Gəncə şəhərinin siması dəyişir

Qədim paytaxtın memarlıq quruluşuna yeniliklər ediləcək

Dövlət başçısının sərəncamı ilə Elmar Vəliyevin Gəncə Şəhər İcra Hakimiyyətinin başçısı təyin olunmasından sonra qədim paytaxtda bir sıra dəyişikliklərə start verilməsi barədə qəzetimizdə yazmışdıq. Xatırladaq ki, sözügedən yeniliklər yenidənqurma, tikinti-quraşdırma və abadlaşdırma işləri ilə əlaqədardır.

Məlumat üçün bildirək ki, bir neçə gün öncə E.Vəliyevin sərəncamı ilə Gəncənin bu ilin fevral ayından boş qalan baş memarı vəzifəsi Allahverdi Əliyevə həvalə edilib. Yeni memar Gəncə ŞİH-də keçirilən toplantıda açıqlayıb ki, qədim paytaxtın siması bərbad günə salınıb və hazırda bu sahədə vəziyyəti düzəltmək üçün ciddi işlər gedir. Gəncə ŞİH-dən verilən məlumata görə, görülən işlərdən biri də Gəncədəki Heydər Əliyev parkının yenidən qurulması ilə bağlıdır. Onun yeni layihəsi hazırlanıb və park müasir parksalma qanunları ilə salınacaq. Parkın girəcəyində möhtəşəm tağ (arka) qurulacaq. Tağdan parka qədər olan məsafə 60 metr təşkil edəcək. Parkda Heydər Əliyev Mərkəzinin binası da inşa olunacaq. Mərkəzin 3 mərtəbə, ümumi sahəsi 7500 kvadratmetr olacağı nəzərdə tutulur. Gəncədə həmçinin, Nizami Mərkəzi yaradılacaq. Ölkə prezidenti İlham Əliyevin təşəbbüsü ilə dahi şair və mütəfəkkir Nizami Gəncəvinin irsini öyrənmək üçün belə bir qurumun yaradılması qərara alınıb. Yeni yaradılacaq mərkəzdə 70 nəfərin çalışacağı planlaşdırılır.

Gəncədə bulvar salınacaq

Uzun zamandır Gəncə Dövlət Filarmoniyasının binasının bərbad durumu ictimai qınağa səbəb olmuşdu. Nəhayət, həmin məsələ öz həllini tapmaq üzrədir. Bunun üçün 26 milyon manat vəsait ayrılacaq və çoxdan gözlənilən yenidən qurulma işlərinə tezliklə start veriləcək. Lakin filarmoniyanın şəhərin hansı hissəsində yerləşməsi məsələsi hələlik açıq qalır və bu haqda bütün mülahizə və təkliflər nəzərə alınacaq. Digər yenilik isə Gəncəçay üzərində yeni bəndin tikilməsi ilə əlaqədardır. Yeni bənd Gəncə çay axarının 1 km-lik hissəsində qurulacaq. Həmin çayın önü kəsilərək suyun səviyyəsi qaldırılacaq. Bu layihənin reallaşması şəhərin abadlığı və səliqə-sahmanı üçün əlverişli imkan yaradacaq. Bu layihənin davamı kimi Gəncədə bulvarın salınması da planlaşdırılır. Gəncənin ən mühüm avtovağzalı olan "Gəncə Avtovağzal" ASC-nin binası yenidən qurulacaq. Artıq bununla bağlı layihə hazırlanır. Əvvəllər 160 marşrut avtobusun gediş-gəlişini həyata keçirən avtovağzal hazırda 60 marşruta xidmət etməyə çətinlik çəkir. Səbəb isə avtovağzalın ərazisində yöndəmsiz və heç bir görkəmə malik olmayan obyektlərin tikintisi idi. Ona görə də icra başçısı E.Vəliyevin göstərişi əsasında yöndəmsiz tikililər sökülür. Gəncə ŞİH-in Memarlıq İdarəsi avtovağzalın yeni layihəsini hazırlayır. Yekunlaşdıqdan sonra işlərə başlanılacaq.

Qaçqın yataqxanaları və məktəblər təmir olunacaq

Gəncədə 46 orta və 3 əsas məktəb mövcuddur. Bu məktəblərdə təhsil alan şagirdlərin sayı isə 37670 nəfər təşkil edir. Ötən il 38 saylı məktəb yenidən inşa olunub. Amma 2010-cu ildə Gəncə şəhəri üzrə dövlət proqramı əsasında əsaslı təmir olunan məktəb olmayıb. E.Vəliyevin göstərişi ilə isə 7 orta məktəb binası təmir olunacaq və ya yenidən qurulacaq. Gəncədəki xüsusi qayğıya ehtiyacı olan şagirdlər üçün nəzərdə tutulmuş 45 saylı məktəb sökülərək, yenidən inşa olunacaq. Həmçinin, Gəncə şəhər 15, 30, 32 və 43 saylı məktəblər isə əsaslı təmir ediləcək. Gəncə Şəhər Təhsil İdarəsi üçün yeni bina tikiləcək və Mərkəzi Stadion təmir olunacaq. Həmçinin, Olimpiya İdman Kompleksi Gənclər və İdman Nazirliyinin balansına veriləcək və onun binası yenidən işlənəcək. Gəncədə 15602 nəfər məcburi köçkün yaşayır. Onların da 70 faizi 50-dək irili-xırdalı yataqxanalarda məskunlaşıb.

Hazırda onların məskunlaşdığı Gəncə Dövlət Universiteti, Texniki və Humanitar Kollecin yataqxanaları təmir olunur. Bu il ümumilikdə 10 yataqxana binasının təmir olunacağı planlaşdırılır. Ötən il də eyni qədər sayda yataqxanada təmir işləri görülüb. Mütəmadi şəkildə aparılan təmir işləri bu dəfə infrastruktur bərpası ilə davam edir. Oraya əsasən sanitar qovşaqlar - su və kanalizasiya xətti, binaların dam örtüyü, eləcə də ümumi istifadə yerləri (hamam, mətbəx və s.) və s. aiddir. Yaxın vaxtlarda bu sıraya Gəncə Tibb Kollecinin məcburi köçkünlər məskunlaşmış yataqxanaları da əlavə ediləcək. Təmir işləri Nazirlər Kabinetinin sərəncamına uyğun olaraq, Məcburi Köçkünlərin Sosial İnkişaf Fondu tərəfindən elan edilmiş tenderin qalibi olan tikinti-bərpa qurumları tərəfindən aparılır.

Təbriz Vəfalı

Həftə içi.- 2011.- 19 may.- S. 8.