"Kişi və qadın" Mingəçevir teatrında...

Bu günlərdə Əli Əmirlinin "Kişi və qadın" adlı iki hissəli epataj komediyası əsaslı təmirdən sonra 43-cü teatr mövsümünü açan Mingəçevir Dövlət Dram Teatrının ifasında tamaşçılara təqdim edildi. Bu barədə "Həftə içi"nə məlumat verən teatrın direktoru, əməkdar mədəniyyət işçisi Həsən Həsənov deyib ki, bu tamaşa Əli Əmirlinin Mingəçevir teatrında tamaşaya qoyulan dördüncü əsəridir:

"Dramaturqun komik-dramatik səpkidə işlədiyi bu komediyada dramatik situasiya gözlənilməz olduğu qədər də maraqlıdır. Hadisələr tamaşaçının diqqətini elə ilk səhnələrdən səfərbər edir. Bir-birilərini əvəz edən qəfil dönüşlərlə, gərgin psixoloji məqamlarla müşayiət olunan komik səhnələr, ekssentrik vəziyyətlər, vərdiş etdiyimiz həyat normalarını pozan epataj hadisələr quruluşçu rejissor Sərvər Əliyevin yozumunda adi məişət komediyası modelində deyil, sırf teatral həyat modeli kimi təqdim edilir".

Tamaşanı müşayiət edən sürəkli alqışlar işin uğurlu alınmasının bariz göstəricisi idi söyləyən teatrın rəhbəri alqışların onların işi üçün çox yüksək qiymət olduğunu da söylədi: "Tamaşada teatrımızın istedadlı aktyorları Günel Əhmədova, Şıxı Yaqubov, Zülfi Məmmədov, Fəridə Məmmədova, Ruhəngiz Abdullayeva, Afət Əliyeva və rejissorun özü Sərvər Əliyev gözəl oyun göstərə bildilər. Rəssamı Rafael Haşımov, musiqi tərtibatçısı isə Elnur Rəsulov olan tamaşa haqda cəsarətlə deyə bilərəm ki, Mingəçevir teatrı çoxdan belə bayram əhvalında olmamışdı."

Onu da deyək ki, dünyanın özü qədər qədim və əbədi bir mövzuya - kişi və qadın münasibətlərinin qəribəliklərinə həsr olunan bu komediyanı dramaturq 2004-cü ildə qələmə alıb. Əsər elə yazıldığı ildə də Dövlət Gənclər Teatrında mərhum rejissor Hüseynağa Atakişiyevin quruluşunda uğurla səhnələşdirilib. Bundan sonra əsər ölkənin bir sıra teatrlarına da vəsiqə alıb. Axırıncı dəfə "Kişi və qadın" bu ilin aprel ayında Qusar Dövlət Dram Teatrında ləzgi dilində səhnələşdirilib.

Pərvin İsmayılova

Həftə içi.- 2011.- 22 noyabr.-S. 6.