Qazaxıstanda Asiyanın IV "Davos Forumu" keçirilib

Mayın 3-4-də Qazaxıstanın paytaxtı Astana şəhərində növbəti - IV Beynəlxalq Astana İqtisadi Forumu keçirilib. Asiyanın "Davos Forumu" adlanan bu görüş dövlət səviyyəsində keçirilib, tədbirə dünyanın tanınmış siyasi və ictimai xadimləri, biznes nümayəndələri, mütəxəssislər və məşhur Nobel mükafatçıları dəvət edilib.

İqtisadi forumun açılışında iştirak edən Qazaxıstan Respublikasının prezidenti cənab Nursultan Nazarbayev toplantı iştirakçılarını salamlayaraq öz çıxışında qlobal inkişafın aktual məsələləri haqda müzakirələrin aparılmasının vacibliyinə toxunub.

Forum gündəlikdə duran bir sıra məsələləri, beynəlxalq Valyuta Sisteminin təkmilləşdirilməsi, ərzaq təhlükəsizliyi, iqtisadi innovasiya və alternativ energetika, turizmin inkişafı və regional inteqrasiya məsələlərini müzakirə edib. Plenar iclasın moderatoru BMT-nin baş katibinin müavini Noelin Heyzer məruzə üçün ilk sözü iqtisadiyyat sahəsində Nobel mükafatı laureatı Robert Mandellə (Kanada) verib. O, öz çıxışını müasir dünya iqtisadiyyatında cərəyan edən qlobalmiqyaslı proseslərin beynəlxalq əməkdaşlıq əsasında tənzimləmə yollarının təhlilinə həsr edib. İclasın birinci yarısında həmçinin, BMT-nin Avropa İqtisadi Komissiyasının icraçı katibi Yan Kubiş, BMT-nin Ərzaq və Kənd Təsərrüfatı təşkilatının baş direktoru Jak Diuf, Ümumdünya Turist Təşkilatının baş katibi Taleb Rifai, Xorvatiyanın keçmiş prezidenti Stepan Mesiç, iqtisadiyyat üzrə Nobel mükafatçısı Jon Neş və başqaları maraqlı çıxışlar ediblər.

Astana iqtisadi forumun işində Azərbaycandan Bakı Dövlət Universitetinin professoru Çingiz İsmayılov və Bakı Baş Gömrük İdarəsinin rəis müavini, iqtisadiyyat üzrə fəlsəfə elmləri doktoru Vurğun Süleymanov iştirak edib. Professorlar Ç.İsmayılov və V.Süleymanov regional inteqrasiya və turizmin inkişafı bölmələrinin işində iştirak edərək xarici alim və mütəxəssislərlə fikir mübadiləsi aparıb və bu sahədə əlaqələrin inkişaf etdirilməsi haqqında razılıq əldə ediblər.

Professor Ç.İsmayılovla söhbətdə Beynəlxalq Turizm Təşkilatının rəhbəri cənab Taleb Rifai Azərbaycanda turizmin inkişafına dövlət səviyyəsində yüksək dəstəyin olmasını bəyənərək, respublikamızla əməkdaşlığın dərinləşdirilməsində maraqlı olduğunu bildirib.

Professor Ç.İsmayılov həmçinin, İsveçin Turist İndustriya Federasiyasının prezidenti Jan Lundinlə görüşərək respublikamızda "Turizm ili"nin keçirilməsi haqda həmsöhbətini məlumatlandırıb. Cənab J.Lundin turizm sahəsində ölkələrimiz arasında bu istiqamətdə əməkdaşlığın inkişafına dəstək vermək arzusunda olduğunu bildirdi.

İqtisadiyyat üzrə fəlsəfə elmləri doktoru V.Süleymanov forum çərçivəsində keçirilən "Astana İnvest 2011" sərgisində Qazaxıstanın iş adamları ilə görüşərək Azərbaycandakı investisiya mühiti barədə onları məlumatlandırıb.

Ceyhun

Həftə içi.- 2011.- 13 may.- S. 5.