Türk dünyasının qeyri-maddi mədəni irs paytaxtı

Bu il Şəki şəhərində müxtəlif tədbirlər, festivallar, simpoziumlar, ustad dərsləri, dəyirmi masalar keçiriləcəyi planlaşdırılır.

Şəki şəhəri Tatarıstanın Elabuqa və Başqırdıstanın Ufa şəhərləri ilə birgə türk dünyasının 2012-ci il üçün qeyri-maddi mədəni irs paytaxtı elan olunub. Bu, TÜRKSOY-un ötən ilin sentyabrında Rusiya Federasiyasının Tatarıstan Respublikasında keçirilən IV seminarının yekun rəyinə əsasən müəyyənləşdirilib.

Şəhər icra hakimiyyəti başçısının müavini Zərinə Cavadova mətbuata açıqlamasında bildirib ki, bu, qədim sənətkarlıq ənənələri ilə seçilən Şəkiyə göstərilən çox böyük etimaddır. O qeyd edib ki, Şəkinin 2012-ci il üçün türk dünyasının qeyri-maddi mədəni irs paytaxtı elan edilməsi heç də təsadüfi deyildir. Qədim dövlətçilik ənənələri, zəngin tarixə malik olan bu şəhər, eyni zamanda, sənətin və sənətkarlığın yüksək səviyyədə inkişaf etdiyi ərazilərdən biri olub. El sənətkarlarının fədakar əməyi sayəsində bu qədim şəhərdə çox zəngin tarixi-mədəni irs yaranıb. Burada memarlıq, tətbiqi sənət, ağac və sümük üzərində oyma, dulusçuluq, misgərlik, şəbəkə, zərgərlik və digər sənət növləri yüksək səviyyədə inkişaf edib.

Şəki uzun illər Azərbaycanda, eləcə də bütövlükdə Qafqazda ipəkçiliyin mərkəzi olub. Özünəməxsus mətbəxi ilə ölkəmizin hüdudlarından kənarda da yaxşı tanınan bu qədim diyar dünya əhəmiyyətli tarix-memarlıq abidələri ilə də məşhurdur. Şəki xanlarının sarayı, Yuxarı və Aşağı Karvansaralar, Şəkixanovların evi, Dairəvi məbəd, Cümə məscidi və onlarla digər tarix-memarlıq abidələri maddi-mədəni irsimizin ən gözəl nümunələridir. Təsadüfi deyil ki, Azərbaycan Respublikası Mədəniyyət və Turizm Nazirliyinin "2010-2014-cü illər üçün Xalq Yaradıcılığı Paytaxtları" proqramına əsasən, Şəki şəhəri 2010-cu ildə "Azərbaycanın Sənətkarlıq Paytaxtı" elan olunub.

Zərinə Cavadova bildirib ki, Şəki şəhərinin 2012-ci il üçün türk dünyasının qeyri-maddi mədəni irs paytaxtı elan edilməsi ilə bağlı təklif ilk olaraq Mədəniyyət və Turizm Nazirliyi və TÜRKSOY-un birgə təşkilatçılığı ilə 2010-cu il aprelin 28-də Şəkidə keçirilmiş "Türkdilli xalqların qeyri-maddi mədəni irsinin konvensiyalaşdırılması, inventarlaşdırılması və proqramlaşdırılması" mövzusunda III beynəlxalq seminarda irəli sürülüb.

Nigar

Həftə içi.- 2012.- 6 mart.- S. 8.