"Mən bir Bakı qızıyam"

Hasibə Şahoğlu: "Fürsət tapan kimi mütləq Azərbaycana gəlmək fikrim var"

ŞKTC-nin Birləşmiş Ərəb Əmirliklərində təmsilçisi Hasibə Şahoğlu ilə "Həftə içi"ndə eksklüziv söhbət

Xeyli müddət öncə Türkiyənin Azərbaycandakı səfirliyində katib vəzifəsində bir xanım diplomat çalışırdı - Hasibə Şahoğlu. Onu tanıyandan, jurnalist olaraq ünsiyyət qurduqdan sonra bu xanımın əslində Şimali Kipr Türk Cümhuriyyəti (ŞKTC) vətəndaşı olduğunu bildik. Həm də ürəyi şeir-sənətlə döyünən bu xanım öz yaradıcılığında Şimali Kiprlə yanaşı Türkiyə, eyni zamanda, Azərbaycanla bağlı çox sayda şeirlərin sahibidir. Hətta xatırladığımız qədər, o, Azərbaycanda olarkən növbəti kitablarından birini məhz Bakıda çap etdirmişdi.

Azərbaycandan ayrılandan sonra Şimali Kiprin Pakistana səfiri təyin olunan Hasibə xanım bu uzaq dost ölkədə vəzifə müddətini başa vurandan sonra bu gün ölkəsini Birləşmiş Ərəb Əmirliklərində təmsil etməkdədir. Yeri gəlmişkən, Hasibə xanım Pakistanda səfir olarkən də "Həftə içi"nə müsahibə vermişdi. Ənənəmizə sadiq qalaraq onunla yenidən müsahibə etmək arzumuzu bildirdikdə ürəkdən razı qaldı və Əbu-Dabidə vəzifəsinin icrasına yenicə başladığı günlərdə suallarımızı cavablandırdı.

Xanım diplomat bizimlə söhbətə Birləşmiş Ərəb Əmirliklərində keçirdiyi günlərindən, işindən söz açmaqla başladı.

- Birləşmiş Ərəb Əmirliklərinə gəldiyim və vəzifəmin icrasına başladığım hələ cəmi bir aydır. Buradakı təmsilçiliyimiz də eynən Azərbaycanda olduğu kimi Ticarət və Turizm Nümayəndəliyi şəklində fəaliyyət göstərir. Hələlik, hansısa özəl bir status daşımırıq. Amma deyim ki, Birləşmiş Ərəb Əmirlikləri ilə Şimali Kipr Türk Respublikasının hər ikisinin dəniz sahilində yerləşməsi məni darıxmağa qoymur. Şimali Kiprlə müqayisədə burada havalar daha isti keçir. Hətta deyim ki, Birləşmiş Ərəb Əmirliklərində yay 10 ay davam edir. Yerdə qalan iki aya da qış demək olmaz, çünki havalar olduqca mülayim keçir. Burada hara baxırsan, nəzərə əcnəbilər dəyir. Hindistan, Pakistan, Filippin və sair ölkələrdən gələnlər daha çoxdur. Amma onu da deyim ki, Birləşmiş Ərəb Əmirliklərində idarəetmə sistemi çox gözəl qurulub. Ölkənin hər yerində məskunlaşmış əcnəbilər ən müasir nəzarət sistemində saxlanılır, bu ölkəyə gələn hər bir kəs mütləq qeydiyyata alınır. Küçə və meydanlar tərtəmizdir, göydələnlər tikilmiş şəhərlər çox sakitdir. Yəqin buna görədir ki, Əbu Dabiyə gəldiyim qısa müddət ərzində ölkəyə sürətlə alışmışam, adaptasiya olunmuşam.

- Dünya birliyi tərəfindən tanınmayan ŞKTC-yə Əbu-Dabidə münasibət necədir? Əmirliklərin vətəndaşı olan ərəblərin Şimali Kipr, ümumiyyətlə, dünyanın hər yerində yaşayan türklərin barəsində nələr düşünürlər? Yəni millətimizə münasibət necədir?

- Bayaq da dedim: biz burada Ticarət və Turizm Təmsilçiliyi şəklində fəaliyyət göstəririk. Ancaq ərəblərin türklərə münasibəti çox yaxşıdır. Şəxsən mənim müşahidəmə əsasən, onlar hər bir məsələdə türklərə kömək göstərməyə çalışırlar. Yeri gəlmişkən, hazırda Birləşmiş Ərəb Əmirliklərində çox sayda Türkiyə vətəndaşı yaşayır. Hətta bu günlərdə bir çox azərbaycanlı ilə qarşılaşmışam. Söhbət əsnasında başa düşdüm ki, hamısı burada yaxşı yaşayır, heç bir problemləri yoxdur.

- Əbu Dabidəki vəzifənizdə yeni olsanız da, əslində bir diplomat olaraq çox təcrübəli xanımsınız. Hətta Pakistan kimi nəhəng və daxili siyasəti qarışıq olan bir dövlətdə səfir olmusunuz. Bəs bu gün 7 əmirliyi birləşdirən, ərəb-müsəlman cəmiyyətinə sahib bir dövlətdə işləmək sizə çətinlik yaratmır ki?

- Hələlik, hər hansı çətinliklə rastlaşmamışam. Bilirsiniz, diplomat hər yerdə eyni cürdür. Əgər söhbət diplomatın qadın və ya kişi olmasından gedirsə, burada da problem yoxdur. Birləşmiş Ərəb Əmirliklərində isə ümumiyyətlə, qadın diplomatlar yaxşı qarşılanır.

- Əbu Dabidə olduğunuz müddətdə Türkiyə və Azərbaycan diplomatları ilə əlaqələriniz necədir?

- Hansı ölkədə olmağımıza baxmayaraq türkiyəli diplomatlarla həmişə əməkdaşlıq şəraitində işləyirik və bu ölkədə də eyni cür fəaliyyət göstəririk. O ki qaldı Azərbaycan səfirinə, təəssüf ki, hələlik onunla tanış olmamışam. Amma ən yaxın vaxtlarda Azərbaycan səfirliyinə gedib Şimali Kipr nümayəndəliyi ilə əlaqələr yaratmaq planım var.

- Məncə, Azərbaycan səfirliyi ilə münasibətlərinizin koordinasiya olunması Şimali Kipr nümayəndəliyi olaraq xeyrinizədir...

- Azərbaycanlı diplomatlarla görüşüb, tanış olmaq niyyətimiz qətidir. Hətta deyim ki, gələcəkdə onlarla mütəmadi əlaqə saxlayacağıq. Bilirsiniz, mən bir Bakı qızıyam, Azərbaycan mənim ata vətənimdir. Hansı ölkədə olsam da, Azərbaycanı vətənim, ana yurdum kimi sevib, müdafiə edirəm.

- Bu gün Ərəb Əmirliklərində çox sayda Türkiyə və Azərbaycan türkü yaşamaqdadır. Nəzərə alsaq ki, dünyanın hər yerində türk və azəri diaspor təşkilatları birlikdə fəaliyyət göstərir, o zaman Birləşmiş Ərəb Əmirliklərində də eyni cür işləməyin faydası böyük olardı. Bəs siz necə, bu diaspor təşkilatlarla əlaqə saxlamaq niyyətindəsinizmi?

- Haqlısınız. Əlbəttə ki, Azərbaycan, Türkiyə və Şimali Kipr türkləri daima birlikdə hərəkət ediblər, hər zaman bir-birilərinin haqlarını müdafiə endiblər. Əminəm ki, burada da vəziyyət eynən dediyim kimidir. Ancaq məsələ ondadır ki, mən bu ölkəyə yeni gəlmişəm, ona görə də hələlik imkan tapıb bu məsələdə hansısa addımı ata bilməmişəm. Amma bu məsələ hər zaman bizim planımızın bir hissəsi olub, yəqin ki, diaspor təşkilatlarının nümayəndələri ilə görüşüb, müzakirələr aparacağam.

- Gəlin bir az da nostalji hisslərinizdən söz açaq. Çoxdandır ki, Azərbaycanı tərk etmisiniz, ölkəmizi necə xatırlayırsınız?

- Azərbaycanı bəyəm unutmuşam ki, xatırlayım da? Bu ölkə həmişə ürəyimdədir. Orada çox sayda dostlarım var ki, indi də yazışırıq, telefonla əlaqə saxlayırıq. Hətta Bakıda vəzifəmi başa vurandan sonra iki dəfə oraya getmişəm. Bakı və digər şəhərləriniz xatirimdən çıxmır. Allah qoysa fürsət tapan kimi mütləq Azərbaycana getmək fikrim var. Hamınız üçün darıxmışam, çox istərdim sizləri yenidən görüm. Eşitmişəm geridə buraxdığımız illərdə Bakı çox inkişaf edib və bu tərəqqidən qürur duyuram. İnşallah Qarabağ münaqişəsi də həllini tapacaq və Azərbaycan heç bir problemi olmayan ölkəyə çevriləcək.

- Azərbaycanda işlədiyiniz müddətdə şeirlər yazardınız, hətta bir kitab da yayınlamışdınız. Yaradıcılığınızı davam etdirirsinizmi və daha çox hansı janrlarda yazırsınız?

- Əlbəttə ki, yaradıcılığımı davam etdirirəm, çox sayda yeni şeirlərim var. Azərbaycandan sonra fəaliyyət göstərdiyim İslamabadda da bir şeir kitabı çap etdirdim. İndinin özündə də nəşrini gözləyən çox sayda əsərlərim var. İnşallah yaxın vaxtlarda onları da çap etdirəcəyəm.

P.S. Son olaraq oxucularımız üçün də maraqlı olacağını nəzərə alıb Hasibə Şahoğlundan Azərbaycandan bəhs edən şeirlərindən birininin bizə söyləməsini xahiş etdik və təbii ki, o da çox böyük məmnuniyyətlə razılaşdı. Yeri gəlmişkən, Hasibə xanımla hələ Pakistanda səfir olarkən də müsahibə dərc etmişdik və xanım diplomat o zaman da qəzetimiz vasitəsilə oxucularımıza şeirlərindən birini demişdi. Bu dəfə isə 2003-cü ildə yazdığı "Azərbaycan"ı şeirsevərlərin diqqətinə çatdırırıq:

"Azərbaycan"

Mən Bakını sevdim

Gülən gözlərin sıcaklığında,

Xəzərin azğın dalğalarını,

Məhrəm sirlərini sevdim.

Gedənlərin ardıyca yellənən əllərdəki

Hüznün sıcaklığını,

Anma günlərindəki acıyı,

Sevinci paylaşmayı

Mən Azərbaycanı sevdim.

Yemək kültürünü,

Ceviz, qarpız məcununu

Ləhcələrimizdəki bənzərliyi

İçtən qonaqsevərliyi sevdim.

Sevdim sevəbildiyimcə

Eyni millət qururuyla,

Heyran oldum rəsminə,

Könül verdim nəğməsinə,

Özgün rəqslərini sevdim.

Mən Azərbaycanı sevdim

Paylaşdığım tarixlə,

Kültürümlə, ceddimlə,

Sevdim və ürəyimə qoydum bütünlüklə.

Vüsal Tağıbəyli

Həftə içi.- 2011.- 29 noyabr.- S. 1;3.