Türkiyə səfirliyinin yeni mətbuat müşaviri "Həftə içi"nin qonağı oldu

Yavuz Bayram Maraş: "Azərbaycan jurnalistlərinin potensialı yüksəkdir"

Türkiyə Cumhuriyyətinin Azərbaycandakı səfirliyinin yeni təyin olunmuş mətbuat müşaviri Yavuz Bayram Maraş dünən "Həftə içi"nin qonağı oldu. O, söhbət əsnasında bildirdi ki, Türkiyədə Baş Bakanlıq yanında Mətbuat Yayın İnformasiya Baş İdarəsində çalışıb. Əvvəllər Azərbaycana gəlmədiyini bildirən müşavir ilk işinin mətbuat orqanları ilə tanışlıqdan ibarət olacağını dedi. İndiyə qədər bir neçə mətbu orqanla tanış olduğunu diqqətə çatdıran Yavuz Bayram Maraş "Həftə içi"ni maraqlandıran sualları da cavablandırdı.

- İndiyə qədər Mətbuat Şurası, Kütləvi İnformasiya Vasitələrinə Dövlət Dəstəyi Fondu, bir neçə jurnalist təşkilatları və qəzetlərdə olmuşam. Mətbuat Yayın İnformasiya Baş İdarəsində daha çox mətbuatın təcrübəsinin artırılması, onların problemlərinin həlli istiqamətində addımlar atılır. Türkiyədə jurnalistlərin press-kartlarını təmsil etdiyim qurum verir. Bu kartlar vasitəsilə jurnalistlər avtobuslardan, təyyarələrdən, qatarlardan güzəştli istifadə edir, müzeylərə güzəştlə daxil olur.

- Güzəştlər neçə faizdir?

- Güzəştlər müxtəlif xidmət növlərinə uyğun dəyişir. Məsələn, metrodan pulsuz istifadə olunur, muzeylərə ödəniş etmədən girib baxmaq olar. Mətbuatla daha çox biz maraqlanırıq. Qurumun müxtəlif şöbələri var, onların mətbuatla bağlı topladığı məlumatlar internet səhifəmizdə yayımlanır. Baş Nazirlik, Silahlı Qüvvələrin Baş Qərargahı, Prezident Aparatı kimi dövlət qurumlarına bilgi göndəririk. Mətbuat üçün Urfada seminarlarımız keçiriləcək. Çalışacağıq ki, Azərbaycan mediası da oradakı seminarlara qatılsın. Bizdə iqtidar-müxalifət mətbuatı anlayışı yoxdur. Mətbuat müstəqildir. Mətbuat xəbəri müstəqil yayımlaya bilir. Biz heç bir mətbuat orqanını hansısa şəkildə yönləndirmirik. Hansısa qəzetin hüquqi problemi yaranırsa, bunu məhkəmə həll edir.

- Türkiyədəki jurnalistlərin həbsinə münasibətiniz necədir? Baş Bakanlıq yanında Mətbuat Yayın İnformasiya Baş İdarəsi bu məsələyə münasibətini açıqlayıbmı?

- Bu məsələyə baş nazir münasibətini açıqlayıb. Onlar qəzetçilik fəaliyyəti ilə bağlı həbs olunmayıblar. Müstəntiqlərin dəlilləri səbəbi ilə saxlanılıblar. Baş nazir də bildirib ki, qəzetçilərin həbsini heç kim istəmir və bu yaxşı hal deyil.

- Kimin təklifi ilə bu vəzifəyə təyin olundunuz?

- Baş nazirin müavini Bülənt Arınçın və Baş Bakanlıq yanında Mətbuat Yayın İnformasiya Baş Müşavirliyinin təklifi ilə bu vəzifəyə göndərildim.

- Əvvəllər Azərbaycanda olmusunuz?

- Xeyr.

- Azərbaycan mətbuatı ilə bağlı məlumatlarınız nə qədərdir?

- Məndən əvvəlki müşavir Həbib Kaya Azərbaycan mətbuatı ilə bağlı məlumat verdi. Onunla birgə bir neçə yerdə olduq. İndi də məqsədimiz mətbuat orqanlarını gəzmək və media mənsubları ilə tanış olmaqdır. İki qardaş ölkəyik, bu prinsiplə də çalışmalarımız davam edəcək. Bir neçə mətbuat orqanında mənə dedilər ki, bizə diqqət ayırmırsınız. Məncə heç bir mətbuat müşaviri mətbuatdan qaçmaz. Vaxt çox qısadır. Ola bilər ki, kimsə vaxtın azlığından mətbuat orqanlarında olmayıb, onlara vaxt ayıra bilməyib.

- Bəzi müşavirlər press reliz yaymaqla, sorğuları cavablandırmaqla işlərini yekunlaşdırırlar. Siz hansı yöndə çalışacaqsınız, yeniliklər olacaqmı?

- Hələ mətbuatla tanış oluruq. Müxtəlif istiqamətlərdə çalışacağıq. Maksimum çalışırıq ki, mətbuatın suallarını cavabsız buraxmayaq. Məqsədimiz Azərbaycan mətbuatını maddi və mənəvi cəhətdən yüksəklərə qaldırmaqdır. Azərbaycan mətbuatının problemləri mövcuddur, reklam gəlirləri azdır. Azərbaycanda ən böyük tirajlı qəzet 10-12 min nüsxə ilə çıxır ki, bu da çox azdır. Arzu edirik, Azərbaycan mətbuatı güclənsin, gəlirləri artsın və lazımi səviyyəyə çatsın. Azərbaycan mətbuatına nisbətən Türkiyə mediası irəli gedib, amma orada da bir sıra problem var.

- Bəzi fikirlərə görə internet qəzet bazarını öldürəcək, getdikcə qəzetlər sıradan çıxacaq. Türkiyədə necə düşünürlər?

- İnternet təzə yarananda Türkiyədə qəzetçilər qorxdu və düşündülər ki, qəzetlər sıradan çıxacaq. İnternet xəbərləri yaxşıdır, tez məlumat ala bilirsən. Amma internetdən təfərrüatlı bilgi almaq olmur. Qəzet isə ətraflı və araşdırılmış bilgi verir. Qəzetlərdə köşə yazarlarını oxuyanda kitab qədər bilgiyə sahib oluram. Amma internetdə bu yoxdur.

- Səfirlik hər gün neçə qəzet alır?

- Hazırda 30 yaxın qəzet alırıq, bunların hamısını oxuyuram.

- Demək olar ki, gündəlik qəzetlərin hamısını alırsınız. Azərbaycan mətbuatı ilə bağlı fikriniz necədir?

- Azərbaycan xalqının təhsil səviyyəsi çox yüksəkdir. Qəzetlərin səhifə sayları azdır. Bunu da başa düşürük. Gəliriniz azdır, reklam ala bilmirsiniz. Azərbaycanda jurnalistlərin potensialı çox yüksəkdir. Önəmli olan oxucu toplamaqdır.

- Jurnalistlərin qarşılıqlı səfərlərinin təşkili ilə bağlı planlarınız varmı?

- Bu proses bir neçə dəfə həyata keçirilib. Nəzərdə tutduğumuz layihələrimiz də var. Onlar həyata keçərsə jurnalistlərin qarşılıqlı səfərlərinin sayının artmasını fikirləşirik.

Əli Zülfüqaroğlu

Həftə içi.- 2011.- 12 mart.- S. 1, 4.