Kamil bir palançı olsa da insan...

Azərbaycanda peşə təhsilinə maraq artır

Hər sənətin öz gözəlliyi, öz yeri var, deyirlər. Son illərin araşdırılmaları göstərir ki, texniki peşə təhsilinə maraq ildən-ilə artır. Xüsusən rabitə, nəqliyyat, elektron texnika, neft-energetika, xalçaçılıq, bərbər, reklam işi ixtisaslarına marağın böyüdüyü maşahidə olunur. Artıq peşə məktəblərində müasir dövrün tələblərinə uyğun ixtisaslı kadrlar hazırlanır. Bazar iqtisadiyyatı şəraitində peşə təhsilinə diqqətin artırılması, ali təhsillilərlə yanaşı, ixtisaslı fəhlə kadrlarının işlə təminatı da öz həllini tapıb.

13 yaşlı Bakı Peşə Məktəbi yeganə təhsil ocağıdır ki, burda xalçaçılığın sirrləri öyrədilir. 1982-ci ildən Maştağada fəaliyyətə başlayan bu məktəbdə zəngin təcrübəyə malik bacarıqlı kadrlar çalıçır. Məktəbin direktoru Səidə Səlimzadə burada peşə və ixtisaslar üzrə 6 fənn kabineti, 1 kompyuter otağı, hərbi hazırlıq kabneti, idman zalı fəaliyyət göstərir. Bundan başqa, məktəbdə 3 tədris-itehsalat emalatxanası və 2 mərtəbəli laboratoriya da var.

Məktəbin texnika üzrə ixtisas fənn müəllimi Sima Hüseynova 25 ildir ki, burda çalışır. Sima müəllimə bildirir ki, məktəb Maştağa qəsəbəsində yerləşməsinə baxmayaraq, ətraf kəndlərdən də burada təhsil alan şagirdlər çoxdur. Onun sözlərinə görə, peşə məktəbində 8 ixtisas müəllimi, 13 istehsalat təlim ustası çalışır. Hazırda məktəbdə xalçaçı, tikişçi, tikiş avadanlığının operatoru, aşbaz, qənnadçı, ərzaq malları satıçısı, nəzarətçi-kassir ixtisası üzrə 259 şagird dövlət hesabına, mühasib-fərdi kompyuter operatoru qadın bərbəri-manikurs, eləcə də aşbaz qənnadı peşəsi üzrə 60 gənc oğlan və qızlar ödənişli əsaslarla təhsil alır.

Sima Hüseynova onu da bildirir ki, gənc qızlar xalçaçı peşəsinə böyük həvəs göstərirlər. O, xalçaçılarda Aygül Bağırovanın, Aynurə Novruzovanın, Vüsalə Babayevanın adlarını fəxrlə çəkir və deyir ki, məktəbdə gənc kadrlara çox üstünlük verilir.

Peşə məktəbləri arasında Dəmir Yolu Liseyinin xüsi yeri var. Bakı Metropoliteni üçün ixtisaslı fəhlə kadrları hazırlayan lisey 1923-cü ildə 1 saylı fabrik-zavod peşə məktəbi, 1941-ci ildə 1 saylı dəmir yol peşə məktəbi, 1955-ci ildə 4 saylı şəhər texniki peşə məktəbi, 1969-cu ildə 2 saylı şəhər orta texniki peşə məktəbi adlandırılıb. 1996-cı ildən Nazirlər Kabinetinin qərarı ilə Dövlət Dəmir Yolu Liseyi adlandırırlan bu təhsil ocağı indiyədək Dövlət Dəmir Yolu və Bakı Metropoliteni üçün 35000-dən çox ixtisaslı fəhlə kadrları hazırlayıb. Azərbaycanın ictimai-siyasi mədəni həyatında mühüm rol oynayan ziyalılarımızın bir çoxu bu məktəbin yetirmələridir.

Liseyin Tədris istehsalat üzrə direktor müavini Sədaqət Nəbiyeva deyir ki, burada metropoliten maşinisti köməkçisi, elektrovoz maşinisti köməkçisi, dəmir yol stansiya köməkçisi ixtisası üzrə 400-dən çox şagird təhsil alır. Təhsil müddəti 3 il, 1 il, 6 ay olmaqla hər qrupda 20 şagird var: "Şagirdlərimiz bu ixtisasa həvəslə yiyələnirlər. Hər il gənc kadr kimi Bakı Metropoliteninin müxtəlif sahələrində işlə təmin olunurlar".

Vətən sevgisi, vətəndaşlıq borcu elə ilk növbədə məktəbdən başlayır. Bu günün şagirdi - sabahın əsgərləri, müəllimi-mühəndisi, həkimi, alimi və çilingəridir. Odur ki, daşıdığımz peşədən, sənətdən asılı olmayaraq hər birimiz əməllərimizlə vətənə xidmət edirik.

İradə Cavadova

Həftə içi.- 2011.- 5-10 noyabr.- S. 12.