"Mən elə Yaqut Qarabağlı olmaq istəyirəm"
Dünyanın düz
vaxtı idi. Bir gün yolum Qarabağın toy evi olan Ağdam
şəhər "Pioner və məktəblilər"
evindən düşdü. Respublika və SSRİ-nin maarif
xadimi, "Beynəlxalq festivallar" laueratı Murad Rzayevin rəhbərliyi
ilə "Qarabağ bülbülləri" ansamblı məşq
edirdi. Moskva şəhərinə səfərə
hazırlaşırdılar. Balaca bülbüllərin
bir-birindən gözəl və ecazkar səsi şəhəri
bürümüşdü. Onların
arasında Yaqut Qarabağlı da var idi.
Uzun illərdir Yaqut
xanımı görmürdüm. Ancaq səsini radio
dalğalarından, efirlərdən eşidərdim. Onunla
"Atatürk" mərkəzində keçirilən tədbirlərin
birində görüşdük. Yaqut xanımdan müsahibə
almaq qərarına gəldim. Əvvəla, razı olmayıb
dedi ki, düzü reklamdan xoşum gəlmir. "Jurnalistlər
mənə çox müraciət edib, qəlblərini
qırmamışam. Müsahibə alıblar, dediklərim
qalıb kənarda, özləri bildiklərini yazıblar.
Özümə söz vermişəm ki, heç bir qəzetə
müsahibə verməyim". Uzun çək-çevirdən
sonra Yaqut xanım axır ki, razılığa gəldi.
Redaksiyamızın
qonağı olan müğənni öz sənət yolunun
çətinliklərindən söz açdı:
"Ağdam rayonunun Çəmənli kəndində
doğulmuşam. Səs bizdə gendən gəlir. Nənəmin
və bibimin gözəl səsləri olub, amma oxumayıblar. 5
yaşımdan səsimin olduğunu hiss etmişəm.
1976-cı ildə 1-ci sinifdə oxuyurdum. Sinif müəlliməmiz
Maniya Məmmədova keçdiyi dərslərin birində
şagirdləri yoxlayıb dedi ki, kim nəyi bacarır? Uşaqlardan
kimisi şeir və nağıl söylədi, kimisi də
hekayə danışdı. Hərə öz məharətini
göstərdi. Mən dedim ki, oxumağı bacarıram.
Müəllimə razı oldu. O vaxtlar "Qəşəngdir"
mahnısı çox dəbdə idi. Əməkdar artist Nisə
Qasımova ifa edərdi. Həmin mahnını oxudum. İfam
Maniya müəllimənin çox xoşuna gəldi. O
gündən məktəbin bütün tədbirlərində
iştirak etdim. Yaşımın az olmasına baxmayaraq, rayon tədbirlərinə
dəvət olunardım. Səsim tədbir
iştirakçılarının xoşuna gəlirdi və hər
dəfə səhnəyə çıxanda alqışlarla
qarşılanardım. Artıq 4-cü sinifdə təhsil
alırdım. Musiqiyə həvəsim günbəgün
artırdı. Özümü böyük sənətkarımız,
SSRİ xalq artisti Zeynəb Xanlarovaya bənzədirdim. Onun kimi
sənətkar olmağı arzulayırdım. Mən səhnə
mədəniyyətini Zeynəb xanımdan öyrənərdim.
Çünki onun hər dəfə
çıxışı səhnəyə böyük bir
sevinc, təravət gətirərdi. Sonsuz məhəbbətlə,
sevgilərlə qarşılanardı Zeynəb xanım.
- "Qarabağ bülbülləri" ansamblında
oxumaq çox çətin idi. Ona görə ki, ansambla əsl
bülbülləri qəbul edərdilər. Necə oldu ki
sizi adıçəkilən ansambla götürdülər?
- Təxminən 1978-ci
il olardı. Tale elə gətirdi ki, həmin ili
"Qarabağ bülbülləri" ansamblında respublika
yeniyetmələri arasında keçirilən müsabiqəyə
mən də qatıldım. Münsiflər
heyətində karifey
sənətçilərimiz xalq artistləri Arif Babayev, Sara
Qədimova və başqaları əyləşmişdilər.
Onların qarşısında
ilk dəfə idi çıxış edirdim. Çox çətin idi. Bu mənim ilk
sınaq imtahanım idi. "Ay bülbüllər"
mahnısını ifa
etdim. İfamı münsiflər heyəti bəyəndi və 1-ci yerə çıxdım.
Böyük sevinclə
evə qayıtdım.
Amma üzümün sevinc çöhrəsi üzün çəkmədi.
Atam məni qəzəbli qarşılayıb,
acıqlı-acıqlı dedi
ki, qız nədir, müğənnilik
nədir?! Get dərslərini oxu, həkimdən, müəllimdən
özünə peşə
tap. Lakin babam mənə dəstək oldu. Məni çox istəyirdi. Səsimdən
çox xoşu gəlirdi. Hərdən mütəkkəyə dirsəklənib
mənə deyərdi,
bala, bir şey oxu. Oxuduqca
babam şirin yuxuya gedərdi. Babamın sayəsində bu sənətə gəldim. O illərdən
"Qarabağ bülbülləri"
ansamblına üzv yazıldım. Ansamblın
tərkibində xalq artisti Aygün Bayramova və əməkdar artist Feyruz Səxavət də vardı. Bu ansamblın tərkibindər respublikada
keçirilən dövlət
tədbirlərində çıxışlar
edərdik. Səsimiz SSRİ-nin, Kremlin Qurultaylar Sarayından gələrdi. Moskvada keçirilən festivallarda
uğurla çıxışlar
edərdik. Dünyanın
çox ölkələrini
gəzərdik, hər
yerdə də sürəkli alqışlarla
qarşılanardıq. Artıq "Qarabağ bülbülləri"nin şöhrəti dünyaya yayılmışdı.
Dövlət tədbirlərində
iştirak etdiyim üçün orta məktəbi bitirdikdən
sonra Ağdam rayon Mədəniyyət şöbəsinin göndərişi
ilə Ü.Hacıbəyov
adına Ağdam Musiqi Texnikumunun muğam şöbəsinə
daxil oldum. Xalq artisti Qədir
Rüstəmov və xanəndə Şahmalı
Küroğlundan, Sədi
Məmmədovdan muğamın
sirlərini öyrəndim.
Musiqi məktəbini
bitirdikdən sonra ailə həyatı qurdum və bir müddət
Moskva şəhərində yaşadıq. Yenidən sənətə
qayıtdım. Vaxtaşırı konsertlərim olur.
"Qızıl fond"un arxivində bir sıra muğam və
xalq mahnım saxlanılır.
- Televiziya verilişlərinə
sizi dəvət edirlərmi? Bir çox sənətçi
televiziyalardan şikayətlənir,
siz necə?
- Televiziyada
çıxış etmək
mənim üçün
heç vaxt problem olmayıb. "AzTV"
mənim üçün
doğma kanaldır.
"Qarabağ bülbülləri" ansamblının
tərkibində oxuyanda
bizi çox təbliğ edib. Bu gün də
belədir. Bütün kanallar
məni verilişlərinə
dəvət edir.
- Səfərlərdə olmusunuzmu? Bir sözlə, qastrollara kimlərlə gedərdiniz?
- Çox
qastrollarda olmuşam. Saymaqla qurtaran deyil. Sovetlər dönəmində karifey sənətkarlarla Respublika
Sarayında, Kremlin Qurultaylar
Sarayında, bir çox xarici ölkədə olmuşuq.
Həmçinin bölgələrə, qastrollara gedərdik.
SSRİ xalq artistləri
Lütfiyar İmanov, Zeynəb Xanlarova, xalq artistləri Sara Qədimova, Alim Qasımov, Səkinə İsmayılova və başqaları ilə Moskva şəhərində
qastrollarda olmuşuq. Polad Bülbüloğlunun
iştirakı ilə
"Şur" ansamblında
Arif Babayev, Səkinə İsmayılova
ilə birlikdə
"Cıdır düzü"ndə
keçirilən "Xarı
bülbül" fevtivalında
iştirak etdik. Festivalın qalibi oldum, fəxri
diplom aldım.
- Siz həm də dünyaşöhrətli
Ağdam "Şur"
ansamblında solist olmusunuz. Ansambl haqqında nə
deyə bilərsiniz?
- 1980-ci ildə
bu ansamblın solisti oldum. "Şur"un tərkibində
bir çox ölkələri fəth
etdim, ən çox "Şahnaz"
muğamını, "Qarabağ
şikəstəsi"ni, "Heyratı"nı, xalq mahnılarını ifa edərdim. "Qarabağ bülbülləri"
ansamblında "Qarabağ
şikəstəsi" ilə
və "Şur"
ansamblında "Şahnaz"
muğamı ilə yadda qaldım. Xarici ölkələrdə qastrollarda
olarkən muğamlarımızı,
xalq mahnılarımızı,
bir sözlə, Azərbaycan musiqisini və mədəniyyətini
layiqincə təbliğ
edərdik. Xaricilər bizim
muğamları çox
sevirdilər. "Şur" ansamblın bədii rəhbəri Fərhad Paşayev idi. O, hazırda Təbrizdə Musiqi Akademiyasının müəllimidir.
Qarabağ müharibəsindən sonra "Şur" da öz ağır
günlərini yaşadı.
Artıq "Qarabağ"
ansamblını yaratmışam,
rəhbərlik etdiyim
ansamblın tərkibində
yetərincə bülbüllər,
istedadlar var. Ağdam və
- Nə əcəb,
bu günə kimi siz də
"ulduz" olmamısınız?
- Ulduz göydə olur. Mən Yaqut Qarabağlı olmaq istəyirəm.
Çünki xalqım məni
Yaqut Qarabağlı kimi tanıyır. Xalqın sevgisi mənə bəsdir. Bu mənim mükafatımdır.
Uşaqlıq illərimdən bu
günə kimi çox dövlət tədbirlərində iştirak
etmişəm. Ən çox
xeyriyyə konsertlərinə
üstünlük verirəm.
İl ərzində 40-50 xeyriyyə
konsertlərim olur.
Əlillər, kimsəsizlər, qocalar evində, habelə cəbhə bölgələrində əsgərlərimiz
qarşısında verdiyim
konsertlərdən məmnun
oluram. Çunki onda mənim ruhum
dincəlir.
Qələndər Xaçınçaylı
Həftə içi.- 2011.- 22-24 yanvar.- S. 13.