Robertino Lorettini təəccübləndirən 13 yaşlı azərbaycanlı

Fevralın 13-də dünya şöhrətli italyan müğənni, əfsanəvi Robertino Loretti Azərbaycan tamaşaçıları ilə ilk dəfə Bakı səhnəsində solo konsertlə görüşə gəldi. Əfsanəvi tenorun konsertini Azərbaycan Dövlət Uşaq Filarmoniyasının solisti Emin Eminzadə "Jamayka" və İslam Qasımov "O Sole mio" mahnısı ilə açdılar. Həmin gənc vokalistlər ifalarından sonra tamaşaçıların marağına səbəb olub.

13 yaşlı Emin Eminzadə hazırda Mədəniyyət və Turizm Nazirliyinin Mədəniyyət Mərkəzinin nəzdindəki musiqi məktəbində fortepiano şöbəsində təhsil alır. Artıq ikinci ildir ki, Emin filarmoniyada böyük konsert proqramları ilə çıxış edir. O 2010-cu il iyunun 1-də "Beynəlxalq Uşaq Günü" münasibətilə Heydər Əliyev adına Sarayda keçirilmiş müsabiqədə Azərbaycan tamaşaçıları Eminin uğurlu ifasında məşhur "Jamayka"nı və bəstəkar Tofiq Quliyevin "Bakı" mahnısını dinlədilər. Eminin son uğurlu çıxışı isə dünya şöhrətli Robertino Lorettinin Bakı konsertindəki ifası oldu. Həmin çıxışdan sonra italiyalı müğənni Emini "Azərbaycanın Robertinosu" adlandırdı.

İki gün öncə Eminin ad günü oldu. Doğum günü ərəfəsində Emini daha yaxından tanımaq üçün ilk əvvəl onun müəlliməsi, Azərbaycan Milli Konservatoriyasının dosenti, Azərbaycan Respublikasının əməkdar müəlliməsi və sənətşünaslıq üzrə fəlsəfə doktoru Məryəm Babayeva ilə söhbətləşdik. Məryəm müəllimə ilk dəfə Emini eşidəndə səsinin onu cəlb etdiyini dedi: "Bir gün mən Mədəniyyət və Turizm Nazirliyinin Mədəniyyət Mərkəzinin nəzdindəki musiqi məktəbinə Naidə xanımın (Naidə Babayeva - musiqi məktəbinin direktoru, - red.) yanına işə düzəlmək üçün gəlmişdim. Məktəbdə olanda xəbər gəldi ki, bir valideyn övladını musiqi məktəbinə-vokal şöbəsinə qəbul olmaq üçün gətirib. Bunun üçün Naidə xanımla görüşmək istəyir. Naidə xanım həmin valideyni övladı ilə birgə qəbul etdi. Bir qədər söhbətdən və uşağı dinlədikdən sonra Naidə xanım məni Eminə göstərərək dedi ki, çox gözəl, artıq sizin müəlliməniz buradadır.

Eminlə söhbət etdim. Elə ilk söhbətdən hiss olundu ki, onun musiqi anlayışı genişdir. Amma bu, kifayət etmirdi. Niyə? Diqqətinizə bir məsələni çatdırım. Belə ki, qiymətli, amma bərbad vəziyyətdə olan bir daşı, yaxud adi şüşə parçasını ustaya təqdim edirsən. Usta var ki, həmin daşı, yaxud şüşə parçasını elə hamarlayar, düzəldər ki, göz oxşayar. Amma elə bir usta da olar ki, daşı tamam korlayar".

Təcrübəli pedaqoqun fikrincə, ümumiyyətlə, hər bir insanda istedad tapmaq olar. Emin isə başqa bir sahəni öyrənsə də, bacarığına görə irəliləyəcək. Sadəcə olaraq, gərək Eminin olduğu mühiti, çevrəsi peşəkar olsun.

"Emin bacarıqlı və istedadlıdır. Müəllimənin üzərinə düşən isə həmin bacarığı, istedadı üzə çıxarmaq və düzgün yönləndirməkdir. Bu mənada, uşağın istedadının üzə çıxarılmasında əsas səbəbkar başının üstündə dayanan müəllimi olmalıdır. Buna görə də, Naidə xanımla danışıb qərara gəldik ki, Emini öhdəliyimə götürüm.

Emin indi nazirliyin Mədəniyyət Mərkəzinin nəzdindəki musiqi məktəbində fortepiano şöbəsində təhsil alır. Vokalı isə Azərbaycan Dövlət Uşaq Filarmoniyasında öyrənir və həmin filarmoniyanın da solistidir", - Məryəm Babayeva belə dedi.

O, Eminin Azərbaycan tamaşaçısına daha geniş şəkildə tanınmasına səbəb dünya şöhrətli tenor Robertino Lorettinin konsertindəki çıxışının olduğunu bildirdi: "Heydər Əliyev Sarayında İtaliya müğənnisi, dünya şöhrətli tenor Robertino Lorettinin konserti keçirildi. Həmin konsertdən bir neçə gün əvvəl mənə Mədəniyyət və Turizm Nazirliyindən zəng edib dedilər ki, Məryəm müəllimə, mümkünsə Robertino Lorettinin konsertində gənc və istedadlı şagirdlərinizdən seçib onunla eyni səhnədə çıxış etmələrində bizə yardımçı olasınız. Təbii ki, seçilən uşaqlar əvvəlcə dinlənilməliydi. Bir neçə uşağı dinlədik, nəticədə Emin Eminzadə və İslam Qasımov seçildi".

Fevralın 13-də də Robertino Lorettinin solo konsertində Emin "Jamayka"nı və İslamla birgə "O Sole Mio" mahnısını ifa etdilər. R.Loretti hər iki uşağı dinlədikdən sonra simasında təəccüb və sevinc hissləri yarandı. O, yaşlarının azlığına rəğmən, uşaqların mahnıları tam peşəkarlıqla ifa etmələrinə təəccübləndiyini vurğulayaraq dedi ki, Azərbaycanda bu cür gözəl səsə malik uşaqların olduğuna inana bilmir. O, hətta, Emini "Azərbaycanın Robertinosu" adlandırdı, azyaşlı ifaçıların gələcəkdə çox məşhur musiqiçi olacaqlarına inandığını söylədi.

Həftə içi.- 2011.- 30 mart.- S. 8.