Bu gün Ümumdünya Turizm günüdür

Bakıda bununla bağlı bir sıra tədbirlər nəzərdə tutulub

Son illər ölkəmizdə turizm sektoru sürətlə inkişaf edir. Qeyd edək ki, Azərbaycanın zəngin təbiətə malik olması ölkəmizdə bu sahənin inkişafı üçün əlverişli imkanlar yaradıb. Məhz ölkə prezidenti tərəfindən 2011-ci ilin "Turizm ili" elan edilməsi də turizm sektorun Azərbaycan üçün xüsusi əhəmiyyətini göstərir. Xatırladaq ki, ilin sonuna kimi Azərbaycana gələn turistlərin sayının bir neçə dəfə artacağı gözlənilir. Mədəniyyət və Turizm Nazirliyindən verilən məlumata görə, cari ilin birinci yarısında ölkəyə bir milyondan çox turist gəlib ki, bu da ötən ilin analoji dövründən iki dəfə çoxdur: "Bu il ölkəyə gələn turistlərin sayı 1016559 nəfərə çatıb. İlin sonuna kimi bu rəqəmin artacağı proqnozlaşdırılır".

Yeri gəlmişkən, Ümumdünya Turizm Günü ilə bağlı BMT-nin baş katibi Pan Gi Mun dünya ölkələrinə müraciət edib. Sənəddə BMT rəsmisi dünyanı turizmə daha tolerant, açıq və vahid bir dünyanın formalaşmasına kömək edən faktor kimi dəyər verməyə çağırıb. Müraciətdə deyilir ki, Ümumdünya Turizm Günü bütün dünyanın əmin-amanlığı üçün turizmin əhəmiyyəti barədə düşünməyə imkan yaradır: "Bu il Ümumdünya Turizm Günü turizmin beynəlxalq həmrəylik və qarşılıqlı hörmətin möhkəmləndirilməsindəki mühüm rolunu vurğulayan "Turizm - mədəniyyətləri birləşdirən bənd" şüarı altında keçirilir. Turizm müsafirlə onu qəbul edən ölkə arasındakı möcüzəli bir rabitə vasitəsidir. O, dialoqun və qarşılıqlı əlaqələrin yaradılmasına kömək edir. Müxtəlif mədəniyyətləri təmsil edən insanlar arasında belə əlaqələrin mövcudluğu dözümlülüyün əsasına çevrilir. Dinc, yanaşı yaşamaq uğrunda mübarizə aparan dünyada turizm körpülərin qurulmasına və sülhün möhkəmlənməsinə səbəb ola bilər".

O bildirib ki, turizmin inkişaf prosesinə verdiyi töhfə, eyni zamanda, qlobal həmrəyliyin formalaşmasına da yardımçı olur.

Qlobal iqtisadiyyatın dərin qeyri-müəyyənliklə üzləşdiyi bir dövrdə turizmin sosial-iqtisadi imkanlar yaratmağa və varlılarla kasıblar arasındakı fərqi azaltmağa qadir olması faktı mühüm əhəmiyyət qazanır.

Yeni sənəd ilin sonunadək hazır olacaq

Qeyd edək ki, ölkə prezidenti tərəfindən təsdiq edilən Azərbaycan Respublikasında 2011-ci ilin "Turizm ili" elan edilməsi ilə bağlı Tədbirlər Planında nəzərdə tutulan məsələlərdən biri də bu ilin sonunadək "Turizm haqqında" qanunun yeni layihəsinin Milli Məclisə təqdim edilməsidir. Mədəniyyət və Turizm Nazirliyindən verilən məlumata görə, yeni qanun layihəsinə artıq Nazirlər Kabinetində baxılıb və sənəd razılaşdırılmaq üçün Ədliyyə Nazirliyinə göndərilib: ""Turizm haqqında" yeni qanunun qəbulu bu sahənin inkişafına əlavə imkanlar yaradacaq. Hazırda qüvvədə olan "Turizm haqqında" qanun və 2002-2005-ci illərdə Azərbaycanda turizmin inkişafına dair Dövlət Proqramı çərçivəsində müvafiq işlər görülüb. Bundan sonrakı mərhələdə daha yüksək səviyyədə beynəlxalq turizm bazarına inteqrasiya olunmaq, dünya standartlarına uyğun turizm xidmətini təşkil etmək, turizm insan ehtiyatlarının hazırlanmasını beynəlxalq şərtlərə uyğunlaşdırmaq, ölkənin turizm potensialını daha geniş təbliğ etmək baxımından yeni qanuna ehtiyac var. Bu, turizm xidməti infrastrukturunun genişləndirilməsi, yerləşdirmə obyektlərinin sayının artırılması, mədəniyyət obyektlərinin turizm nümayiş obyekti kimi istifadə olunmasının təşkili, regionlarda turizmin inkişafı, turizmin müxtəlif növlərinin təşviqi baxımından bizə əlavə imkanlar verəcək".

Qurumda deyirlər ki, yeni qanun bu günün tələblərinə cavab verəcək: "Artıq müstəqil Azərbaycanın turizm sahəsində müəyyən təcrübəsi var. Respublika daxilində sərgilər keçirilir, ölkəmiz beynəlxalq turizm sərgilərində iştirak edir, turizm potensialımız dünyanın məşhur kanallarında reklam olunur. Əvvəllər beynəlxalq sərgilərdə yalnız nazirlik təmsil olunurdusa, indi bu sıraya turizm şirkətləri də qoşulub. Bu kimi məsələlərdə də yeni turizm qanununa ehtiyac var. Yeni qanunda beynəlxalq normalar, bu çərçivədə Mədəniyyət və Turizm Nazirliyi qarşısında duran vəzifələr, eyni zamanda beynəlxalq turizm bazarına inteqrasiya olunmaq üçün lazım olan fəaliyyətin tənzimlənməsi və s. mühüm məsələlər əksini tapacaq".

Nazirlikdə həmçinin bildirdilər ki, dünya ölkələrində qeyd olunduğu kimi, hər il Azərbaycanda da 27-sentyabr "Ümumdünya Turizm Günü" kimi qeyd olunur. Həmin gün təşkil olunan tədbirlər çərçivəsində müxtəlif mövzularda - turizm sahəsində mövcud problemlər və onların həlli yollarının müzakirəsi, turizm sahəsində xidmət səviyyəsinin yaxşılaşdırılması, turizm infrastrukturunun yaradılması və s. mövzusunda "Ümumrespublika Daxili Turizm Konfransları" da keçirilir. Eləcə də, bu müddət ərzində turizm şirkətləri, turist xidməti obyektlərinin iştirakı ilə Daxili Turizm Sərgisi də keçirilir: "Bu il də Aərbaycanda turizm ili çərçivəsində Ümumdünya turizm gününün təntənəli qeyd olunması münasibətilə Mədəniyyət və Turizm Nazirliyi tərəfindən bir sıra tədbirlərin həyata keçirilməsi nəzərdə tutulur. Belə ki, sentyabrın 27-si saat 14:00-da "Kempinski Hotel Badamdar" mehmanxanasında "Ümumrespublika Daxili Turizm Konfransı", 10:00-dan 19:00-dək "Dənizkənarı milli parkda əl sənətkarlığı nümunələri sərgisi" və saat 19:00-da "Dənizkənarı milli parkda" konsert proqramı təşkil olunacaq. Həmçinin, sentyabrın 27-si ölkə muzeylərində açıq qapı günü elan olunub".

Turizm peşə məktəbləri yaradılacaq

Azərbaycanın turizm potensialını inkişaf etdirmək məqsədilə 5 rayonunda - Zaqatala, Şəmkir, Göygöl, Qusar və Masallıda turizm peşə məktəbləri yaradılacaq. Qeyd edək ki, bu tədris mərkəzləri Turizm İnstitutunun nəzdində yeni yaradılacaq Bakı Turizm Peşə Məktəbinin filialı kimi fəaliyyət göstərəcək. Yaxın günlərdə Nazirlər Kabinetinin Bakı Turizm Peşə Məktəbinin yaradılması ilə bağlı qərar verəcəyi də gözlənilir. Ümumilikdə Bakı Turizm Peşə Məktəbində 600-700 şagirdin peşə təhsili alması nəzərdə tutulur. Amma ilk mərhələdə bu şagirdlərin sayının 200-300 nəfər olması planlaşdırılır.

Sevinc

Həftə içi.- 2011.- 27 sentyabr.- S. 6.