Hər şey kinosu naminə...

 

Respublika Kinematoqrafçılar İttifaqının əsas məqsədi gənc kinematoqrafçılar ordusu yaratmaqdır

 

"Bu kino ki var, çox qəliz məsələdir. Həm qəlizdir, həm də vacib". Hidayət müəllimin, daha doğrusu, ölməz sənətkar Səməndər Rzayevin bu məşhur kəlamı istənilən dövr üçün aktualdır. Uzun müddət ərzində həqiqətən də qəliz bir hala gəlmiş kinomuza qayğı son dövrlər bir qədər artıb. Dövlətin bu sahəyə xüsusi diqqəti də milli kino istehsalının inkişafını sürətləndirib.

Bir müddət əvvəl "Nizami" Kino Mərkəzində "Kino və konseptual problemlər" mövzusunda keçirilmiş tədbirdə Azərbaycan Respublika Kinematoqrafçılar İttifaqının yaradılmasına qərar verildi. Xalq artisti Şəfiqə Məmmədovanın sədrlik edəcəyi qurum milli filmlərin beynəlxalq arenaya çıxarılması, milli filmlərin təşkili, beynəlxalq simpozium və konfransların təşkili, kino infrastrukturunun formalaşdırılması kimi missiyanı öz üzərinə götürdüyünü elan edib.

Xatırladaq ki, yeni ittifaqın yaranmasına mədəniyyət və turizm naziri Əbülfəs Qarayev də belə bir təşəbbüsün irəli sürülməsinə ehtiyac olduğunu deyib: "Əgər bu qədər çoxsaylı tanınmış və ciddi kino xadimi bir yerə toplaşıbsa, belə təşəbbüs irəli sürülübsə, deməli, buna ehtiyac vardı".

Nazir ittifaqa ehtiyac olduğu zaman müraciət edəcəkləri təqdirdə onlara kömək edəcəyini də bildirir: "Yeni təsis olunan Azərbaycan Respublikası Kinematoqrafçılar İttifaqı əvvəlcə Ədliyyə Nazirliyinə dövlət qeydiyyatdan keçmək üçün müraciət etməlidir. Qeydiyyatdan keçəndən sonra bizə müraciət etsələr, onlara köməklik edəcəyik".

 

"Yaradıcı ailəyə ehtiyac var idi"

 

İttifaqın sədri, Xalq artisti Şəfiqə Məmmədova "Həftə içi"nə açıqlamasında qurumun qarşısında duran əsas məqsədin yeniliklərə və böyük işlərə imza atmaq olduğunu deyir. O bildirir ki, qurumun bütün işləri xüsusi proqram əsasında aparılacaq. İttifaqın ilk işini isə Kino Günündə görə biləcəyik: "Proqram, nizamnamə dəqiqləşməli və bütün proqram tam şəkildə işlənməlidir. Biz hər şeyi, ən əsas istiqaməti bilməliyik. Avqustun 2-də, yəni Kino Günündə hazırlanan proqramı ictimaiyyətə təqdim edəcəyik. Həmin müddətdə ittifaqın nizamnaməsi də işlənəcək. Nizamnamədə, proqramda bütün məsələlər əhatə olunmalıdır".

Xalq artisti bu sahəyə gənc nəslin cəlb olunması arzusundadır. Onun sözlərinə görə, qurumun qarşısında dayanan əsas məsələlərdən biri gənc kinematoqrafçılar ordusu yaratmaqdır: "Bu, böyük məsələdir. Bunun üçün əlimizdən gələni edəcəyik. Gənc nəslin demokratik, sağlam, mədəni mühitdə inkişafı çox vacib məsələdir. Biz bunu kinoya da gətirib, maarifləndirmə işi aparmalıyıq".

Kinorejissor Ayaz Salayev də "Həftə içi"nə açıqlamasında belə bir ittifaqın yaranmasının Azərbaycan kinosu üçün böyük əhəmiyyət kəsb etdiyini deyir. Kinorejissor qeyd edir ki, ittifaqda birləşən kino xadimləri cəmiyyət üçün dəyərli insanlardır: "Biz heç nədən məhsul - film hazırlayırıq. Film həm satmaq üçün məhsul, həm də mədəniyyətin təbliğidir. Bizlər gələcəyə doğru addımlayırıq. Gələcəyə filmlərlə addımlamaq mümkündür və vacibdir. Digər vacib olan məsələ isə - dəyərlərdir. Lazımi dəyərlərin yaranması və inkişafı üçün kino ictimaiyyətinin belə birliyinin yaranması vacib idi. Yaradıcı insanlar tək olsa da, yaradıcı ailəyə ehtiyacı var. Yaxşı ki, belə bir cəmiyyət yarandı və biz bu cəmiyyətin içindəyik".

 

İstedadına güvənən hər kəs...

 

"Azərbaycanfilm" Kinostudiyasının direktoru Müşfiq Hətəmov isə bizi ittifaqın fəaliyyəti ilə daha ətraflı tanış etdi. O, bir çox ölkələrdə kino sənayesinin inkişafı üçün belə addımların atıldığını deyir. Əlavə edir ki, son dövrlər belə bir ittifaqın yaradılmasına zərurət yaranmışdı: "Dünya praktikasında da belə bir təcrübə var. Ancaq təbii olaraq bu ittifaqın yaradılması digərinin keyfiyyətsizliyinə dəlalət etmir. Bu qurum gənc və orta nəsildən olan eyni baxışlı insanların təşəbbüsü ilə yaradılıb. Onların təşəbbüsü nəticəsində də müəyyən layihələr irəli sürüləcək və bu layihələr nəticəsində də kinomuzun inkişafı daha da sürətləndiriləcək. Əsas məqsəd də məhz Azərbaycan kinosunun inkişaf etdirilməsidir. Hər hansı ittifaq olmasından asılı olmayaraq, bu qarşıda duran əsas məqsəddir".

Müşfiq Hətəmov qeyd edir ki, əməli işə Ədliyyə Nazirliyindən qeydiyyatdan keçəndən sonra başlanılacaq. Ancaq o, hələ bu barədə nə isə deməyin çox tez olduğunu bildirdi. Qeydiyyatdan sonra planlar haqqında ətraflı məlumat veriləcək: "Qeydiyyatdan keçmək üçün Ədliyyə Nazirliyinə müraciət edəcəyik. Bundan sonra tam olaraq işə başlaya bilərik. Təbii ki, ilk işimiz bu sahədə dünya praktikasını öyrənmək olacaq. Və əlbəttə, kino sənayesində gedən proseslərlə də yaxından tanış olacağıq".

Müşfiq Hətəmov ittifaqa məhz Şəfiqə xanım Məmmədovanın sədr seçilməsinə də aydınlıq gətirdi. O, bunu gözəl aktrisanın həmişəki kimi prinsipiallığı ilə əlaqələndirdi: "Şəfiqə xanımın tərifə və təqdimata ehtiyacı olmayan bir insandır. Onun prinsipiallığı, gözəl aktyor bacarığı, istedadı kifayət edir ki, o ittifaqın sədri olsun. O, kinoya, öz sənətinə heç vaxt xəyanət etməyib və daim öz xüsusi insani keyfiyyətləri ilə seçilib. Məhz buna görə hər kəs Şəfiqə xanımın yeni qurumun sədri olmasını məsləhət gördü".

"Azərbaycanfilm" Kinostudiyasının direktoru deyir ki, onlarla həmfikir olan hər kəs Respublika Kinematoqrafçılar İttifaqı qeydiyyatdan keçəndən sonra müraciət edib onların sıralarına qatıla bilər. Qurumun maliyyəsinə gəlincə isə Müşfiq Hətəmov onların dövlətdən maliyyələşməyəcəyini bildirdi: "İttifaq qrant layihələr tərəfindən maliyyələşib inkişaf edəcək".

 

 

Nigar İxtiyarqızı

 

Həftə içi.- 2012.- 26-27 iyun.- S.8.