Azərbaycanda turizm inkişaf edir

Nizami Cəfərov: "Tarixi yerlərlə bağlı silsilə qanunların qəbuluna ehtiyac var"

Bu günlərdə prezident İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi yekunlarına və 2011-ci ildə qarşıda duran vəzifələrə həsr olunan iclasda 2011-ci ilin "Turizm ili" elan olunması qərara alınıb.

Belə olan halda, görəsən, parlamentin qarşıdan gələn yaz sessiyasında "Turizm ili" ilə bağlı hansı qanun layihələrinin hazırlanması, müzakirələrə çıxarılması nəzərdə tutulur?

Bununla bağlı mətbuat nümayəndələrinin suallarını cavablandıran Milli Məclisin (MM) mədəniyyət komitəsinin sədri Nizami Cəfərov bildirdi ki, turizm dünyanın həm maddi-maliyyə, həm də insan həyatının mənalılığı baxımından təkcə perspektivli yox, eyni zamanda böyük əhəmiyyətli bir məsələsidir. N.Cəfərovun sözlərinə görə, qarşımızda Türkiyənin vaxtilə geri qalmış regionlarının turizm sayəsində nə qədər böyük inkişaf yolu keçməsi nümunəsi var. Komitə sədrinin sözlərinə görə, turizm həm ölkəyə, həm bölgəyə gəlir gətirir, həm də insanlar özləri çox maraqlıdırlar ki, həyatlarını səmərəli keçirə bilsinlər: "İndi Azərbaycanın bu gün bu sahədə xüsusi bir mövqe qazanmağa çalışması və cənab prezidentin də bu barədə birinci dəfə deyil, dəfələrlə mövqe ortaya qoyması çox əhəmiyyətli bir hadisədir. Azərbaycanda bu yöndə çox böyük layihələr həyata keçirilib, çox işlər görülüb və görülməkdədir. Eyni zamanda əgər bu il "Turizm ili" kimi elan olunursa, deməli, biz buna hazırıq və sözün həqiqi mənasında buna bir debüt ili kimi başlaya bilərik. Turizmin olması Azərbaycanın mədəniyyət abidələrinin bərpa olunması, Azərbaycanın dünya üçün maraqlılığının artırılması, Azərbaycanın dünyaya inteqrasiyası deməkdir ki, bu da çoxdan başlayıb". N.Cəfərovun qeyd etdiyinə görə, indi bunun əsas tərəfi ondan ibarətdir ki, Azərbaycan dünya turizmi üçün maraqlı olsun, başqa bir tərəfi də ondan ibarətdir ki, azərbaycanlılar dünyanın müxtəlif turizm məkanlarına daha həvəslə, maraqla getsinlər. Çünki artıq azərbaycanlıların da maddi-rifahı elədir ki, bayramları, hətta Yeni ili dünyanın isti ölkələrində keçirmək imkanına malikdirlər: "Bu mənada bu elə bir böyük spektrli məsələdir ki, burada ümumi ictimai maraq və dövlətin bu maraqları təmin etməsi məsələsi ilə yanaşı, həm də bizim Milli Məclisin, xüsusilə mədəniyyət komitəsinin üzərinə məsuliyyət qoyur. Hansı ki bu sahədə müəyyən qanunvericilik işlərini həyata keçirək və keçirməliyik. Doğrudur, turizmlə bağlı müxtəlif komitələrin işləri əlaqələndirilməlidir. Burada iqtisadi, maliyyə, təsərrüfat məsələləri və sair var. Amma bununla yanaşı, turizm həm də bir mədəniyyət hadisəsidir. Ona görə biz bu məsələyə hələ komitəmizin payız sessiyasının iclasında yüngülvari şəkildə toxunmuşduq. Yəni mədəniyyət abidələrinin, memorial abidələrin bərpası və onların qorunması ilə bağlı müəyyən prinsiplərin işlənilib-hazırlanması, sonra Azərbaycanda təsviri sənətin, eləcə də bir sıra yaradıcılıq sahəsinin inkişafı üçün qanunların qəbul olunması çox vacib məsələdir".

Komitə sədri onu da deyib ki, Heydər Əliyev Fondunun prezidenti Mehriban xanım Əliyevanın sayəsində Qobustanla, İçərişəhərlə bağlı xeyli işlər görülüb: "İndi burada bir məsələ var, görülən işlər o qədər böyük işlərdir ki, başqa digər işləri də ortaya çıxarır. Məsələn, biz əgər Abşeron kəndləri ilə bir qanun qəbul etsək, təbii ki, burada bir komponent də muğamdır. Qərb regionlarında turizmin inkişafı, incəsənətin, mədəniyyətin, tarixi abidələrin qorunması ilə bağlı qanun qəbul etsək, orada mütləq aşıq sənəti də diqqətə alınmalıdır. Yəni bizim coğrafiyanın landşaftında tək təbiət deyil, bir mədəniyyət landşaftı da var ki, onlar bir-birilə əlaqədədir. Bu baxımdan elə bilirəm ki, bu qanunları müxtəlif komitələrlə hazırlamalı, müzakirələrə təqdim etməliyik. Amma mən də belə düşünürəm ki, bu yöndə silsilə qanunlara ehtiyac var. Belə demək mümkünsə, gələcəkdə həmin regionların inkişafı, onların turizm üçün maraqlı olması ilə bağlı silsilə qanunların qəbuluna ehtiyac var".

Nahid Canbaxışlı

Həftə içi.- 2011.- 20-21 yanvar.- S. 3.