Madriddə V Beynəlxalq
Türk Mədəniyyəti
və Sənətləri Konfransı keçirilib
Tədbirdə "Miras"ın
rəhbəri Fariz Xəlilli məruzə ilə
çıxış edib
10-11
may tarixlərində Madrid Muxtar Universitetinin nəzdində fəaliyyət
göstərən İspaniya Orientalistlər Assosiasiyası,
İspaniya Türk Assosiasiyası və Konya Fikir,
Kültür, Sanat Adamları Birliyinin birgə təşkilatçılığı
ilə İspaniya paytaxtında V Beynəlxalq Türk Mədəniyyəti
və Sənətləri Konfransı keçirilib. Konfransda
Türkiyə, İspaniya, Azərbaycan, Əfqanıstan və
digər ölkələrdən iştirak edən nümayəndələr
Orta Asiyadan Avropaya qədər geniş ərazilərdə zəngin
mədəniyyət yaratmış türk toplumunun
keçmişi, bu günü və sabahı haqqında
maraqlı məruzələrlə çıxış ediblər.
Azərbaycanı Miras Mədəni İrsin Öyrənilməsinə
Kömək İctimai Birliyinin sədri, tarix elmləri namizədi
Fariz Xəlilli, Milli Azərbaycan Tarixi Muzeyinin direktor
müavini Həbibə Əliyeva, həmin muzeyin xüsusi
fondunun mühafizi Afət Rüstəmbəyova təmsil edib.
"Miras"
İctimai Birliyinin sədri Fariz Xəlilli Əfşar dövlətinin
yaradıcısı, türk dünyasının son cahangirlərindən
olan Nadir şah və onun inşa etdirdiyi Orta əsr Ağsu
şəhərindən danışaraq, Nadir şahın
tanıdıldığı kimi zalım, türk toplumuna
düşmən mifinin qazıntılardan aşkar olunmuş
şəhər qalıqları və tapıntılarla ziddiyyət
təşkil etdiyini vurğulayıb. Qazıntıların 40
hektarlıq şəhərin üç istiqamətində
aparıldığı, XVIII əsrə aid tikililər, bina
qalıqları, küçə və yollar, sənətkar
dükanları, qala divarları, hamam, kiçik ibadət
otağı və qarşısında bulaq, su təchizatı,
kanalizasiya xətti və s. barədə konfrans
iştirakçılarının diqqətinə
çatdırıb. Dulus ustasının zövqlə
hazırladığı bir kaşının üzərində
nadir rast gəlinən miniatür sənətşünasların
diqqətini xüsusilə çəkmiş, onun Əfşar
dövrü miniatür sənətini
canlandırdığını vurğulayıb.
Həbibə
Əliyeva Milli Azərbaycan Tarixi Muzeyində qorunan daş və
ağac oyma sənəti nümunələri, Afət Rüstəmbəyova
isə muzeydə mühafizə edilən qızıl,
gümüş və digər əlvan metal saplarla
tikilmiş, bəzədilmiş zərdüz parçalardan
danışıb. Azərbaycanlı nümayəndələr
ölkəmizin Ermənistanın işğalı altında
olan ərazilərdəki muzeylərindən çox sayda mədəni
irs nümunəsinin bu və başqa yollarla Avropaya
daşındığını və dünya elmi ictimaiyyətinin
buna səssiz yanaşdığını konfrans
iştirakçılarının nəzərinə
çatdırıb. Konfransın sonunda yekun bəyannamə qəbul
edilib. Tədbir iştirakçıları müsəlmanların
əsasını qoyduqları Madrid şəhərinin
görməli yerlərini ziyarət ediblər.
Cəfər Mənsimi
Həftə içi.- 2011.- 13 may.-
S. 5.