"Sübhün səfiri" filminin Türkiyədə çəkilişi başa çatıb

Azərbaycan mütəfəkkiri haqqında çəkilən filmdə türkiyəli aktyorlar da rol alıb

Artıq Azərbaycan dramaturgiyasının banisi Mirzə Fətəli Axundovun 200 illik yubileyi münasibəti ilə çəkilən "Sübhün səfiri" filminin Türkiyə çəkilişləri baş tutub. Adıçəkilən filmin yaradıcı heyətindən verilən məlumata görə, filmin çəkilişləri İstanbulda aparılıb. Filmin Türkiyə çəkilişlərində azərbaycanlı aktyorlarla yanaşı, türkiyəli aktyorlar da çəkilib. Fuad Paşa rolunda Ahmet Uz, Münir Əfəndi rolunda Altar Akişık, Namik Kamal rolunda Ahhan Şener, Yavər Şahin rolunda Türkiyədə yaşayan azərbaycanlı Vüqar Əliyev çəkilib. Çəkilişlərə Azərbaycandan 16 nəfərlik heyət qatılıb. Aktyorlardan yalnız Rasim Balayev Türkiyədəki çəkilişlərdə iştirak edib. Xatırladaq ki, filmin ssenari müəllifi xalq yazıçısı Anar, quruluşçu rejissoru Ramiz Həsənoğlu, operatoru Kənan Məmmədov, bəstəkarı Cavanşir Quliyev, baş rəssamı Rafiz İsmayılov, rejissoru Akif Rüstəmov, icraçı prodüseri Adil Qulamov, geyim üzrə rəssamı Şahin Həsənlidir. Filmdə Mirzə Fətəli Axundovun gənclik dövrünü gənc aktyor Nicat Həbibov, 50 yaşından ömrünün sonuna kimi olan dövrü isə xalq artisti Rasim Balayev canlandırır: "Filmdə Bakıxanov rolunda Fəxrəddin Manafov, Həsən bəy Zərdabi rolunda Məmməd Səfa, Lermontov rolunda Oleq Əmirbəyov, Tubu xanım rolunda Məlahət Abbasova çəkiliblər. Film Mədəniyyət və Turizm Nazirliyinin sifarişi əsasında Cəfər Cabbarlı adına "Azərbaycanfilm" kinostudiyasında istehsal olunur".

Qələndər

Həftə içi.- 2012.- 11-13 fevral.- S. 14.