"Nə üçün qətl edildik" filminin təqdimatı keçirilib

Qənirə Paşayeva: "Ermənilərin yalanlarının qarşısını ala bilərik"

Türkiyənin Azərbaycandakı səfirliyində TRT-nin Bakı Nümayəndəliyi tərəfindən hazırlanan azərbaycanlıların soyqırımına həsr olunmuş "Nə üçün qətl edildik" adlı filmin təqdimatı keçirilib.

Tədbirdə çıxış edən TRT Bakı təmsilçisi Yüksel Değercan filmdə hisslərə yol verilmədiyini və filmdəki nüansların tarixi faktlara əsaslandığını diqqətə çatdırıb. Daha sonra 31 Mart soyqırımına həsr edilən 35 dəqiqəlik "Nə üçün qətl edildik" sənədli filmi nümayiş olunub. Filmdə 20-ci əsrin əvvəlindən ermənilərin Azərbaycan türklərinə qarşı törətdiyi soyqırımlar tarixi faktlara əsaslanaraq nümayiş olunub. Filmdə 1905, 1907, 1918, 1990,1992 ci illərdə törədilən qətllər barəsində geniş məlumat verilir. Xocalı soyqırımı barəsində faktlara əsaslanan kadrlar, tarixçilərin və ekspertlərin şərhləri səsləndirilir. Filmdən məlum olur ki, 1918-1920-ci illərdə 700 mindən artıq dinc əhali ermənilər tərəfindən qətlə yetirilib, qan qardaşlarının harayına gəlmiş Osmanlı İmperiyasının Qafqaz İslam Ordusu Azərbaycanı azad edərkən 1130 şəhid verib.

Filmin təqdimatından sonra çıxış edən Türkiyənin Azərbaycandakı səfiri Hulusi Kılıç Türkiyənin hər zaman Azərbaycanın yanında olacağını deyib: "Türkiyə 1990-cı illərin əvvəlindən Ermənistanla sərhədlərini Azərbaycanla qardaşlığı üstün tutduğu üçün bağlayıb. Türkiyə hər zaman Azərbaycanın yanında olub və olacaq. Biz tariximizə sahib çıxmalıyıq. Tariximizi dərindən öyrənməliyik. Azərbaycanla Türkiyənin birləşməsi diaspor fəaliyyətində öz əksini tapmalıdır. 1 millətin 2 diasporu ola bilməz. Mətbuat nümayəndələri bu birliyin yaranmasında xüsusi yer tutmalıdır, onların üzərinə böyük iş düşür".

TRT-yə təşəkkür edən millət vəkili Qənirə Paşayeva isə diqqətə çatdırdı ki, filmdə ötən əsrin əvvəllərindən başlayaraq Azərbaycan xalqına qarşı törədilən cinayətlər öz əksini tapır: "Belə filmlər vasitəsilə həqiqətləri bütün dünyaya çatdırmaq lazımdır, bununla ermənilərin yalanlarının qarşısını ala bilərik. Yeganə Türkiyə səfirliyidir ki, insanlığa qarşı təcavüz kimi qiymətləndirilən 31 mart soyqırım gününü Azərbaycanla birgə keçirir. Bu da iki ölkə arasında mövcud olan qardaşlığın sübutudur".

Əli Zülfüqaroğlu

Həftə içi.- 2011.- 31 mart.- S. 3.