"Müstəqilliyin 20 illiyi və qadınlar"

Yevlax və Goranboyda bu mövzuda tədbirlər keçirildi

Jurnalist Qadınlar Assossiasiyasının rəhbəri Sevil Yusifovanın təşkilatçılığı ilə aprelin 30-da YAP Yevlax rayon təşkilatının qərargahında, mayın 1-də isə Goranboy rayon İcra Hakimiyyətində "Müstəqilliyin 20 illiyi və qadınlar" mövzusunda dəyirmi masa keçirildi.

İki rayonda reallaşan tədbirdə bir qrup qadın jurnalist və eyni zamanda rayonun ayrı-ayrı yüksək sahələrində çalışan qadınlar iştirak edirdi. Tədbir zamanı qadınların tutduqları mövqedən asılı olmayaraq hər birinin cəmiyyətdə böyük rola malik olduqları xüsusilə diqqətə çatdırıldı. Həmçinin hər iki tədbirin əvvəlində yazıçı Fəridə Ləmanın H.Əliyevə həsr olunan filmi nümayiş etdirildi.

Assossiasiyanın rəhbəri Sevil Yusifova bildirdi ki, bu gün qadına layiq olduğu dəyəri yetərincə görmür: "Yaxın zamanda Azərbaycan dövləti müstəqilliyinin 20 ilini qeyd edəcək, qazandığımız müstəqilliyin qorunub-saxlanmasında bu gün azad, firavan yaşamağımızda ulu öndər Heydər Əliyevin misilsiz xidmətləri danılmazdır. H.Əliyev eyni zamanda qadına verdiyi yüksək dəyərlə də yaddaşlarda iz qoyub. Həmin dəyər, qiymət öz təsirini indi də göstərməlidir, qadınların səsi daim yüksək zirvələrdən gəlməlidir. Belə olmasa, onlar zorakılığa məruz qalacaq, təhqir olunacaq, aşağılanacaqlar".

Yazıçı Fəridə Ləman filmin ərsəyə gəlməsindən danışaraq ulu öndərin ölkəmizin inkişafında əvəzsiz xidmətlərindən danışdı: "Azərbaycan qadınına ən böyük dəyəri məhz H.Əliyev verib".

"Xalq Cəbhəsi" qəzetinin redaktoru Arzu Şirinova tədbirin təşkilatçısı Sevil Yusifovaya minnətdarlığını bildirərək qadınların cəmiyyət üçün önəmini vurğuladı: "Azərbaycan qadını güclü, savadlı olsa, cəmiyyət də, dövlət də güclü olar. Rayonlarımızda da belə güclü, fəxrlə danışılası qadınlar az deyil".

Şairə-jurnalist Zərəngiz Dəmirçi də çıxış edənlər sırasına qoşuldu: "Mən fəxr edirəm ki, belə yaradıcı, fəal, öz işinin peşəkarı qadınlarımız var. Lakin bundan da çox qadınımızı zirvələrdə görmək istərdim". "Qadın liderliyi uğrunda" İctimai Birliyinin sədri, jurnalist Ülkər Abdullayeva isə qadın hüquqlarının tapdanmasına toxundu: "Federiko Fellininin gözəl bir sözü var: "Qadının qoşulmadığı mübarizə ədalətli sayıla bilməz". Bu çox dəyərli ifadədir, qadının hüquqlarını pozmaq yox, əksinə, qorumaq lazımdır. İstərdim hakim, polis peşələrində qadınlarımız üstünlük təşkil etsinlər, çünki qadınların problemlərini onlar daha yaxşı həll edər". "Türk Eli" jurnalının baş redaktoru Gülnar Əhməd də qadınların cəmiyyətdə yaşadıqları problemlərə toxundu: "Düşünürəm, qadınların ən başlıca problemlərindən biri təhsildə geri qalmalarıdır. Xüsusilə də şəhərdən kənarda olan qadınlar təhsil sahəsindən qıtlıq çəkirlər. Ona görə də bütün rayonlarda qadınların bilik qazanması, öz hüquqlarını bilmələri uğrunda maarifləndirmə aparılmalıdır".

YAP Yevlax rayon Qadınlar Şurasının rəhbəri, əməkdar jurnalist, eyni zamanda "Kür" qəzetinin baş redaktoru Əminə Yusifqızı rəhbərlik etdiyi qəzetin rayon, xüsusilə də qadınlar üçün önəm daşıdığını dedi: "Qəzetimizə hər dəfə 10-15 nəfər qadın müraciət edir. Biz onların problemlərinin həll olunması istiqamətində əlimizdən gələni edirik. Ən başlıcası isə bizim rayonda qadın dayanışması var".

Qəhrəman ana Şamama Əliyeva isə qadınlarımızın o dövrlərdə də fəallığından danışdı: "Bir gün Heydər Əliyevlə görüşən zaman mənə dedi ki, bu boyda işi bir yerdə necə görə bilirsən, evində problem olmur? Dedim artıq qadınlar da işə qoşulub, hər yerdə fəallıq göstərirlər".

Tədbirdə iştirak edən hər iki rayonun qadınları müzakirələrdə aktiv iştirak edirdilər.

Sevda Zahidqızı

Həftə içi.- 2011.- 3 may.- S. 6.