YETİMDİR

Yalı aşan qoşa yoldur,

Zirvələr qardan yetimdir.

Ətri-gül-çiçəyi boldur,

Bəs, çəmən hardan yetimdir?!

Arı sevda pətək deyil,

Hər naləsaz tütək deyil,

Könlüm dərdlədir, tək deyil,

Dil ahu-zardan yetimdir.

Ay bəllidir parasından,

Günəş-işıq çarasından,

Gözlərim göz qarasından,

Ürəyim qordan yetimdir.

Ünvansız daş da - itən daş

Hardadır, atsan, bitən daş?!

Vətənsiz qalan vətəndaş –

Bax elə burdan yetimdir.

Sənmisən eşqi unudan?!

Həsrət-yaramı qanadan

Kimsə atadan, anadan

Nəğməkar yardan yetimdir.

TƏRK ELƏMƏ

(Düşmən tapdağında olan

torpaqlarımızın işğaldan

azad edəcəyimizə inamla)

Əl yetməsə o dağlara,

Dərələrə ərk eləmə

Göstərdiyin görkəzmədi,

Allah, bizə görk eləmə.

Od məndədi, qor arama,

Yarım olsan, yar arama.

Əllərini çək yarama,

Sığalını bərk eləmə.

Dərd-alaçıq, çətin olan

Beş qarğıdı çətən olan

Ümid, tərki-vətən olan

Nəğməkarı tərk eləmə.

QALX, TÜRKÜM!

Bir atəşin bir oduyuq,

Bir millətin bir adıyıq,

Bir ananın övladıyıq,

Saf südə şərikim mənim.

Qalx ayağa, türküm mənim!

Boyumuz-Savalan, Qoşqar,

Murov, Ağrıdağ, Kəpəz var.

İnadı-sərt qala divar;

Qranitim, bərkim mənim;

Qalx ayağa, türküm mənim!

Qarabağım talan yerdə;

Yağı torpaq bölən yerdə

Tək hənirin gələn yerdə

Yoxdur qorxum-hürküm mənim,

Qalx ayağa, türküm mənim!

And kimi içilər adın;

Sayılıb-seçilər adın.

Dünyaca ölçülər adın;

Turan boyda görküm mənim,

Qalx ayağa, türküm mənim!

Hər an düz yolda-haqdasan,

Haqqa dirək bayraqdasan,

Silah kimi ayaqdasan;

Varlığımı dərkim mənim –

Qalx ayağa, türküm mənim!

Qalx, qəm şimşəyi çaxmasın,

Şərdən al qanlar axmasın.

Qalx ki, qalxanlar qalxmasın.

Əslim, soyum, köküm mənim –

Qalx ayağa, türküm mənim!

Yusif Nəğməkar

Həftə içi.- 2011.- 21-23 may.- S. 7.