sona kimi də belə olacaq. Müsabiqə hər həftənin çərşənbə axşamı və çümə axşamı saat 21:00-da Beynəlxalq Muğam Mərkəzində keçiriləcək. Onu da deyim ki, birinci turda münsiflər ilk seçimlər olduğu üçün heç bir iştirakçını müsabiqədən uzaqlaşdırmadılar. Bu gündən başlayaraq iştirakçılar arasında ciddi mübarizə başlayacaq. Çərşənbə axşamı 10, cümə axşamı isə 10 iştirakçı çıxış edəcək , yekunda 20 iştirakçının ümumi balları hesablanaraq münsiflər tərəfindən rəy veriləcək. Ən az bal toplayan ifaçı müsabiqəni tərk edəcək. Müsabiqədəki şəffaflıq tamaşaçıların gözü qarşısında təmin olunacaq.

- Son günlər müsabiqənin seçim turlarının nəticələri ilə bağlı bəzi söz-söhbətlər dolaşmaqdadır. Deyilənə görə, budəfəki müsabiqəyə Qarabağdan olan gənc ifaçılar vəsiqə qazana bilməyib. Bu nə dərəcədə realdır?

- Bu kimi məlumatlar şaiə xarakterli olduğundan münasibət bildirmək istəmirəm. Ancaq onu deyə bilərəm ki, müsabiqənin seçim turlarına Azərbaycanın bütün bölgələrindən iştirakçılar qatılıb. Seçimlər isə münsiflər heyətində təmsil olunan peşəkar sənətkarlar tərəfindən aparılırdı. Burada ayrı-seçkiliyin qoyulması mümkün deyil. Ola bilər ki, hər hansı bir ifaçı istedadlı olsun, ancaq seçim turlarında səsində müəyyən problemlər yaransın. Bu zaman da əsas diqqət ifaçının turda iştirakına yetirilir. Seçimlərdə Qarabağa və ya digər bir bölgəyə fərq qoyulmayıb, çalışmışıq ki, müsabiqəyə yaxşıların yaxşısını seçək və ümüd edirəm ki, buna nail olmuşuq.

- Gəzən digər şaiələrə görə isə seçim turlarında üstünlük münsiflər heyətində təmsil olunan sənətkarların tələblərinə verilib. Buna münasibətiniz necədir?

- Müsabiqəyə mənim də üç tələbəm buraxılıb. Bu o demək deyil ki, onları mənə görə seçiblər. Bu ifaçıların hər üçü istedadlıdır. Eləcə də bu sözləri digər ifaçılara şamil edə bilərəm. Bir də təkrarlamaq istəyirəm ki, kimin tələbəsi olmasından, haralı olmasından asılı olmayaraq yalnız istedadlar arasından ən istedadlıları seçilib.

- Müsabiqəyə nə vaxt yekun vurulacaq?

- Təxminən may ayında müsabiqənin yekunlaşacağı gözlənilir. Yekunla bağlı indidən proqnoz vermək çətindir. Müsabiqə boyunca hər şey dəyişə bilər. Onu deyə bilərəm ki, çox istedadlı ifaçılar var. Onların arasından birinci, ikinci və üçüncü yerlərə layiq ifaçılar müəyyən ediləcəklər. Ciddi mübarizədən sonra müğam dünyasına ən yaxşı və istedadlı ifaçılar qədəm qoyacaq.

 

 

Mirvari 

 

Həftə içi.- 2011.- 23 fevral.- S. 6.