10 illik "Olimpiya dünyası"

Milli Olimpiya Komitəsi və Azərbaycan Mətbuat Şurası "Olimpiya dünyası" qəzetinin 10 illik yubileyi ilə bağlı dəyirmi masa keçirib.

Mətbuat Şurasında keçirilən tədbirdə qurumun sədri Əflatun Amaşov sözügedən nəşrin Azərbaycanda olimpiya hərəkatındakı rolundan danışıb. "Olimpiya dünyası"nın hər zaman ölkəmizin idman həyatının dinamikasına adekvat fəaliyyət göstərdiyini deyən Əflatun Amaşov nəşrin idman jurnalistikasının inkişafında, bədən tərbiyəsinin kütləviləşməsində başlıca təbliğat vasitəsinə çevirildiyini və Azərbaycanın idman ictimaiyyəti tərəfindən həvəslə qarşılandığını diqqətə çatdırıb.

"Qəzet jurnalistikamızın ənənələrinə sadiqliyi ilə də öncüllərdəndir. Bu isə "Olimpiya dünyası"nın rəhbərliyinin öz işinə məsuliyyətlə yanaşmasının, formalaşdırdığı işgüzar kollektivin də eyni keyfiyyətlərin daşıyıcısı olduğunun bariz göstəricisidir. Güman edirəm ki, qəzet qarşıdakı müddətdə prinsiplərinə yenə sadiqliyi ilə seçiləcəkdir", - deyə o əlavə edib.

Əflatun Amaşov bildirib ki, "Olimpiya dünyası" qəzetinin 10 illik yubileyi ilə bağlı mərasimin təşkili rəhbərlik etdiyi qurumun Milli Olimpiya Komitəsi ilə birgə reallaşdırdığı layihənin tərkib hissəsidir. Layihə barədə məlumat verən şura sədri onun başlıca məqsədinin ölkədə idmanın təbliğinə dəstək vermək olduğunu söyləyib. Birgə əməkdaşlıq çərçivəsində idman jurnalistikasının daha da inkişafına yönələn genişmiqyaslı tədbirlərin həyata keçiriləcəyini nəzərə çatdırıb.

Çıxış edənlərdən Mətbuat Şurası sədrinin müavini, Beynəlxalq Avrasiya Mətbuat Fondunun rəhbəri Umud Rəhimoğlu, şuranın idarə heyətinn üzvləri, "İki sahil" qəzetinin baş redaktoru Vüqar Rəhimzadə, "Bakı xəbər" qəzetinin baş redaktoru Aydın Quliyev, "Paralel" qəzetinin baş redaktoru Tapdıq Abbas, həmçinin "Yeni Azərbaycan" qəzetinin baş redaktoru Hikmət Babaoğlu, "Xalq qəzeti"nin baş redaktor müavini Tahir Aydınoğlu, "İdman" qəzetinin baş redaktoru Qabil Mehdiyev və başqaları çıxışlarında bildiriblər ki, Azərbaycanda idmanın geniş vüsət almasında dövlət siyasətinin müstəsna rolu var və bu yöndə qazanılmış uğurların, tətbiq olunan yeniliklərin təkcə vətənimizdə deyil, onun hüdudlarından kənarda da təbliği mühüm yer tutur. Natiqlər həmçinin Mətbuat Şurasının MOK ilə əməkdaşlığının idman jurnalistikasındakı ixtisaslaşmanın dərinləşməsinə xidmət baxımından məhsuldar olacağına əminliklərini ifadə ediblər.

Sevda Zahidqızı

Həftə içi.- 2011.- 22 noyabr.- S. 8.