Serialların çəkilişinə ayrılan vəsait artırılacaq

"Azərbaycanda sovet dövründə və müstəqillik illərində çəkilmiş bədii filmlərin qiymətləndirilməsinə yenidən baxılmalıdır"

Milli Televiziya və Radio Şurası (MTRŞ) milli televiziya filmlərinin və teleserialların çəkilməsi üçün 300 min manat vəsaitin ayrılması ilə bağlı artıq bir neçə telekanalla müqavilə bağlayıb. Bu barədə MTRŞ sədri Nuşirəvan Məhərrəmli bildirib. Onun sözlərinə görə, artıq "Xəzər", "ATV", "Space" və İctimai Televiziya ilə belə müqavilələr bağlanıb. Digər kanallarla bağlı da yaxın günlərdə müqavilələr imzalanacaq.

Nuşirəvan Məhərrəmli deyib ki, bu həftə MTRŞ maliyyə məsələləri ilə bağlı sənədləri hazırlayacaq, bundan sonra Maliyyə Nazirliyi həmin vəsaiti kanallara ödəyəcək: "Artıq bəzi kanallar daxili imkanları hesabına bu işə başlayıb. Serialların ilk 4 bölümü çəkiləndən sonra bölümlərə yaradıcı heyətlə birgə baxış keçiriləcək, müəyyən qiymətləndirmələr aparılacaq".

Şura sədrinin sözlərinə görə, ayrılan məbləğ ilkin vəsaitdir. Dekabr ayında bu proses ozünün daha aktiv fazasına daxil olacaq. Ölkə prezidenti tərəfindən milli televiziya filmlərinin və serialların çəkilməsi üçün ayrılan 5 milyon manat vəsaitin qalan hissəsi də tədricən telekanalların hesabına köçürüləcək: "Bu, 2011-ci il üçün ayrılan vəsaitdir. Ola bilər ki, bu vəsaitin bir hissəsi gələn ilə də keçsin. Amma gələn il vəsaitin daha da artırılması nəzərdə tutulur. Bundan sonra MTRŞ telekanallarda xarici filmlərlə bağlı qərar verə bilər". Regional televiziya kanallarına da milli televiziya filmləri və serialların çəkilməsi üçün vəsaitin ayrılıb-ayrılmayacağına gəlincə, MTRŞ sədri hələlik bunun mümkün olmadığını deyib: "Regional kanalların texniki bazası çox zəifdir. Serialların çəkilməsi ilə bağlı problemləri yarana bilər. Telekanallarla bağladığımız müqavilədə belə bir bənd var ki, dövlət televiziya filmlərinin mülkiyyətçisi kimi ondan öz ehtiyacları üçün istifadə edə bilər. Mən telekanalların rəhbərləri ilə də danışmışam. Çəkilişlər qurtarandan sonra biz o serialları çox cüzi qiymətə və ya vəsait ödəmədən regional kanallara da verəcəyik ki, onlar da ondan istifadə edə bilsinlər. Çox cüzi qiymət deyəndə, həmin serialın saxlanmasına və yenilənməsinə çəkilən xərclər nəzərdə tutulur".

"Azərbaycanda sovet dövründə və müstəqillik illərində çəkilmiş bədii filmlərin qiymətləndirilməsinə yenidən baxılmalıdır. Bu filmlərin ekranda az görünməsi narahatedici faktdır".

Bunu da çıxışı zamanı Nuşirəvan Məhərrəmli deyib. MTRŞ sədri bu məsələ ilə bağlı Mədəniyyət və Turizm Nazirliyinə və Müəllif Hüquqları Agentliyinə məktubla müraciət etdiklərini bildirib: "Qəbul edə bilmərik ki, büdcədən ayrılmış vəsait hesabına çəkilmiş filmlərin hər saatına 60-70 manat ödənilsin. Bu, həddindən artıq yüksək qiymətdir. Bu filmlərə qoyulan qiymət o filmlərin saxlanmasına və yenilənməsinə sərf olunmalıdır ki, bunun üçün də 10-20 manat kifayət edir. Bəzi televiziya şirkətləri şikayətlənirlər ki, yalnız bayram günlərində milli filmləri nümayiş etdirə bilirlər. Bu məsələni yenidən gündəmə gətiririk ki, qiymətləndirmə real olsun və kanallar o filmləri tez-tez göstərə bilsin. Həmin filmlər dövlət mülkiyyəti sayılır. Amma o zaman "Azərbaycanfilm" kinostudiyası bu filmləri çəkəndən sonra onun mülkiyyət hüququnu əldə edib. Hansı əsaslarla, bəlli deyil. Təbii ki, mülkiyyət hüququ Mədəniyyət və Turizm Nazirliyində olmalıdır".

Nigar İxtiyarqızı

Həftə içi.- 2011.- 1 noyabr.-S. 8.