"Gorus-2010 absurd teatr mövsümü" düşmənə layiqli cavabdır

Prezident Administrasiyasının rəhbəri, Azərbaycan Milli Elmlər Akademiyasının həqiqi üzvü, görkəmli filosof alim Ramiz Mehdiyevin bu yaxınlarda Tbilisidə "Universal" çap evində ingilis və rus dillərində nəşr olunmuş kitabı Azərbaycan tarixinə ən mükəmməl töhfələrdən biridir. İstər tarixçilərimiz, istərsə də başqa sahələrdə fəaliyyət göstərən Azərbaycan ziyalıları hörmətli akademikimizin böyük zəhmətlər sayəsində ərsəyə gətirdiyi bu əsəri təkcə son zamanlar Azərbaycan xalqına və dövlətinə qarşı sərsəm bəyanatlar verən işğalçı Ermənistanın prezidenti Serj Sarkisyana tutarlı cavab olaraq deyil, eyni zamanda tariximizin daha da dərindən öyrənilməsi, araşdırılıb gənc nəsillərə çatırılması yolunda mühüm ədəbiyyat kimi də dəyərləndirirlər. Əsərin siyasi müstəvidə Sarkisyana tərs şapalaq olaraq dəyməsinə səbəb isə hörmətli akademik Ramiz Mehdiyevin bir müəllif kimi materialı sərt istehza formasında quraraq sarkazmla Ermənistan dövlətinin indiki başçısının istinad etdiyi bütün əsas "tarixi dəlilləri" alt-üst etməsidir. 1828-ci ildə baş verən hadisələrin geniş şəkildə şərhi əsəri gənc nəslin tarixdə baş verən olaylara doğru-dürüst yanaşmaları yönündə də qiymətləndirməmək olmaz. Hörmətli akademik 1828-ci il martın 21-də, Azərbaycan türklərinin Novruz bayramı günündə, imperator I Nikolayın öz fərmanı ilə əsrlər boyu mövcud olmuş İrəvan və Naxçıvan xanlıqlarını ləğv edib və bu ərazilərdə İrandan və Türkiyədən köçürülmüş ermənilər üçün qondarma "Erməni vilayəti" yaradılmasını mükəmməl şəkildə açmaqla göstərir ki, ermənilər Azərbaycan torpaqları olan İrəvan və Naxçıvan xanlıqlarına məhz çar Rusiyası tərəfindən köçürülüblər. Yəni heç vaxt bu torpaqlarda erməni adlı xalq mövcud olmayıb. Ermənilərin I Nikolay vasitəsilə Azərbaycan torpaqları üzərində yeni vətən yaratmaq yolunda ilk addımlar atmasını geniş şəkildə verməsi göstərir ki, bu gün Ermənistan adlanan dövlətin sahib olduğu ərazilər məhz tarixi Azərbaycan əraziləridir. O torpaqlar zorən xalqımızdan alınaraq erməniləşdirilib. Hörmətli akademikimizin ermənilərə layiqli və tutarlı cavablarından biri də onların köçəri həyat sürən bir xalq olduqlarını tarixi faktlar və sənədlərlə üzlərinə vurmasıdır. Son dövrlər Azərbaycan tarixi, xüsusən də Qərbi Azərbaycan torpaqları ilə bağlı kitablar oxumaq və bir daha o illəri gözdən keçirmək qədər Azərbaycan gəncliyinin istədiyi bir şey ola bilməz. İrəvan, Göyçə, Basarkeçər, Vedi, neçə-neçə adını çəkmədiyim ellərimizin tarixinin araşdırılmasına, doğrudan da, ehtiyac var. Çünki müasir Azərbaycan gəncliyi bu tarixi bilməlidir. Hörmətli Ramiz Mehdiyev cənablarının "Gorus-2010 absurd teatr mövsümü" əsəri bu mənada yeni bir ədəbiyyatdır. Bizlərin hər biri bu tarixi faktlara dayanan, erməni lobbisinin məkrli siyasəti nəticəsində Azərbaycana qarşı düşmən mövqedə duran insanların məhz bu əsəri oxumalarını tövsiyə edə bilərik. Məni sevindirən bir başqa məqam isə əsərin təkcə Azərbaycan dilində deyil, eyni zamanda rus və ingilis dillərində də çap edilməsidir. Yəni Azərbaycan təkcə öz dili ilə deyil, eyni zamanda başqa dillərdə də tarixini tanıda biləcək. Mənə elə gəlir ki, müasir dünyada informasiya texnologiyalarının belə sürətlə inkişaf etdiyi bir dövrdə hər bir Azərbaycan gənci Azərbaycan tarixi ilə bağlı bütün bilgiləri dünya ilə bölüşməlidir. Hansı ki gerçəkdən də, həqiqət carçısının yanında yer alır. Onsuz da bu günə kimi şər və böhtan üzərində yaşamağı özünə həyat tərzi edənlər bunu anlamayacaqlar. Biz bizi anlamaq istəyənlərə öz tariximizi öyrətməliyik. Özü də belə möhtəşəm əsərlər sayəsində. Prezident yanında Dövlət İdarəçilik Akademiyasının tələbəsi olaraq mənim üçün hörmətli akademikimizin bu əsəri çox qiymətli bir əsər olmaqla yanaşı, eyni zamanda tariximizi daha da dərindən bilməyimiz üçün yeni bir ədəbiyyatdır.

Sevinc Babayeva

Həftə içi.- 2011.- 14 yanvar.- S. 3.