"AŞ PA Azərbaycanın ərazi bütövlüyünü dəstəkləyir"

Mövlud Çavuşoğlu: "Xüsusi qətnamədə işğalçı Ermənistan qoşunlarının Azərbaycan ərazilərindən çıxarılması tələb olunur"

Dünən AŞ PA-nın qış sessiyasında Azərbaycanda keçirilmiş parlament seçkisi ilə bağlı hesabat təqdim olunub. Hesabatı AŞ PA-nın Azərbaycanda parlament seçkisində müşahidə missiyasının üzvü Tadeuş İvinski təqdim edib. Tadeuş İvinski çıxışı zamanı bildirib ki, bu, olduqca tarazlaşdırılmış hesabatdır. Qurum nümayəndəsinin sözlərinə görə, onlar seçki zamanı irəliləyişin olduğunu müşahidə ediblər. AŞ PA müşahidəçilərinin fikrincə, seçki uğurlu keçib. Lakin AŞ PA hesab edir ki, Azərbaycan bu istiqamətdə daha çox səy göstərməlidir ki, seçki sahəsində konsensus əldə olunsun. Tadeuş İvinski əminliklə bildirib ki, AŞ PA bundan sonra da ümumilikdə bu sahədə Azərbaycanla əməkdaşlıq əlaqələrini davam etdirəcək və ölkəmizdə demokratiya sisteminin möhkəmləndirməyə yardım etməyə hazıdır: "Bəzi həmkarlarımız bizim seçki ilə bağlı hesabatımızı bəyənmir və bunun qeyri-obyektiv olduğunu və 7 noyabr seçkilərinin düzgün keçirilmədiyini bildirir. Bizim müşahidə missiyamızın üzvləri də irəliləyişlərin olduğunu qeyd edirlər. Lakin AŞ PA hesab edir ki, Azərbaycan bu istiqamətdə daha çox səy göstərməlidir ki, seçki sahəsində konsensus əldə olunsun".

Qurum prezidenti Mövlud Çavuşoğlu isə keçirdiyi mətbuat konfransında bildirib ki, Dağlıq Qarabağ münaqişəsi təkcə Avropa Şurası üçün deyil, həm də Avropa üçün önəmlidir və həllini gözləyən bir məsələdir. Onun sözlərinə görə, AŞ PA Ermənistan - Azərbaycan, Dağlıq Qarabağ münaqişəsinin sülh yolu ilə həllini istəyir və bu istiqamətdə müəyyən səylər göstərir. "Azərbaycanın Avropa Şurasına üzvlüyünün 10 illiyini salamlayıram. Bu 10 il ərzində, şübhə yoxdur ki, Avropa Şurası, Avropa Şurası Parlament Assambleyası Azərbaycanda demokratiyanın, təşkilatın təməl prinsiplərinin təşviqi və möhkəmlənməsinə böyük töhfə verib. Lakin vəziyyəti daha da yaxşılaşdırmaq imkanları var. Ümid edirəm ki, gələcəkdə irəliləyişlər əldə ediləcək. Biz tərəfdaş kimi işləyirik və daha da yaxşı nəticələr əldə etməyə şübhə etmirik". Qeyd edək ki, qurumun qış sessiyası çərçivəsində AŞ PA-nın Dağlıq Qarabağ üzrə Alt Komitəsinin uzun müddətdir keçirilməyən iclası da təşkil olunacaq. Çavuşoğlu bu komitənin iclasının baş tutmasını istədiklərini bildirib. O hesab edir ki, Avropa Şurasının iki üzvü, Ermənistan və Azərbaycan arasında münaqişənin olması AŞ-nın özü üçün böyük bir problemdir: "AŞ PA-nın 2005-ci ildə xüsusi qətnamə qəbul edib və həmin sənəddə Ermənistan işğalçı dövlət kimi göstərilir, eyni zamanda işğalçı Ermənistan qoşunlarının Azərbaycan ərazilərindən çıxarılması tələb olunur. AŞ PA münaqişə ilə bağlı öz mövqeyini əsla dəyişməyəcək. İki ölkənin nümayəndə heyətləri arasında danışıqlar da məhz bunun əsasında aparılır və qurum Azərbaycanın ərazi bütövlüyünü dəstəkləyir və bunu davam etdirəcək". Çavuşoğlu Azərbaycanda keçirilən parlament seçkisinə də toxunub: "Bu seçkilərdə AŞ PA-nın xüsusi nümayəndə heyəti olub. Bu sessiya çərçivəsində həmin nümayəndə heyətinin müşahidələri bir hesabat şəklində məruzə ediləcək və müzakirə olunacaq".

Çavuşoğlunun sonda toxunduğu məsələlərdən biri də, Azərbaycanın Avropa Şurasına üzvlüyünün 10 illiyinin qeyd olunması ilə bağlı məsələ olub. O bu məsələnin sessiya çərçivəsində yüksək səviyyədə qeyd olunacağını, xüsusi mərasimlərin keçiriləcəyini, sessiyada nümayəndə heyəti ilə yanaşı, Avropa Şurasının əsas simalarının da məhz bu məsələ ilə bağlı öz fikirlərini bildirəcəyini, quruma Azərbaycanın üzv olmasından sonra Azərbaycanın qazandıqları və onun inkişafına təsir edən amillərin də müzakirə predmetinə çevriləcəyini bildirib. M.Çavuşoğlu təəssüflə vurğulayıb ki, Ermənistanda bəzi siyasi rəhbərlər bu məsələnin AŞ PA sədrinin şəxsi layihəsi olduğunu bildirirlər: "Bu, səhv fikirdir. Məsələyə Ermənistana rəsmi səfərim zamanı aydınlıq gətirmişəm. Bu, şəxsi bir layihə deyil, AŞ PA-nın qəbul etdiyi qərardır. AŞ PA sədrinin bu məsələni Büroya təqdim etmək öhdəliyi var. Bu, AŞ PA sədri kimi mənim vəzifəmdir. Məsələ büronun cümə günü keçiriləcək iclasında müzakirə olunacaq. Alt Komitənin sədri postuna hələ namizədlər irəli sürülməyib".

Əli Zülfüqaroğlu

Həftə içi.- 2011.- 25 yanvar.- S. 1-2.