İqtisad Universitetinin "İqtisadçı"sı

Artıq məlum olduğu kimi, "Həftə içi" olaraq təhsil ocaqlarımızın rəsmi orqanları olan qəzetlərin işi və fəaliyyəti barədə oxuculara ətraflı məlumat veririk. Səhifəmizdə bu dəfə Azərbaycan Dövlət İqtisad Universitetinin nəzdində fəaliyyət göstərən "İqtisadçı" qəzetinə yer ayırmışıq.

Bu dəfə oxucularımız "İqtisadçı"nı daha yaxından tanıyacaqlar. Cəmiyyətə savadlı, dünyagörüşlü iqtisadçılar hazırlayan universitetin mətbuat orqanını tanımağa dəyər. O zaman tanıyaq...

30 illik tarixə baxış

Qəzet 1970-ci ildə D.Bünyadzadə adına Azərbaycan Xalq Təsərrüfatı İnstitutu Rektorluğunun, Partiya Komitəsinin, Həmkarlar İttifaqı və Komsomol təşkilatlarının orqanı kimi təsis olunub. İlk sayı həmin il yanvarın 28-də çapdan çıxıb. Qəzetin nəşri institutun yaranmasından xeyli sonra olsa da, nəşr edildiyi vaxtdan bu günə qədər özünün obyektivliyi, dolğun məzmunu ilə professor-müəllim və tələbə kollektivinin böyük rəğbətini qazanıb. Fəaliyyət göstərdiyi 30 il ərzində universitetin bütün tədbirlərində yaxından iştirak edib və həmin tədbirlər haqda öz səhifələrində geniş materiallar dərc edib. Nəşr olunduğu vaxtdan etibarən "İqtisadçı" qəzetinə müxtəlif illərdə öz dəsti-xətti ilə tanınan fərqli insanlar redaktorluq ediblər. 2006-cı ildən isə Eyyub Hüseynov qəzetin məsuliyyətini öz üzərinə götürüb. Baş redaktor da daxil olmaqla heyət 4 nəfərdən ibarətdir. Ayda 1 dəfə 1000-1500 tirajla nəşr olunur və bütün fakültələrə pulsuz paylanır.

"Parlaq gələcək naminə güclü iqtisadçı kadrlar hazırlayaq!"

Qəzetin redaktoru Anar Eyyubovun sözlərinə görə, "İqtisadçı"nın universitet daxilində öz oxucu kütləsi var və xüsusilə də son dövrlər dizaynda dəyişiklik edildiyindən ona maraq daha da artıb: "Mən beş ildir qəzetin baş redaktoruyam. Beş il fəaliyyət çox uzun zaman olmasa da, deyə bilərəm ki, 30 ildir qəzet doğma universitetimizin aynasına çevrilib. "Azərbaycanın parlaq gələcəyi naminə güclü iqtisadçı kadrlar hazırlayaq" şüarı ilə nəşr olunan qəzetimiz qarşısına təlim-tərbiyə işinin müxtəlif sahələrini işıqlandırmaq, tədrisin keyfiyyətini, gənclər arasında tərbiyə işinin səviyyəsini yüksəltmək, mühüm elmi problemləri şərh etmək və istiqamətləndirmək, nəzərəçarpan qüsurların aradan qaldırılmasında üniversitet rəhbərliyinə yaxından kömək göstərmək kimi mühüm vəzifələr qoyub. Bununla yanaşı, universitetdə qabaqcıl iş metodu ilə fərqlənən, tədrisin yaxşılaşdırılması istiqamətində fəallıq göstərən alimlərimiz haqqında da obyektiv, tərbiyəvi xarakterli materiallar dərc olunur".

Redaktor qəzetin uğurlarından da danışdı: "Tələbə-müxbirlərimizin ölkə iqtisadiyyatı barədə yazdıqları elmi problematik yazıların nəticəsi çox uğurlu olub. Belə ki, 1994-cü ildə "İqtisadçı" qəzeti Azərbaycan İcarədarlar və Sahibkarlar İttifaqının və Azərbaycan KİVİHİ-nin birgə keçirdikləri "Azərbaycanın iqtisadi dirçəlişi" mövzusunda yaradıcılıq müsabiqəsinin qalibi olub. Bundan başqa, iqtisadi biliklərin təbliği və bir sıra sosial-iqtisadi problemlərin həlli sahəsində göstərilən səylərə, ölkənin iqtisadi və mədəni dirçəlişindəki xidmətlərinə və şəxsi yaradıcılıq uğurlarına görə qəzetin kollektivi "Azərbaycan bayrağı" diplomuna layiq görülüb".

Onu da əlavə edək ki, qəzetin adında Azərbaycan bayrağının əks olunması xüsusi diqqətçəkən məqamlardandır. Redaktor bunu qəzet rəngli nəşr olunandan sonra dizaynda edilən dəyişikliklə əsaslandırdı: "Həmişə tələbələrin, təbii ki, həm də müəllimlərin marağına səbəb olacaq rubrikalarla çıxış etməyə çalışırıq. Bizim üçün tələbələrin fikirləri çox önəmlidir. Rubrikalar hazırlayarkən onların istəyini nəzərə alırıq. "Rektorun poçtundan", "Sorğu guşəsi" sevilən rubrikalardandır. Birinci rubrikada rektora ünvanlanan hər hansı bir məktubu cavabı ilə birlikdə işıqlandırırıq, bu da təbii olaraq marağa səbəb olur. Digərində isə tələbələrin öz hüquqlarını yaxşı bilməsi üçün onları maraqlandıran suallara cavablar dərc olunur"

"Müəllimlər tələbələrin gözü ilə"

"Əgər tələbələrə qarşı hər hansı bir haqsızlıq baş verərsə, onu qəzetinizdə işıqlandırarsınızmı" sualına Anar müəllim belə cavab verdi: "Zaçot və imtahan sessiyalarına hazırlığın vəziyyəti və gedişatı ilə bağlı yol verilən nöqsanlar, qeyri-obyektiv hallar, dərsə gecikən, öz mühazirəsini günün tələbləri səviyyəsində qura bilməyən, pedaqoji qaydalara riayət etməyən, tələbə-müəllim münasibətlərinə xələl gətirən əməkdaşlar haqqında ciddi yazılar dərc olunur və onlar yeri gəldikdə tənqid olunur. "Müəllimlər tələbələrin gözü ilə" rubrikası var ki, burada tələbələrin hər hansı bir müəllimin onlara qarşı etdiyi nöqsanlar əks olunur. Bu problem də öz həllini tez bir zamanda tapır".

Xüsusi İstedadlar Qrupu daha aktivdir

Redaktorun sözlərinə görə, qəzetə yazı verən tələbələr daha çox maliyyə, ümumi iqtisadiyyat fakültələrindəndir: "Əslində qəzetimizə, demək olar ki, bir çox fakültələrin tələbələri yazılar verirlər. Bütün fakültələrdən yığma, yəni istedadlı uşaqların daxil olduğu Xüsusi İstedadlar Qrupu var ki, buranın tələbələri hər zaman daha aktivdirlər. Universitetin qəzeti barədə orada təhsil alan tələbələrin də fikrini öyrənməyə çalışdıq. "İqtisadçı"nı tanımayan tələbə azlıq təşkil etsə də, fərqli fikirlər ortaya qoyanlar var. "Bir dəfə yazı vermişəm, həm də daimi olaraq qəzeti izləyirəm, şəxsən mənim üçün çox maraqlıdır öz yazımı orada görmək". Bu sözləri maliyyə fakültəsinin tələbələrindən biri dedi.

Söhrab da qəzetdə aktiv iştirak edən tələbələrdəndir: "Gələcək işimlə əlaqədar buraya yazı veməkdə maraqlıyam. Çünki hər yazıdan sonra bir az daha qələmim formalaşır". Qəzetdə gedən materialların maraqsız olduğundan şikayətlənən tələbələrə də rast gəldik. Onlar deyirlər ki, tələbələrin problemlərinə, onları maraqlandıran qeyri-rəsmi yazılara üstünlük versələr yaxşı olar.

Sevda Zahidqızı

Həftə içi.- 2011.- 24 may.- S. 6.