Türkiyədə "Azərbaycan Mədəniyyəti Günləri"

İyunun 17-dən Türkiyədə "Azərbaycan Mədəniyyəti Günləri" start götürüb. Mayın 21-ək davam edəcək tədbir iki ölkənin müvafiq nazirlikləri arasında imzalanmış mədəni əməkdaşlıq protokola əsasən gerçəkləşir.

Mədəniyyət və Turizm Nazirliyinin mətbuat xidmətindən "Həftə içi"nə verilən məlumata görə, Ankara və İzmir şəhərlərində təşkil olunan "Azərbaycan Mədəniyyəti Günləri" çərçivəsində iki qardaş ölkə arasındakı mədəni əlaqələrin daha da inkişafına xidmət edən konsert proqramları, sərgi və konfransların təşkili nəzərdə tutulur.

Türkiyədə ilk dəfə keçirilən "Azərbaycan Mədəniyyəti Günləri"ndə mədəniyyət və turizm naziri Əbülfəs Qarayevin rəhbərliyi ilə ziyalılar və incəsənət ustalarından ibarət 70 nəfərlik nümayəndə heyəti iştirak edir. Mədəniyyət günlərinin təntənəli açılış mərasimi iyunun 18-də Ankara şəhərində gerçəkləşib və mərasimdə incəsənət ustalarımız geniş konsert proqramı təqdim ediblər.

Mədəniyyət günlərinin ikinci günü TÜRKSOY-un Ankaradakı iqamətgahında dahi Azərbaycan şairi Nizami Gəncəvinin 870 illiyi münasibətilə elmi konfrans keçiriləcək. Tədbirdə AMEA-nın müxbir üzvü, professor, millət vəkili Nizami Cəfərov və Azərbaycan Bəstəkarlar İttifaqının sədri, Xalq artisti Firəngiz Əlizadə Nizami və Azərbaycan musiqisi mövzusunda çıxış edəcəklər. Tədbir çərçivəsində Ankarada rəsm, xalça, milli geyim və xalq tətbiqi sənət nümunələrimizdən ibarət sərgi də təşkil olunacaq.

Mədəniyyət günləri İzmir şəhərində davam edəcək. Burada incəsənət ustalarımızın iştirakı ilə geniş konsert proqramı keçiriləcək. Azərbaycanın xalq tətbiqi sənət inciləri, milli geyim, xalça və rəngkarlıq nümunələrindən ibarət sərgi İzmirdə də nümayiş etdiriləcək.

Qələndər

Həftə içi.- 2012.-19 iyun.- S.8.