Bütün Qafqazın şeyxi dünya ictimaiyyətinə müraciət edib

Qafqaz Müsəlmanları İdarəsinin (QMİ) sədri şeyxülislam Allahşükür Paşazadə 31 mart - Azərbaycanlıların Soyqırımı günü ilə əlaqədar dünya ictimaiyyətinə müraciət edib. QMİ-nin mətbuat xidmətindən "Həftə içi"nə verilən məlumata görə, şeyx müraciətində bütün dünya ictimaiyyətini soyqırımlara məruz qalmış Azərbaycan xalqının faciələrinə biganə qalmamağa, mənfur qonşularımız tərəfindən bizə qarşı törədilmiş dəhşətli soyqırım aktlarına prinsipial hüquqi qiymət verməyə, Qarabağ münaqişəsinin ədalətli həllində Azərbaycanla həmrəy olmağa çağırır. O, bildirib ki, dünya ictimaiyyəti azərbaycanlıların soyqırıma məruz qalmasına dair tarixi arxivlərdə mövcud acı həqiqətləri bilməlidir: "Belə ki, Azərbaycan xalqı erməni ekstremistlərinin təcavüzü ilə yanaşı, erməni lobbilərinin bütün dünyaya car çəkdiyi dezinformasiyalardan da əziyyət çəkir. Bu ölkə özünün "tarixi əzabkeşliyi" barədə mifdən istifadə edərək, törətdiyi vəhşiliklərə, kütləvi qırğınlara, Azərbaycana qarşı hərbi müdaxiləsinə, istilasına dünya ictimaiyyəti qarşısında haqq qazandırmağa çalışır.

Lakin təəssüf ki, müasir dünyada biz bəzən əsl deyil, saxta soyqırımların tanınması, soyqırım törətmişlərin "soyqırım qurbanları" kimi qələmə verilməsi meyllərinin şahidi oluruq və bu bizi hədsiz narahat edir. Halbuki yaxın tarixdə - 1992-ci ildə Azərbaycan xalqına qarşı törədilmiş Xocalı qətliamına hüquqi-siyasi qiymət verilməsi ilə bağlı illərdir etdiyimiz müraciətlər hələ ki bir nəticə vermir". XX əsr ərzində müstəqilliyə qovuşmaq səadətinə nail olmuş Azərbaycan xalqı, təəssüflər olsun ki, mənfur düşmənlərin məqsədli şəkildə törətdikləri vəhşi qətliamlar səbəbindən on minlərlə övladını qurban verib. Azərbaycanın bir çox yerlərində 93 il bundan əvvəl - 1918-ci ilin martında törədilmiş ağlasığmaz soyqırım cinayətlərinin qanlı izləri - kütləvi insan qəbiristanlıqları mövcuddur. Qubadakı kütləvi məzarlıq buna əyani misaldır.

Naibə

Həftə içi.- 2011.- 31 mart.- S. 5.