Kür qırağının əcəb seyrəngahı var

 

Mütəxəssislər Kürqırağı zonadakı turizm potensialından yararlanmağı təklif edir

 

Kür çayının Azərbaycan ərazisindən keçən hissəsinin 400-500 kilometrə qədəri çay turizmi üçün yararlıdır. Ancaq bundan istifadə olunmur. Halbuki bu, Aran bölgəsində bir çox problemlərin həllinə səbəb olar.

Bu fikir dünən Beynəlxalq Mətbuat Mərkəzində "Azərbaycanda qeyri-ənənəvi turizmin inkişaf etdirilməsi" mövzusunda keçirilən mətbuat konfransında səsləndirilib. Azərbaycan Regional Turizm Mərkəzinin direktoru Çingiz İsmayılov tədbirdəki çıxışında deyib ki, ölkədə çay turizminin inkişafı üçün böyük imkanlar var. Onun sözlərinə görə, çay turizmi bu Kürqırağı ərazilərdə məşğulluğun artması, balıqçılığın inkişafı, eyni zamanda Kürün lildən tutulmaması üçün əla vasitədir.

Mütəxəssis, eyni zamanda, ada turizminin inkişaf perspektivlərindən və onun vacibliyindən də söz açıb. O qeyd edib ki, turizmin istənilən sahəsində uğura nail olmaq üçün böyük layihələrdən daha çox kiçik və orta sahibkarlığın inkişafı daha əlverişlidir.

Tədbirdə Azərbaycan Turizm Assosiasiyasının sədrinin müşaviri Müzəffər Kərimov də çıxış edib. O, qeyri-ənənəvi turizmin inkişafı imkanlarından danışarkən turizm obyektlərində yüksək keyfiyyətli xidmətin təşkil olunmasının vacibliyini vurğulayıb: "Bizdə aqroturizmin inkişafı üçün mütəxəssislərə ehtiyac var. Bunun üçün mən Polşaya - aqroturizm və yaşıl kənd turizminin inkişaf etdiyi ölkəyə infoturların təşkil edilməsini təklif edərdim".

Azərbaycan Turizm İnstitutunun kafedra müdiri Bahadır Bilalov isə gələn il Azərbaycanın "Eurovision" müsabiqəsinə ev sahibliyi edəcəyini xatırladıb və deyib ki, bu müddətdə ölkəyə çoxlu sayda turist təşrif buyuracaq: "Həmçinin noyabrın əvvəlində Göyçayda nar bayramı keçiriləcək. Biz çalışmalıyıq ki, bayramlarımızda da ölkəyə turist cəlb edə bilək".

Geniş və ətraflı çıxışlarla əhatə olunan tədbirdə səslənən təkliflərin İqtisadi İnkişaf Nazirliyi nəzdində fəaliyyət göstərən Sahibkarlığa İnkişaf Fonduna təqdim olunacağı bildirilib.

 

 

Pərvin İsmayılova

 

Həftə içi.- 2011.- 2 noyabr.- S. 8.