Sabirabadın tarixi antik dövrə söykənir

Şükufə Əsgərova: "Ən qədim eksponatlar eramızdan əvvəl II-V əsrlərə gedib çıxır"

Bu gün tariximizi özündə əks etdirən və xalqımızın mənəvi dəyərlərinin, qiymətli sərvətlərinin saxlandığı yer tarix-diyarşünaslıq muzeyləridir.

Ata-babalarımızın, tarixi şəxsiyyətlərimizin, unudulmaz insanların, müharibə və əmək veteranlarının, vətən, torpaq uğrunda şəhid olan oğul və qızlarımızın şərəfli həyat mübarizə yolunun əbədi ünvan tapdığı ziyarət ocağıdır, bu muzeylər. Belə ziyarət ocağından biri də Sabirabad Rayon Tarix-Diyarşünaslıq Muzeyidir.

Muzeyin direktoru Şükufə Əsgərova bizimlə söhbətində bildirdi ki, 1983-cü ildən muzeydə çalışır və 1986-cı ildən bu günə kimi ora rəhbərlik edir: "Muzeylərə qayğı, tariximizə, milli-mənəvi dəyərlərimizə qayğı deməkdir. Ümummilli lider Heydər Əliyevin respublikamıza rəhbərlik etdiyi dövrlərdə bu sahəyə daha çox diqqət yetirilib və respublikamızda geniş muzey şəbəkəsi yaradılıb. Belə ki, 1978-ci ildə muzeylərimiz "Döyüş şöhrəti" otağı adı ilə fəaliyyət göstərib. Azərbaycanda muzey işinə qayğı ümummilli liderin adıyla bağlıdır. 1980-ci ildə onun bilavasitə təşəbbüsü və rəhbərliyi ilə respublikada tarix-diyarşünaslıq muzeyləri yaradıldı. Və həmin vaxtdan rayonlarda muzey fəaliyyətə başladı. Bizim rayon da həmin dövrə düşür. Onu vurğulayım ki, 1978-ci ildə hələ rayonda "Döyüş şöhrəti" otağının açılışı mərasimində ulu öndər Heydər Əliyev iştirak edərək muzeyin fəxri kitabına öz ürək sözlərini yazıb. Hazırda bu kitab muzeyin eksponatları sırasında qorunub saxlanılır. 1998-ci ildən muzeyimiz yeni 2 mərtəbəli binaya köçüb. 600 kvadrat metr sahəni əhatə edən muzey 3 işçi otağından, 2 fond, 2 foye və 6 ekspozisiya zalından ibarətdir. Hazırda 6300 əsas fond və 2500-dən artıq köməkçi fondumuz var".

Ş.Əsgərova rayonun tarixinin antik dövrə söykəndiyini də vurğuladı: "Ən qədim eksponatlar Zəngənə kəndinin yaxınlığında Şəhərgah adlanan yerdən tapılıb. Bu, eramızdan əvvəlki II-V əsrlərə gedib çıxır. Təkqulplu, lüləkli qablar, matrotipli qablar, ördəkburunlu gil qabların tarixi çox qədimdir, yəni bizim eradan əvvəl II-III əsrləri əhatə edir. Orta əsrlərə aid eksponatlar da az deyil. Buna misal olaraq IX-X əsrlərə aid gil çıraqları, şar-konusvari qabları, aftafa tipli qab qalıqlarını, küpə tipli qabları və sairəni göstərmək olar. Eramızdan əvvəl III-IV minilliklərə, yəni tunc dövrünə aid qablar da var. Eramızın I əsrinə aid kassa tipli qablar və ilk orta əsrlərə aid lüləkli, ağzı novçalı qablar da toplanılıb. Bunlar muzeyin ən qədim eksponatlarıdır".

Ş.Əsgərova onu da dedi ki, hər il minlərlə adam muzeyə ziyarətə gəlir: "Onların içərisində müxtəlif təbəqədən olan ziyalılar, alimlər, şair və yazıçılar, məktəblilər, tələbələr var. İnsanlar muzeydə toplanmış milli-mənəvi sərvətimizlə, qədim tarixə malik əşyalarla tanış olurlar. Hətta muzeydə mədəni kütləvi tədbirlər keçiririk. Ən çox şəhid ailələri, müharibə veteranları, görkəmli şəxsiyyətlərlə, tanınmış ziyalılar, əmək adamları, o cümlədən rayonla bağlı olan alimlərlə, əmək qəhrəmanları, iş adamları ilə görüşlərimiz olur. Muzeyin gözəl ənənəsi var. Hər il kollektivimiz bir rayonun muzeyinə təcrübə mübadiləsi aparmaq məqsədilə ekskursiyalar edir. Qəbələ, Şəki, Salyan Neftçala, Şirvan, Beyləqan və başqa rayonların muzeylərində olmuşuq. Bu il Şamaxı muzeyinə getməyi planlaşdırmışıq. Onu da qeyd edim ki, muzey zəhmətimizlə qurulub. Bu gün muzeyin bədii tərtibatının olmaması müasir dövrdə xidmətin yüksək səviyyədə göstərilməsində xeyli çətinlik yaradır. Çox gözəl haldır ki, rayona yeni təyin olunmuş icra başçısı Nazim İsmayılov elə işlədiyi ilk gündən müzeyə ziyarətə gələrək onun problemləri ilə maraqlandı. Və yaxın vaxtlarda muzeydə təmir-bərpa işlərinin aparılması ilə bağlı öz müsbət rəyini bildirdi. Biz muzeyimizin respublikanın gözəl muzeyləri sırasında olmasına ümid bəsləyirik. Bir ənənə olaraq muzeyin yubileylərini də ardıcıllıqla qeyd edirik".

Ş.Əsgərova ictimai işlərdə də fəallıq göstərir. YAP-ın Sabirabad Rayon Qadınlar Şurasının üzvü kimi səmərəli iş aparır. O, dəfələrlə YUNESKO-nun Azərbaycanda muzey işinə və mədəni irsin qorunmasına aid beynəlxalq seminar və treninqlərin iştirakçısı olub, maraqlı sorğu və təkliflərlə çıxış edib.

Ş.Əsgərova muzey işi sahəsində səmərəli fəaliyyətinə görə dəfələrlə Azərbaycan Respublikası Mədəniyyət və Turizm Nazirliyinin təşəkkürünə və pul mükafatına layiq görülüb.

Qələndər Xaçınçaylı

Həftə içi.- 2011.- 14-16 may.- S. 15.