"Papaq özü bir sənət əsəridir"
Xalqımızın ən qədim sənətlərindən
biri də papaqçılıqdır. Hətta dahi Nizaminin əsərlərində
yarımçıq papaqçılıq barədə fikirlərə
də rast gəlmək olar. Çox təəssüf olsun ki,
hazırda bu sənətə az insanlar meyil edir. Və bu sənətin
xiridarları da sən deyən elə çox deyil. İndi
paytaxtda bu sənətlə məşğul olan çox az
sayda papaqçıya rast gəlmək olar. Onlar da milli
papaqlarımızı bir milli atribut kimi nəinki qoruyub
saxlayır, hətta onu dünyada da tanıtdırırlar. Bir
neçə gün bundan öncə Milli Parkda keçirilən
sərgidə qədim xalçaçılıq, digər
nümunələrlə yanaşı, milli papaqlarımız da
nümayiş etdirildi.
Gənc olsa da, artıq kifayət qədər
tanınmış papaqçı Zaur Uruxovla elə sərgidə
tanış olduq. Sərgidən sonra vaxt tapıb sənətkarla
iş yerində görüşə bildik. Zaur Uruxovla söhbətimiz
papaqçılıq sənətinin bugünkü durumu ilə
bağlı oldu.
- Zaur bəy, bildiyimiz kimi, papaq xalqımız
üçün dəyərlər simvoludur. Sizcə bu
papağa münasibət dəyişib, yoxsa...
- Papaq kişilik simvoludur. 5-10 il bundan əvvəl
"norka" papaqlara daha çox üstünlük verərdilər.
Artıq gənclərimiz, yəni yeni yetişən nəsil
öz tariximizi öyrənir, yaxın keçmişimizə
qayıdır. Bir o qədər də milli papağa maraq
artır. Hətta biz şəkil çəkdirəndə də
rusun yox, öz milli papağımızla şəkil çəkdiririk.
Bu da bir məharət, qürurdur. Milli papaq hər bir kişiyə
ilham verir. Hər bir insana qaçaq Nəbi, Hacı Zeynalabdin
Tağıyev, Ələkbər Sabir ruhu aşılayır. Hərdən
gəlib soruşurlar ki, bura dərzidir? Biz onlara iftixarla cavab
veririk xeyr, biz papaqçıyıq. Hələ də
insanlarımız dərzi ilə papaqçını səhv
salırlar.
- Bəs necə oldu ki, bu sənəti seçdiniz.
- Biz nəsillikcə papaqçı olmuşuq.
Üç əsrə yaxındır ki, bu sənəti davam
etdiririk. Məni də bu sənətə dayım gətirib.
Dayım Sədini ölkəmizdə tanımayan az adam
tapılar. Ən məşhur sənətkardır. Mənə
dedi ki, bu kişi sənətidir və papağın sirlərini
mənə öyrətdi.
- Papağın nə kimi
sirləri var?
- Papağın sirlərindən
biri quzu dərisindəki güllərin
istiqamətinin düzgün
təyin olunmasıdır.
Elə ustalar var ki,
dərini tərsinə
biçir. Amma əslində
papaq başa qoyulanda onun gülləri soldan sağa doğru getməlidir. Onda dəri
daha parlaq və daha gözəl
görsənir.
- Siz deyə bilərsinizmi neçə
adda papaq var.
- Papağın növləri
çoxdur. Onlardan seyid papağı,
bəy papağı, qoçu papağı, qulaqlı papaq, motal papaq, hacı
papağını göstərmək
olar. Əsas milli papaq isə hündürlüyü
11 santimetrdən çox
olmayan yumuru papağımız olan bəy papağıdır.
- Bəs papağın
qoyuluşu necə olmalıdır?
- Çox gözəl
sualdır. Çox adam bunu
bilmir. Necə gəldi papağı
başından çıxardıb
onu yerə atır. Əslində belə olmamalıdır.
Papaq başdan çıxardılandan
sonra yan üstə qoyulmalıdır.
Çünki papaq kişinin
namusu, qeyrətidir.
Papağı ağzı
üstə qoymazlar, kişinin qeyrətini hes kəs
ağzı üstə
qoya bilməz. Papağı
nə arxası üstə, nə də beli üstə
belə yerə qoymaq olmaz, bu
papaq geyən kişilərin kürəyini
yerə qoymaq deməkdir. Gülləri xırda dəridən
tikilən papağı
üzdən arıq insanlar başa qoyur ki, papaq
ona yaraşsın.
İri gülləri olan papağı üzü iri adamlar başa
qoyur. Papaqla kişinin üz
simmetriyası uyğun
gəlməlidir. Yəni
papaq kişini kişi kimi
göstərməlidir.
- Papaq sifariş
edənlər azalıb,
yoxsa artıb?
- Əvvəlki illərə nisbətən
indi papaq sifarişçilərinin sayı
artıb. Belə ki, 10 il bundan
əvvəl 100 kişidən
20-si papaq sifariş edirdisə, ondan da 10-u qulaqlı papaq olardı. Amma indi 100 kişidən 60-65-i
sifariş edir, onların da çoxu milli papağa üstünlük
verir. Onu da qeyd edim ki, respublikanın
tanınmış əksər
aşıqları da papaqlarını bizə tikdirir.
- Əgər sirr deyilsə, deyə bilərsinizmi müştəriyə papağı
neçəyə tikirsiniz?
- Qiymətlər müxtəlifdir.
Əgər papaq qara dəridəndirsə 50-100 manat,
əntiq dəridən
tikilən papaq daha baha, 100 manatdan yuxarı qiymətə başa gəlir.
- Papaq sizin özünüz üçün
nədir?
- Papaq mənim üçün kişilik
simvoludur. Çünki
kişinin papağını
da kişi
tikər.
- Azərbaycanda neçə
nəfər papaqçı
qalıb? Məşhur papaq ustalarından
kimləri tanıyırsınız?
- Azərbaycanda papaqçını
barmaqla saymaq olar. Hazırda bu sənəti
bizə öyrədən
tanınmış ustalardan
ağdamlı Əyyub
dayını, şəkili
Qurban kişini, sabirabadlı Ramizi və balakənli Sədi dayını tanıyıram. Onlar bu sənəti qoruyub saxlamaqla yanaşı, gənc nəsilə də öyrədirlər.
Bu sənət yaşayıb, yaşayır
və yaşayacaq.
- Papağın
materialları barədə məlumat verməyiniz maraqlı
olardı.
- Papaq quzu dərisindən tikilir. Quzular kəsilmə gününə
görə müxtəlifdir.
Birgünlük quzudan tutmuş
10 günlüyə qədər
kəsilmiş quzuların
dərisindən tikilir.
Biz dərini əsasən
Buxara şəhərindən
gətirdirik. Həmin dərinin
birini 50-100 manata alırıq. Buxara dərisi
daha qiymətlidir.
- Bəs bizdə
quzu yoxdurmu?
- Bizdə o cür
heyvan saxlanılmır.
Ona görə ki, ən gozəl
ot Hollandiyadadır.
Buxaradakı qoyunları Hollandiyaya
apardılar, amma həmin keyfiyyəti vermədi.
Çünki bu keyfiyyətli
dərilər ancaq isti qumlu, çör-çöplü
olan yerdə alınır.
- Neçə ildir
sənətdəsiniz? Yetirmələriniz varmı?
- 11 ildir bu sənətdəyəm. Şagirdlərim İrşad Qazaxov, Vüqar İsmayılov və Qurban Xalayev artıq bu sənətə yiyələniblər. Yenə də
deyirəm bizdə papaq nəsillikcədir.
Biz də çalışırıq
ki, bu şərəfli
peşəni davam etdirək. Onu da nəzərinizə
çatdırım ki,
döyüşçü papaqları da var ona general papağı da deyirik. Halbuki vaxtilə o papaqları Atatürk, General Şıxlinski,
Cavadxan, İbrahim Xəlilxan, Şeyx Şamil, General Mehmandarov, Həzi Aslanov kimi kişilər başlarına qoyublar. Biz döyüş papaqlarını ancaq kinostudiya üçün
tikirik. Hal-hazırda
Cabbarlı adına
Azərbaycan kinostudiyası
sifarişlərini bizə
verir. Abbasqulu Ağa Bakıxanov
haqqında kino çəkilir. Artıq həmin
filmin baş rolları üçün
7-8 papaq tikmişik.
Hətta M.Ş.Vazeh, M.F.Axundovun rolunu oynayacaq aktyorlar üçün də papaq tikmişik.
- Nəyə görə
kinostudiya papaq sifarişini məhz sizə verir? Axı respublikamızda sizdən də yaşlı, təcrübəli papaqçılar
var?
- Sənətə
gərək sənətkar
gözüylə baxasan.
Bu sahədə ustad sənətçilərimiz
var. Biz də onlardan öyrənmişik. Amma
papağın rəmzləri,
inciləri, bu günə kimi açılmayan sirləri
var. Papağın üst
hissəsi göydə
Ayın formasını,
çöl dairəsi
Günəşin simvolunu,
içinin sırıqları
isə göyün qurşağını əks
etdirir. Papağın içərisindəki astarın üst hissəsi paxlava şəklində sırınır.
O da atəşpərəstlikdən
qalan və Novruz bayramında bişirilən paxlavanı
göstərir. Bunların hamısı
türkçülüyün əlamətlərini göstərir.
Ona görə də hər dövrün özünün sanballı
kişiləri olub.
Biz həmişə o milliliyi, o ənənələri
papaqda incilərinə
qədər yaşatmağa
çalışırıq. Bu sənət özü
bir elmdir. Gərək onun alimi olasan yaxşı
papaqçı ola bilərsən, amma bu inciləri
elmi sirlərini əgər bilməsən,
hardasa tikmələrində
xırdaca səhvə
yol verə bilərsən. Gərək papağı ölçüb,
biçəndə, onu
tikəndə ehtiyatlı
olasan. Dünyanın hansı ölkəsi
olursa-olsun bizim tikdiyimiz papaq tanınacaq. Çünki tikdiyimiz papaqda milliliyi incəliyinə kimi qoruyub saxlayırıq.
Bizim təkcə əllərimiz
yox, ruhumuz da işləyir. Biz hər papağa
sənət əsəri
kimi baxırıq.
Hətta
sərgilərdə də
iştirak edirik.
Xalq əl işimizə çox önəm və dəyər verir. Xarici ölkələrdən gələn turistlər də bizim milli
papağı alırlar.
Bir çoxları onu Azərbaycanın atributu kimi saxlayır, digər qismi isə alıb başına qoyur. Artıq əcnəbilərə də
papaq qoymağı öyrətmişik. Onlar bizim
milli papağı çox sevirlər.
Qələndər
Xaçınçaylı
Həftə içi.- 2011.- 5 oktyabr.- S.
7.