Azərbaycan və Çexiya sıx əməkdaşlıqda maraqlıdır

Prezident İlham Əliyev: "Tərəflər arasında yüksək səviyyədə qarşılıqlı anlaşma mövcuddur"

Çexiya prezidenti Vatslav Klaus dünən Bakıda rəsmi görüşlərə başlayıb. Dünən onun rəsmi qarşılanma mərasimi olub. Prezident İlham Əliyev və çexiyalı həmkarının təkbətək görüşləri olub. Görüşdə ikitərəfli əlaqələrin müxtəlif sahələrdə, o cümlədən siyasi, iqtisadi, enerji və digər sahələrdə uğurla inkişaf etdiyi vurğulanıb.

Görüş nümayəndə heyətlərinin iştirakı ilə geniş tərkibdə davam etdirilib. Prezident İlham Əliyev səfərin uğurlu olacağına əminliyini bildirib: "Biz gündəliyimizdə olan müxtəlif mövzular, ikitərəfli münasibətlərimizə, o cümlədən Avropa İttifaqı ilə Azərbaycan arasında tərəfdaşlığa aid çox yaxşı müzakirələr apardıq. Əminəm ki, səfər və onun nəticələri əlaqələrimizi daha da gücləndirəcəkdir. Biz ölkələrimiz arasında ikitərəfli münasibətlərə olduqca böyük əhəmiyyət veririk. Əlaqələrimiz çox uğurla inkişaf edir. Yüksək səviyyəli nümayəndə heyətlərinin bir çox səfərləri həyata keçirilib. Əlbəttə ki, cənab prezidentin rəsmi səfəri münasibətlərimizin ən vacib məqamıdır. Əminəm ki, səfər əməkdaşlığımızın siyasi, iqtisadi, mədəni və enerji sahələrində olduqca fəal şəkildə inkişafı ilə nəticələnəcəkdir. Bir sözlə, ikitərəfli gündəliyimiz kifayət qədər genişdir. Ümid edirik ki, səfər nəticəsində ölkələrimizin işgüzar dairələri bir yerə toplaşacaqlar və birgə biznesi aparmaq imkanlarını araşdıracaqlar. Çox şadam ki, proqramınız çərçivəsində Siz Azərbaycan rayonlarının birinə səfər edəcəksiniz. Vacibdir ki, nəinki, paytaxtla, o cümlədən regional inkişafla da tanış olasınız. Ümid edirəm ki, sizin yaxşı təəssüratlarınız olacaq".

Çexiya prezidenti Vatslav Klaus isə səmimi qəbul üçün minnətdarlığını bildirib. Onun sözlərinə görə artıq bütün problemləri həll ediblər: "Yenidən davam etməyə məncə ehtiyac yoxdur. Bizim dostluq mühitində keçmiş intensiv və səmərəli danışıqlarımız olub. Mən sadəcə təkrar etmək istəyirəm ki, dəvətə görə Sizə dərin təşəkkürümü bildirirəm. Bu səfərə artıq uzun müddət idi ki, hazırlaşırdım. Hesab etdim ki, əgər dünyanın bu bölgəsinə, bu regiona və bu ölkəyə səfər etməsəm, onda gündəliyim dolğun olmazdı. Biz o faktı dəyərləndiririk ki, ölkələrimiz arasında münasibətlər son bir neçə il ərzində daha da intensivləşir. Bir sıra siyasətçilərin və iş adamlarının həyata keçirilmiş səfərləri çox müsbət haldır. Ümid etmək istəyirəm ki, bu gün imzalanacaq sənədlər əməkdaşlığımıza əlavə təkan verəcəkdir.

Prezident İlham Əliyevin və prezident Vatslav Klausun nümayəndə heyətlərinin iştirakı ilə geniş tərkibdə danışıqları başa çatdıqdan sonra Azərbaycan-Çexiya sənədlərinin imzalanması mərasimi olub. Daha sonra prezidentlər mətbuat üçün birgə bəyanatla çıxış ediblər. Prezident İlham Əliyev bildirib ki, dövlət başçıları ikitərəfli gündəlikdə duran mövzular, regional məsələlər, o cümlədən Avropa İttifaqı ilə Azərbaycan arasında aid geniş müzakirələr aparıb. Tərəflər arasında yüksək səviyyədə qarşılıqlı anlaşma mövcuddur. Ölkələrimiz arasında siyasi münasibətlər uğurla inkişaf edir: "Çexiya prezidentinin Azərbaycana rəsmi səfəri daha da güclənən siyasi dialoqun göstəricisidir və digər sahələrdə də münasibətlərin inkişaf etdirilməsi üçün yaxşı imkan yaradır. İqtisadi əlaqələrin inkişafına hər iki tərəf böyük maraq göstərir.

Münasibətlərimizin həmçinin regional ölçüsü də var. Avropa İttifaqı ilə Azərbaycan arasında tərəfdaşlıq da ikitərəfli münasibətlərimizin bir hissəsidir. Biz Çexiya tərəfinə Avropa İttifaqı-Azərbaycan tərəfdaşlığına verdiyi dəstəyə görə olduqca minnətdarıq. Hazırda biz Şərq Tərəfdaşlığı proqramında iştirak edirik və ümidvarıq ki, bu proqram nəticəsində Avropa İttifaqı ilə Azərbaycan arasında münasibətlər daha da sıx olacaqdır. Enerji əməkdaşlığımız ikitərəfli gündəliyimizin bir hissəsidir. Çox şadıq ki, Azərbaycanın karbohidrogen resursları artıq Çexiya Respublikasının bazarına çıxarılır. Ümidvarıq ki, bu əməkdaşlıq növbəti illərdə daha da artacaqdır. Hazırda biz neft ixrac edirik, lakin gələcəkdə qaz sektorunda da əməkdaşlıq ikitərəfli münasibətlərimizin bir hissəsi olacaq. Xüsusilə nəzərə alsaq ki, bu ilin əvvəlində Aİ ilə Azərbaycan arasında Cənub Qaz Dəhlizi haqqında birgə Bəyannamə imzalandı. Avropanın enerji təhlükəsizliyi və Avropa ilə enerji əməkdaşlığı Avropa İttifaqı-Azərbaycan tərəfdaşlığının gündəliyində daim duran məsələlərdir". Dövlət başçısı çex həmkarı ilə həmçinin regional məsələləri, o cümlədən regional əməkdaşlıq və təhlükəsizlik məsələlərini müzakirə etdiklərini söyləyib. Dövlət başçısı uzun illərdir ki, Azərbaycan əraziləri işğal altında olduğunu vurğulayıb. Onun sözlərinə görə, azərbaycanlılara qarşı etnik təmizləmə siyasəti nəticəsində 1 milyon azərbaycanlı qaçqın vəziyyətinə düşüb və ərazimizin 20 faizi demək olar ki, 20 ildir işğal altındadır. BMT -nin TŞ-nın qətnamələrində erməni silahlı qüvvələrinin ərazilərimizdən qeyd-şərtsiz və dərhal çıxarılması tələb edilir. TŞ-nın 4 qətnaməsi icra olunmamış qalır. ATƏT-in qərarları, Avropa Parlamentinin, Avropa Şurasının və digər beynəlxalq təşkilatların qətnamələri eyni tərzdədir və eyni məna daşıyır. Münaqişə beynəlxalq hüquq normaları əsasında həll olunmalıdır və Azərbaycanın ərazi bütövlüyü bərpa olunmalıdır. Bundan sonra regionda sülh bərqərar olunacaq: "Yenə də təkrar etmək istəyirəm ki, mən cənab prezidentə danışıqlar prosesi haqda məlumat verdim və ümidvar olduğumu bildirdim ki, Münaqişə beynəlxalq hüquq normaları əsasında həllini tapacaq".

Çexiya prezidenti Vatslav Klaus isə Azərbaycanla münasibətləri dostluq münasibətləri kimi xarakterizə edib. O səfərinin məqsədini də açıqlayıb: "Ölkənizə səfərimlə Azərbaycan və Çexiya xalqlarına aydın işarə verirəm ki, biz Azərbaycan-Çexiya, Çexiya-Azərbaycan əlaqələrinin bütün sahələrdə, o cümlədən siyasi, iqtisadi, mədəni sahələrdə genişləndirilməsində olduqca maraqlıyıq. Bu mənim 3 günlük səfərimin əsas məqsədi və marağını təşkil edir. Cənab prezident biz bura açıq ürəklə gəlmişik. Biz bura ölkənizi daha yaxından tanımaq, anlamaq üçün gəlmişik. Biz nəinki paytaxt şəhəriniz Bakıda olmağımızdan, ölkənizin digər bölgələrini görəcəyimizdən məmnunuq. Biz Azərbaycanın son illər əldə etdiyi nailiyyətlərdən məlumatlıyıq. Ermənistanla olan ağrılı münaqişədən xəbərimiz var və bu münaqişənin həllinə kiçik də olsa töhfə vermək istərdik. Biz təkcə Çexiya- Azərbaycan münasibətlərinin inkişafında maraqlı deyilik. Aİ-nin son Şərq Tərəfdaşlığı proqramına da xüsusi diqqət yetiririk. Çexiya Respublikası bu ideyanın ərsəyə gəlməsində təşəbbüskarlarından biri olub. İki il bundan öncə Şərq Tərəfdaşlığı Proqramı ilə bağlı Praqada görüş keçirildi və biz o zaman orada görüşmüşdük. Cənab prezident, sizə söz verdim ki, səfər edəcəm və budur, bu gün artıq buradayam. Cari ilin sonunda Varşavada keçirilməsi nəzərdə tutulan Şərq Tərəfdaşlığı sammitini səmimiyyətlə arzulayırıq. Ümid edirəm ki, bu tədbir Avropa İttifaqı ilə Azərbaycan arasında münasibətləri daha da inkişaf etdirəcək. Cənab prezidentin, sizi əmin edə bilərəm ki. ölkələrimiz arasında münasibətlərin, o cümlədən Avropa ilə Azərbaycan arasında olan əlaqələr bizim marağımızdadır".

Azad Əliyev

Həftə içi.- 2011.- 18 may.- S. 2.