"Milli kitab" mükafatına əsərlərin təqdim edilməsi başa çatıb

"Milli.Az" xəbər portalının məlumatına görə, təqdim olunan əsərlərdən 27-si rus, 85 əsər isə Azərbaycan dilindədir. Müraciət edənlərin 21%-ni qadın yazarlar, 79%-ni kişilər təşkil edir. İştirak edənlərin orta yaş həddi də cavanlaşıb. Belə ki, ən yaşlı yazıçının 81, ən gənc yazarın 19 yaşı var. MKM-in təsisçisi Nigar Köçərli müraciət edənlər arasında gənclərin çoxluq təşkil etməsini ədəbiyyatımızda baş verən canlanma ilə əlaqələndirib: "Bir çox gənc bundan ilhamlanaraq ya yazmağa başlayıb, ya da yazdıqlarını ortaya çıxarıb. Ancaq xüsusilə vurğulamaq istərdim ki, "Milli kitab" mükafatı gənc yox, müasir yazarların müsabiqəsidir. Bundan başqa, bu il "Milli kitab" mükafatına 100-dən artıq əsərin təqdim olunması çox böyük göstəricidir. Xatırladım ki, ötən il təqdim olunan əsərlərin əksəriyyəti son 10 il ərzində yazılmış əsər idi. Bu il isə təqdim olunmuş əsərlərin 99%-i 2010-cu ildə yazılıb. 1 il ərzində 100-dən çox əsərin yazılması ölkəmiz üçün çox gözəl göstəricidir. Bu o deməkdir ki, MKM öz məqsədinə nail olub - ədəbiyyatımızda canlanma yaranıb". Qeyd edək ki, builki müsabiqədə iştirak edənlərin coğrafiyası daha genişdir. Belə ki, İran, Türkiyə, Gürcüstan, Almaniya, Rusiya, Ukrayna və İsraildə yaşayan həmyerlilərimiz də öz əsərlərini müsabiqəyə təqdim ediblər. Əsərlərin Ekspertlər Şurasına təqdimatı isə yanvarın 16-da olacaq. Xatırladaq ki, şura üzvləri ictimaiyyətə bəlli olan 6 nəfərdən ibarətdir: tənqidçi-filoloq Elnarə Tofiqqızı; şair-tərcüməçi Mahir Qarayev; filologiya elmləri doktoru, tənqidçi Tehran Əlişanoğlu; yazıçı-tərçüməçi Yaşar; köşə yazarı Qan Tural; yazar Zahir Əzəmət. Martın 20-dək ekspertlər bütün əsərləri qiymətləndirəcək və 20 ən yaxşı əsər seçiləcək. Martın 27-də isə 20 əsərdən 10 ən yaxşı əsər seçilib münsiflər heyətinə təqdim olunacaq. Xatırladaq ki, mükafatın münsiflər heyətinə yazıçı Afaq Məsud, yazıçı Çingiz Abdullayev, dramaturq Rüstəm İbrahimbəyov, "Ayna-Zerkalo" qəzetinin baş redaktoru Elçin Şıxlı, kinorejissor Ramiz Fətəliyev, xalq şairi Vaqif Səmədoğlu, millət vəkili, BDU-nun professoru Rəbiyyət Aslanova, "525-ci qəzet"in baş redaktoru Rəşad Məcid, "Xəzər" universitetinin rektoru Hamlet İsaxanlı, teleaparıcı Nərgiz Cəlilova, prodüser Balakişi Qasımov, tarix elmləri doktoru, BDU-nun professoru Cəmil Həsənli, AMEA-nın müxbir üzvü, professor Rafiq Əliyev, fəlsəfə elmləri doktoru, Azərbycan Mədəniyyət və İncəsənət Universitetinin professoru Niyazi Mehdi, "Qanun" nəşriyyatının sahibi Şahbaz Xuduoğlu, kinoşünas Ayaz Salayev və rejissor Mehriban Ələkbərzadə daxildir. Səsverməyə gəlincə, münsiflər 10 ballıq sistem üzrə səs verəcəklər və mayın 31-də 3 qalibin adı elan olunacaq. Bu il münsif üzvləri səslərini açıq formada bildirəcəklər. I yerin sahibi 3000 (üç min), II yerin qalibi 2000 (iki min), III yerin qalibi 1000 (min) manat pul mükafatı alacaq. İngilis dilindən Azərbaycan dilinə ən yaxşı tərcüməyə görə 1000 manat məbləğində mükafat isə ABŞ səfirliyi tərəfindən veriləcək.

Həftə içi.- 2011.- 14 yanvar.- S. 7.