Almanlar 31 mart həqiqətini öyrənməyə çalışırlar

Kəmalə Kərimova: "Yaxın vaxtlarda fəaliyyət göstərdiyimiz şəhərdə soyqırım qurbanlarının abidəsi də ucaldılacaq"

31 Mart azərbaycanlıların soyqırım günüdür. Bu məqsədlə dünyanın hər yerində tədbirlərin keçirilməsi gözlənilir. Əlbəttə ki, tarix boyu xalqımızın başına gətirilən bu cür müsibətləri bir fakt olaraq dünya ictimaiyyətinin diqqətinə çatdırmaq üçün xarici ölkələrdə fəaliyyət göstərən səfirliklərimizin və eləcə də diaspor təşkilatlarımızın rolu əvəzsizdir.

Ona görə də Avropanın ən böyük ölkəsi olan Almaniyada fəaliyyət göstərən Azərbaycan - Almaniya Mədəniyyət Mərkəzinin rəhbəri, eləcə də ölkəmizi və Türkiyəni Almaniyada təmsil edən Kəmalə Kərimovadan 31 mart tarixində hansı tədbirləri təşkil etmək fikrində olduqlarını soruşduq. Müsahibimiz bildirdi ki, rəhbərlik etdiyi təşkilatın xətti ilə bir sıra tədbirlərin keçirilməsi nəzərdə tutulub və hazırlıqlar artıq başa çatıb. Onun sözlərinə görə, təqdim edəcəkləri geniş proqram alman, ingilis, türk və Azərbaycan dillərində olacaq. Dörd dil seçilməsi isə onunla bağlıdır ki, tədbirə müxtəlif millətlərin təmsilçiləri dəvət olunub və onların çıxışları sərbəst başa düşməsinə şərait yaradır. Yeri gəlmişkən, K.Kərimova onu da diqqətə çatdırdı ki, tədbirə qatılmaq sərbəstdir, yəni kim gəlmək istəsə, məhdudiyyət yoxdur.

Maraqlıdır, dünyanın ən sivil, ən dəqiq xalqlarından olan almanlar 31 mart tarixi ilə bağlı nə düşünürlər? K.Kərimova deyir ki, Almaniya ictimaiyyəti azərbaycanlıların soyqırımı ilə bağlı hər şeyi öyrənməyə çalışır. Bunun üçün isə əsas yardımçı yenə Azərbaycan səfirliyi və diaspor təşkilatları olmalıdır. Məhz bunu nəzərə alan Azərbaycan - Almaniya Mədəniyyət Mərkəzi mütəmadi olaraq alman cəmiyyət və təşkilatlarında görüşlər keçirir, xalqımızın üzləşdiyi qətliamla bağlı onlara səhih məlumatlar verilir. Kəmalə xanım onu da qeyd etdi ki, bü günədək 31 mart soyqırımı və ya Xocalı qətliamı ilə bağlı Almaniyanın hansısa vilayətində və ya adicə bir şəhərində xatirə kompleksinin, anım abidəsinin ucaldılması təşəbbüsünü indiyədək irəli sürməsələr də, yaxın gələcəkdə belə bir proqram da həyata keçirmək arzusundadırlar. Hətta bu istəyi reallaşdıra bilsələr, yaxın vaxtlarda fəaliyyət göstərdikləri şəhərdə belə bir abidə mütləq ucaldılacaq.

Bir neçə həftə sonra ermənilərin "soyqırım" günü qeyd olunacaq. Maraqlıdır, azərbaycanlılar olaraq uğradığımız soyqırım faktlarını almanlara sübut etməklə ermənilərin həmin qondarma planlarını iflasa uğrada bilərikmi? K.Kərimovanın fikrincə, bəli. O, da ermənilərin səsini kəsmək üçün düşündüyümüz çıxış yolunu optimal variant sayır. Müsahibimiz deyir ki, məhz bunu nəzərə alaraq əllərindən gələni edirlər ki, ermənilərin iç üzünü açıb göstərsinlər, onların əslində cinayətkar olduqlarını isbatlasınlar. Hətta bu məsələdə Almaniyada yaşayan çoxsaylı türk icması da azərbaycanlılara kömək göstərir. Türklərdən söz düşmüşkən, müsahibimiz onu da əlavə etdi ki, Almaniya türkləri bütün məsələlərdə onların yanındadır. Özü də təkcə soyqırım günləri deyil, Azərbaycanla bağlı bütün tədbirlərdə milli birlik nümayiş etdirirlər: "Biz azərilər onları arxamızda böyük qüvvə görürük. Mustafa Kamaldan qalma bir məsəl var - "Türkün türkdən basqa dostu yoxdur".

Vüsal Tağıbəyli

Həftə içi.- 2011.- 31 mart.- S. 3.